HEI HI A TAWPNA A NI LO

Ram hruaitu tur kan inthlang dawn a, pawl tin leh candidate tinin tlin tumin kan bei leh ta suau suau mai a. Tihdan chi hrang hrang leh rem hriat dan chi hrang hrang hmangin tha kan thawh a. A hmuhnawm ti zawnga thlirtu tan chuan hmuhnawm tih tham fe a ni mai. Kan ṭhian pakhat chuan, “Inthlan hi zo thuai thuai se ka ti ngawt mai,” a ti a. “Engati maw?” ti a ka’n zawh chuan ani chuan, “A ninawm tawh em alawm. Tlin tum reng renga an vei suau suau hmel hi a hmuh a ninawm,” a ti a. Kei lahin, “Aw, engah nge nangmah an rawn tibuai che pawh a ni hran lova. Hei thla khat pawh a awm tawh lawi lova, lo thlir liam ve mai mai ta che,” ka ti a. Ani chuan tha tein, “A ni ngawt mai tiraw,” a ti ve leh mai a.

Ṭhenkhat chuan pawl chhinchhiahna flag tar tam zawngin ṭan an la a. An theihna apiangah flag an tar a. Mi kawngka biangah te, ramhnuai thingzarah te, thingkungah te leh kawng dung a remchang apiangah an tar zung zung zel a. Flag tar tam kha an thlamuanpui a, flag a intar tam chuan mi rilru an hnehin an ring a ni ngei ang. Ṭhenkhat lahin ruaitheh an chak zek zek a. Eikhawm leih leih lam ngawt an tum a.

A ṭhen lah chu thil chi hrang hrang semin an buai em em a. Vantlang hman chi bungrua chi hrang hrang, tunhma zawng pawha vantlang mamawh kha tunah an han sem thar ta thut a. Ṭhenkhat phei chuan an tlin chuan chumi khami chu kan sem ang tiin thil hlu tham angreng tak tak ni a lang an lo tiam ve mek bawk a. Ṭhenkhat chuan sorkar hnaa an tlangval te leh an nula te an luh theihna tur an lo tiam bawk a. Pawisa sem lah chu ualau takin kan intiam ta lawng lawng mai bawk.

A engti zawng pawhin ti ila, engkim mai hi a chin tawk a awm vek a. A nasat luat chuan engmah hi a lo tha lo. Sap thufingin, ‘Too much of anything is not good’ a lo ti a. Engkim mai hi a lutuk chu a lo ṭha hauh lo mai. Vote zawnga han intlawh kual nikhuaa rin loh taka a mamawhtu tak mai, dam lo han hmuh thut a, lainatna nena pawisa hmanga han inkan chawpchilh te pawh a tha ve tho mai. Mahse tum nei ren rawn a fing thiam tak maia mi damlohna leh an mamawhna hre rana vote leh pawisa khawn tawn nana dam lo han inkantir a, dam lo enna pangngai aia tam daih han inpek te hi chu a fin uchuak thlak lutuk deuh niin a lang. Ngainatawm lam aiin engemaw ti takin a ngainatawm loh phah thei a, ‘phakar’ thil a tel ru tlat.

Mamawh tih hriat ngawih ngawih, khawilai tuihawk luankawr tlabal lutuk emaw, kalkawng tlabal lutuk, han siam harsa tehchiam si lo, mipui mamawh ni ngei si, tunhmaa ngaihsaktu awm loh vang mai maia siamṭhat lohva awm te chu, ‘Kan tlin ve chuan hengte hi chu kan ngaihtuah dawn nia,’ han tih mai te pawh a fel lohna awm tehchiama a lan loh laiin midangin an remti dawn lo tih hre chung chung a tute hnen emawa, ‘Autonomous District Council kan pe ang che u,’ tih te chu fel lo tak a ni thung.

Kan candidate te, kan political party te, kan campaigner te’n hria se ka duh chu tun hi a tawpna a ni ngawt lo. Inthlan zawhah hian he Mizoramah hian kan la chengho leh dawn tih hriat a tha khawp mai. Kan thiltih leh kan khawsak dan hi mi tam takin an hrereng lo maithei a, mahse mi ṭhenkhat chuan an la hrereng dawn a. Chu kan thiltih leh kan awmdan chu engtikah emaw miin an la rawn sawi chhuak ang a, min la hriatrengsak dawn tih hre tlang ila a tha khawp mai. Tlin tuma bei ta fam chuan tlin chu kan duh hlawm ngei mai, mahse a lutuk hian mi rilru a tithlep a, mi kan hip dawn emaw kan tih hian kan lo hnar zawk reng thei thin.

Campaigner ṭhahnemngai leh hleihluak tak tak te hi mi thenkhat chuan an lawm viau a, keimahni min tan an nih phei chuan thawh hlawk hle pawhin kan hre fo; mahse mi tam tak hnartu leh tituilotu chu hetiang campaigner uchuak leh hleihluak te hi an ni zawk fo tih hriat a tha. Thenkhat phei chuan dawt lehlang te te hi an tuipui a, miin awih mai turin an ring thin.

Kan hringnunah hian vawi tam tak chu a lehpek awm lovin kan chhe vek dawn a ngaih chang kan nei fo thin a. A chang leh kan thatpui kumkhua dawn emaw tih kan nei bawk thin. Mahse chutiang chu ni lovin a tawpna emaw kan tih piahah hian awm dang a lo la awm fo thin a. Chumi hrereng chuan kan inthlanpui pawh hi hmachhawn thei ila a duhawm ngawt mai.