MLA TE U

He thu hi result pa­khat­mah chhiar hmaa ziah a ni. Chhiartuten in chhiar chuan result a lo chhuak hman tawh ang. He thu ziah lai hian tunge tling a, tunge tling lo pakhatmah a la hriat hman loh avangin awn lam neiin he thu hi a ziah ngam loh tih ka sawi hmasa duh bawk.

Aia fel leh dinhmun sang zawka khawvelin a ngaih te hnena thurawn angreng, anmahni remtihna la hmasa hauh lova sawitu nih hi nawmna lai tak chu awm ve thei mahse thil zahthlak tak a ni thei bawk tih hre chungin he thu hi ka ziak a, mahse tun ang tluka a chhiar fuhten an ei theih hun hi a awm lovang a, chutihlai vek chuan hlauthawng taka awm, tling ta thut thenkhat chuan he thu hi an chhiar lo tawp ang a, chhiar pawh ni se an ngaisang lo hle ang tih te pawh ka ngaihtuah ve fe mai.

Mizoramin MLA tam tak kan lo nei tawh a, chung zinga thenkhat chu an lo tlin dan leh an hun chhunga an awmdan te hriatreng loh tha zawk te pawh an awm ang. Thenkhat thung chu langsar tehchiam si lova ram tana ding tlat an awm bawk. A fel lote fel lohna kan tarlang ngam lo te, a fel te felna kan puangzar tawk thiam lo te hi duhthusam a ni lo ve ve. A dik pawh chawimawi ngam lo, a dik lo pawh sawi tha ngam lova awm hi thil tha lo zuah bukna hmanrua a ni. Chuvangin in awmdan a lo tha lo a nih chuan puanzar theih in ni tih hrereng phawt ula a tha ang e. In lo fel ta viau a nih chuan chawimawiin fak thiam che u ila mipuiin kan tihtur kan ti a ni ve ang.

In tihtur hmasa ber chu mipui nawlpui laka rinawm a ni tih in hre ngei ang. In awmna pawl member chauhvin thlang ni che u sela in tling awzawng lovang. Thil awm thei lo pui kha awm anga ngaiin in pawlte hlang hlak thlan tlin pawh lo ni tehreng ula in tlinna bial bakah Mizoram mipui aiawh in ni tho thova, chuvang a zahawm chu in ni. Mipui thlan nih hi hlu tak a ni a, khawvelin a ngaisang a, in dinhmun a hniam thei lo. In hlut avang leh in dinhmun a san avang tak hian in mawhphurhna pawh a sang a ni. MLA thenkhat, in lian tak sa a, anmahni laina te eng eng emaw an tihsak tih bak chu engmah anmahni hriatrengna tur awm lo an awm tawh thin, chung mite ngaihsan chu kan ba zui hauh lo. Mipui aiawh in ni a, kan ai chu awh te u - kan thatna turin.

Thawnthu pakhat sawi ka duh a. Tlangval fel tak, hmeithai fa, theihtawpa bei a, ‘police’ a tan ve tum a awm a. Police a tan ve tumin a insawizawi a, a chawr chhuahna Mizo sikul hlir a nih avangin harsa takin a inzir a. Police tur chuan a intlar ve a. Sang zawnga zuan an tih leh an tiam chin a zo em em a, thui tak tlan an tih leh a thleng hmasa ber pathum zingah a tel a, thui zawng zuan an tih leh a zuang thui pawl a ni a, written exam an tih te pawh a paltlang vek a. Mahse ‘personal’ an tihah chuan a nu leh pa hming te an zawt a, an awmna khua te an zawt a, an chhawk ta mai a. A hnuah a tling te hmel a’n hmuh chuan a lungawi thei lo. ‘He mite pawl hi chu ka damchhungin ka vote tawh lovang,’ a ti. Engtikahmah a rilru na a reh tawh lovang.

Dikna nena ro in rel loh chuan mi beidawng an awm thin a, chung mi beidawngte hmel chu in tawngtai chang a in biak thin Pathian tho khan a hmuh reng ka ring thin. Kan sakhaw vawn lai mek nena inkalh tlat ni a lang BJP pawla tel kan thian pakhat thu min hrilh chu maw, ‘Kristian kan inti a, kan rorelnaah Kristian sakhaw duhdan ang hi a awm si lova, eng vangin nge BJP hi ka rin zawk mai lohvang?’ a ti asin. Hemi chungchang hi thui tak sawi tur a awm nain kan rorelnaah Krista hmel lang si lovin kan sakhua leh kohhran te kan tlawhchhan a, mahse kan nunah hmuh tur a awm si lova, mi an beidawng a nih hi. Duhsak zawng in neih chu a thiang, mihring in ni miauva, mahse dik lo chiang bal chunga mahni inhaivur leh hleih nei ko bur maia rorelna chuan mi dik leh mi tha tuemaw a tina ngei ngei ziah. In duhsakna chu ang leh ang khaikhinna kawngah te, khaikhin awm tak (compatible radius) khaikhinnaah te chauh in hmang thei a, âwm lo khân lutuk (incompatible radius) thilah te in hman chuan a dik lovang.

MLA Fund cheng nuai za kum tin in nei dawn a. In hmanna hi kan hriat ve a thiang a, kan hre duh bawk. Unit tihlawm nan vel mai maia in tlak ral vek emaw, in hmanna hriat theih lohva in chawk kual vel emaw a nih chuan a tha lo hle a ni. Kan duh hun hunah in MLA Fund hmanna hi kan hai chhuak thei a, in hmandan a mumal loh phei chuan thubuai kan thehlut thei bawk. MLA dik leh rinawm tan chuan he thu hi thu chuangtlai leh invauna tul lo zet a ni thei, mahse MLA thenkhat hi chu a hrilh a hrilh chawrh chawrh bakah hei aia vauna awmkhauh mai bakah tih tak taka enzui ngai te pawh in awm thei. Hai chhuah peih hun huna mualpho thei MLA engemawzat chu an awm. Heng pawisain a thawh tur dik a thawh loh vanga mipuite tawrhna hi nasa tak a ni. He in MLA Fund hi mipui pawisa a ni a, a hmanna tur thuah in remruatpuina hnuaia hman tur tihna mai a ni zawk. In nawm in maka in duh duh dana in hman tur a ni reng reng lo. Thenkhatin MLA Fund an hmandan hi chu midangte pun a, enho tura sawm a, ‘Lo kal ula min sunpui r’u’ tih tlak khawp hiala ningnel a ni tih kan hria. Chutiang chuan ti ve lul lo turin kan ngen a che u.

MLA ni tura in beihna kawnga in sum leh pai senso rulhna tur ngaihtuahpui turin min sawm hauh suh ula, min beisei bawk hek suh u. Pawisa tam tak hmang turin danin a phalsak lo che u a, in tlin duh luatah nangmahni thua hmang in ni. Campaign nana pawisa hmang vak turin mipuiin kan phut lui reng reng lo che u a, tute emaw, mi mawl pamham si thenkhatin an dil che u avanga in pek kha chu in mihring chak lohna thil a ni. Pawisa hmang tam lo tura ngen chitin renga ngen in ni a, khuahkhirh chitin renga khuahkhirh in ni bawk a, chuti chunga in senso luih hram hram chu mipui pawisa aṭanga rulhtir tum chu a kawngkal lo hle a ni.

A tu a te pawh lo Ruling in a tu a te pawh lo Opposition ula, in thuthmun theuhvah Mizoram tan ngaihtuah a, inpe turin kan ngen duh che u. Opposition nih vanga Ruling thiltih zawng zawng sawisel tum vek hi a ngaihthlak a ninawm a. Ruling lam nih vanga thil awm lo tak pawh sawi mam tum tlat te hi a ngaihthlak a ninawm khawp mai. House leader laka tlaktlum tuma a thawk a phita hmaichhana infak chiam chiam pawh hotute laka tlaktlum tumna hmanraw ngaihsanawm lo tak leh inbawlna hmanrua mai a ni bawk.

Thenkhat chu ram rawngbawl duhna tak tak nen in lo pen chhuak a, thinlung takin he Mizoram tan hian in ding chhuak a, in zahawmin in huaisen a, in ngaihsanawm khawp mai. Thenkhat erawhchu chutiang in ni lem lo. Tlin theihna tura in hmanraw hman duh kan han en hian in zahawm tawh lova, in rinawm hian kan ring thei lo sa che u. Chuti chung chung chuan he Mizoramah hian vote thlaktu tam tak chuan beiseina nen vote kan thlak a, mahni inhaivur tum thlang lovin Mizoram tana thawktu kan thlang tih min hriatrengsak dawn nia.

‘Aw ka ram, Mizoram......Hei lo hi ram dang kan nei lo.....’ han tih dek dek tawh chuan hnukulh ta mai te, kan ram thatna a nih dawn chuan ‘Ka vawk ka thawh,’ ti mai thei khawpa beiseina nei sang te kan la awm a. Mizoram chhanna turah chuan, ‘Mama, va thawk chhuak ve la, i lo boral ta a nih pawhin ram tan i nun i hlan tihna a ni dawn asin,’ ti a fate thlah liam thei te an la awm a. Thildang tam tak karah chung mite mitthla reng chuan ro hi rel ula, mipuite hi min phatsan hlek lo teh u!