BAMBOO LINK ROAD - NGHAHHLELHAWM NGE HUPHURHAWM?

Sorkar laipui atangin Bamboo Link Road laihna tur pawisa tam tak mai a lo kal ni awm tak a ni a. Tunhma ang kha chu ni se sorkar laipuiin hetianga Mizoram tana thil tha tihna tura pawisa tam tak mai a rawn pe hi lawmawm tak leh thlamuanthlak tak tur a ni a. Mahse tunhnuah chuan a chuti ta mai lo deuh em aw? a tih theih ta tlat mai.

A thim lam zawng leh a chhe zawngin kan hotute hi kan thlir ngawr ngawr bik lova, thil kal tawh leh thil awm tawh atangin kan rilru hi a insiam ve bawk a ni. Sorkar kan tih, sorkarna kengtute khawsak dan hian mipui rilru a siam theih thin avangin sorkar chu fimkhur takin a kal tur a ni a, kawng tinrengah mipui pawm theih zawngin hma lak a tum tur ni awm tak a nia. Mahse tunhnu hian mipui zahderna tel lova thiltih eng eng emaw kan hmu ta nualin a lang a. Heng te hian pawisa tam tak lo kal tur hi rinhlelhna mitmeng nen min thlirtir ta a ni.

Tunhnaia langsar tak mai chu Skywalk leh Ropeway siamna tur pawisa tam tak mai engemaw ti ti a zuzi ang deuhva lang ta tlat hi a ni a. A chhuitu lamin an chhui mek a, thubuai a awm mek te pawh a tih theih ang chu. He thil hi a mak riauva, a siam a hmain pawisa awm zawng zawng kan pe vek chu sawi loh, a bak thleng pawhin kan han pe chhuak mauh mai a. A pek chhuah lam chu lo pe chhuak ta pawh ni ila a buaithlak lai tak chu a siamtu turte chu ui puar koh ang maia an reh zui ta daih ber mai lai tak hi a ni. Dan lo ang ni ngeia hriatin pawisa an la lawk chiam a, an thawh tur an thawk chhunzawm leh bawk si lova. A tuartu Mizoram mipui chu kan awm a nuam ta lo a ni.

Hetiang ni ve chiah lo hian NABARD atangin sikul sak thatna tur pawisa tam tak kan puk a, mahse kan hmandan chu a duhdahin a rinhlelhawm leh em em lawi si a. A puka kan puk pawh sorkar pawisa anga a kal tawh chuan heti hian kan ti duhin kan ti ngam a, puk ni lo, sorkar laipui atanga kan dawn chu engtiang takin nge kan chin leh ngam ang tih ngaihtuah nachang hre tan chuan ngaihtha taka awm chu harsa ve tak a ni.

Hmanah, kum 2010 bawra mautam a lo thlen khan thatpui tham leh din chhuahpui tham pawisa, Baffacos kan tih hmang khan kan hmu tawh a. Mahse kha thil kha a pawisa a tam tehreng nen thatpui nana hmang ta lo chuan a zuzi zo ta vek ti ila kan tisual lovang. Han hmang dik ila kan thatpui dawn tehreng nen khan kan hmang dik ta miau lova, kan hnemhnanpui ta lova. Chu mai ni lovin mi leh sa inrinhlelh nan te, inhmuh tleu zui nan te kan hmang a ni hrim mai a. Pawisa hi a awm thur thur a, a hman dan kan uluk loh phawt chuan sorkar kan rinna tiderthawngtuah a tang ngei ngei tih hi chu thudik awmsa a ni. Pawisa a tam poh leh kan inhmu tleu nasa ting mai.

Tunah hian Bamboo Link Road tih hmingin pawisa kan hmu leh dawn chu ni awm tak a ni a. Pawisa a tam si a, kan hman dik loh chuan mipui rilru tihrehawmtu leh a zar zo ve loten sorkar kan hmuh nikhua loh phahna tur a ni dawn a. Kan rilru hriselna tur lam ngaihtuah chuan he pawisa hi chuti takin a thlakhlelhawm lo thei rum rum mai. Pawisa tam si, hman fimkhur si loh chu pawi tak a ni thei. 'Restricted Tender' tih te hi kan tih zawng tak a ni ta mai a. Dil hma hauh atanga hmu tur inhriat lawk sa theih Tender te hi chu hman fuh harsa ve tak tur a ni.

Sorkar hian thil mak tak tak a ti thin a, thawnthu aia mak hi a takah a thleng thin an tih ang maiin kum 2007 vela khaw rauhsan (hming hmerhin Builum) te pawh kum 2016-ah a panna tur kawng cheng nuai tam tak sengin sorkarin a lai thei tlat mai a. Mak ve tak a ni. A mak nachhan pawh Builum chu Serlui tuikhuahin a chim chhiat avanga sawn tura tih, sorkarin an insawnna tur pawh a ruahmanpui vek an ni a, chuta a insawn ve duh lo mi tlemte tan chuan cheng nuai tam tak sengin kawng a lai leh lawi si a. Thlirna hrang hrang atanga han thlir hian a dik thei lo vel vek a ni.

Kan sorkar hian thil mak angreng tak, mi pangngai tana han tih ngam miah loh tur hi a ti leh mai thin a. In hlui thiah nan a sakna man aia tam mah tur cheng nuai 62 te a hmang ngam a, Tuirial Hydel Project-ah mi 48-in compensation dawng thei tura tih kha mi sangkhat aia tamah kan chantir ngam a, Govt. Complex a zangnadawmna pek vek tawh hnua mimal hnena neih lettir leh te, Zo Carbon te, police mawza bun khat cheng 1600 a lei te, Ek-In kal thei sawmhnih zet lei a, pakhatmah hman tangkai leh si loh te pawh he Mizoram sorkar hian a hlen chhuak ngam vek a ni.

PMGSY pawisa tam tak mai a awm lai khan kawng laih tawh sa, hmai phih fai thuak thuak te kha kawng thar laih angin pawisa lak nan kan han hmang a, khang khan kan rilru lam hi thui tak mai a eichhia a, ngun taka ngaihtuah chuan fimkhur lo taka pawisa hman tur tam tak neih ai chuan nei lo law law ila tih hi a ngaihtuah theih viau a ni. Heng avang hian kan ram hruaitu thenkhat leh Engineer thenkhat te chu pawisa hman sen loh neiin an awm phah hial a. Anmahni mimal chu an awhawm chuang lovin an tih ang ti thei dinhmunah hian dingin ti ve duh chuang lo mah ila kan Mizoram hian a tuar a. Mirethei apiangin heng dik lohna leh rinawm lohna hi an tuar nasa.

Bamboo Link Road pawh hi a saptawng takin a logistic lam hi buaipui a ngai khawp mai. Khawilaiah tak nge kan laih dawn a, chu chuan eng tiang takin nge mipui tan hamthatna a thlen ang tih te leh a nghawng chhuah tur dang te hi chhut ngun viau a ngaih laiin a 'restricted tender' lai bawrah hian kan thamral leh mai ang tih hlauhawm tak a ni. Mau chinna tur ram tha chhun turin kawng kan lai phawt ang a, mau kan ching chhunzawm dawn nge mau hmun awmsa su pawp zawngin kan khawsa dawn? Brandisii lam nge kan hawi dawn rawmi lam? Mautak nge kan tinzawn ang a, a Minister bial a zawngin kan kal dawn em ni? Thil kal tawh dan en chuan he Bamboo Link Road laihna tur pawisa hi indem tawn nan te, tu ten emaw thawk lova pawisa hui luh nan te kan hmang mai ang em tih sawi ngam a harsa ta hle mai. Pawisa hi a tam a, kan hman fimkhur loh bawk si chuan a hlawkpuitute hi hlawk angin lang tehmeuh mah se mipui rilru leh dinhmun lam hian a thatpui lo ve thei khawp a. Rilru berin a chhiatpui a, dinhmunin a ziaawm phah chuan bawk si loh chuan eng thil mah hi a hlu tak tak vak lo.

Thil awmzia han thlir vang vang hian he Bamboo Link Road pawisa awm hi nghahhlelh tur nge huphurh tur tih hriat a harsa viau.