MIZO LEH A DANGTE

Inthlan a hnai tulh tulh a, thu leh hla a tam ve tulh tulh a, boruak pumpui a that viau laiin engemawti zawng chuan boruak a dang angreng viau mai.

Tunhmaa kan la hriat ngai chiah loh, BJP thawm a lo lang nasa ta deuhva. Kan sakhua leh kan hnamzia (culture) nena inhnaih thei thil a nih avang hian BJP chungchang hi ngaihtuah tham fe a awmin a lang. Hinduism vs Christianity tih ang deuh a nih theihna lai a awm a. Pawisa te, hmasawnna te hi hlu tehmeuh mah se kan sakhuana atanga thlir a pawl him lo deuh hi chu a awm thei mai awm mang e a tih theih. Thil a kal sual palh emaw, a kal tluan luattuk emaw chuan kan harh chhuah hunah chuan namsawn leh theih tawh loh kalphung nen a lo inkhawkherh nghet tlat tawh thei. A tirah chuan Congress kha ‘vaipawl’ ti ang deuh khan kan sawi a. ‘Engmah a danglam lo,’ an ti a. Mahse Coconut sawhkeh te, chal hnawihsen te a lo lang chho ta zel a. Ram hruaituten an tih a, an tih zel chuan a tihngaihna tak a awm chiah lo.

NGO Coordination Committee chuan, ‘Chakma candidate dah loh ni se,’ tiin a rel a. Party thenkhat chuan an dah lui ta nghauh nghauh mai a. Kan Party thiltih a nih chuan Party mi leh sa ni laklawh tawh chuan kan hre lo nge, kan haider nge, kan hnualsuat phal ta lo niin a lang a. Kan hnam vengtu leh kengtu, kan NGO te thu pawh kan zawm thei ta lova. Kan Political Party te vengtu tur hi Mizovin kan nei thei ang nge thei lovang tih hi zawhna lianpui a ni. A landanah chuan NGO Coordination Committee thu hi chu zawm tur a ni a, MPF thu pawh zawm ngei tur ni awm tak a ni a. Chung zawm duh lotute chu a zawm duh an awm chhung chuan hnawl mai awm tak an ni. Kan hmelhriat pakhat chuan, ‘Vote ka lo tum ran ran a, Chakma candidate an dah tih ka hriat chiah khan ka vote tum ka thulh,’ a ti a. Hetiang hian a ngentu NGO Coordination Committee hruaitute pawh hian tlang tak leh chiang takin puang ngam tal sela chu an ngenna hi a zahawmin a sawt lehzual ngei ang. Chakma bial a MLA neih chak ngawih ngawih Political Party te tan he ngenna hi zawm a harsat turzia hre chunga hetiang ngenna siam chuan an zahawmna hum tum vang chauh pawhin an thurel leh an ngenna hi tungding hram hram thei se a thain a rinawm. Kan YMA ve lai khan mitthi sawngbawlna kawnga thlalak leh pangpar dah chungchangah hian YMA-in ngenna kan siam a, vawiin thleng hian ka theih chin chinah chuan tihpuitlin ka phak tawkin ka la tum a. Mimal tak pawhin hawihhawm lo chan ka chan phah fovin ka ring. Mahse mahni telna pawl leh mimal zahawmna chungchang ngaihtuahin ka tawrh ve tur ni maiah ka ngai.

Tuikuk te, Chakma te hi an vote chu a itawm khawp mai, mahse hnam himna a khawih chinah te, ram himna a khawih chinah te chuan tih duh loh chin hi neih ve turah ka ngai. Tuikuk leh Chakma MLA nei mah ila Mizoram hmundanga MLA neih tam si loh chuan sorkarna a siam theih tak tak loh. Hmanni lawkah tangdun ngei ngei tura inngai sa te pawh an tangdun leh miah lova, tute tawngkam emaw ang maiin chungu nung chung buk tum ang tlat an nih avang te, pawisain an chungah ro a rel nasat em avang tein anni hi chu kan ta emaw kan tih pawh hi kan ta an ni meuh em tih thuah a chiang lo lehzual. Chuvangin hnam damna tibawrhbang khawpa anni tlawn emaw, vawnbeh tum emaw, anmahni hmanga rorelna lalthutthleng chan tum emaw pawh hi a fuhin ka ring lo. NGO Coordination Committee ten hnam himna ngaihtuah a ngenna an siam ngai pawimawh thei hauh lo khawpa politics chhiarkawp chawk thin te hi YMA member rinawm tak zingah engzah nge la vote zui duh cheu awm ang? I lo thlir ang!

Tunhnaia kan CEO mak zet mai kan buaipui dan a lawmawm a. Chutihlai chuan ama awmdan lam ka ngaihtuah chuan pa remhre tak niin ka hre ve thei lo. A bul berah mahni aia Service a Senior te a zah lohdan em em kha mak ka ti phawt a. A dawtah chuan Civil Service cadre sang bera awmin inthlan thila mite thinlung chawh thawh a awlzia te, inthlan buatsaih chuan mipui leh tlawmngai pawlte tel lova a tih theih lohzia te, inthlan chungchanga Mizoram kan hmingthat vezia te hre hauh lo ni awm tak a thil a ti vel kha a mak a. Mawhphurhna sang tak chelh turin mi vengva vak lo an rawn tir a ni mai awm mang e tih te ka ngaihtuah. Officer lianpui hian thil hriat loh tlat hi an nei ve thei hle a ni tih hre vein ka inhria a. A service record lamah pen tui senin engmah inziak lo pawh ni se a hringnun record lamah chuan engemaw a inziak tlat tawh dawn a. A upat hnuah phei chuan a nilum ai lai te pawh a zak ve viauvin a inchhir ve viau maithei. A tirtu lam pawhin Mizoram chawhbuai tumna rilru nena an rawn tir a nih lohva, inthlanna felfai tak buatsaihna rilru nena an rawn tir a nih chuan tisual an inti ve viau awm mang e ka ti.