INTHLAN SULHNU

Inthlan chungchang sawiin hun kan hmang rei ta viau mai. Dik tak chuan inthlan hi a pawimawh avang leh a boruak a len em avang te, theih ang tawk tawk a ram rawngbawlna ngaihtuah a hemi chung­chang ziah hi a pawi­mawh ka tih avangin ka ziak uar a ni.

Inthlan dawn te, inthlan lai te, inthlan zawh hnu tea kan nungchang hian kan rilru thui tak a tarlang a. Kan inthlan nungchang hi siam dik thei hlauh ila chu kan ram hmasawnna hi kawng chanve deuhthaw kan zawh ni te pawhin a hriat theih ang.

Khaw chhak lam khaw pakhat, Sazepah chuan pawl pakhat chuan inthlan zawh khan inthlan senso atana Candidate-in pawisa a pek chu hmang zo lovin an hman bang cheng 6,000/- chu an pe kir leh tih thu Whatsapp lamah a lo lang a. A ngaihthlak a nuamin a lawmawm ngang mai. Heti thak thak hi chu ni ila inthlannaa tel ve te pawh a zuamawm theiin a phurawm lehzual mahna. He mite thlan chhuah hi tling ta se, tha taka ram rawngbawl chu a phurawmin a awl lehzual hlein a rinawm. He thu hi a chhuanawm thu ka’n sawi chhuak a, Thenzawl lama kan nau Lala chuan, ‘Keini pawh inthlan hmasak te khan cheng 30,000/- kan pe kir leh alawm,’ a lo ti sam et a. Kan hmuh leh hriat phak lohvah hian mi rinawm leh rintlak engzat tak awm ang maw.

Kan hriat ṭheuh angin inthlanna senso tam nachhan chu Party worker-ten Candidate te sum renchemsak chu a sawia sawi ngam loh, an sihhnip hun lai, inhnial buai a buaithlak lai tak maia sum thamsak an tum tlat hi a ni pakhat a. Inthlan hmasak khan khaw pakhata Party worker chuan inthlan zawh hnuah car a lei thei tih thu te an sawi a. A candidate chu ka khawngaih ngawt mai. A tling zo lo ta lehnghal a. Chutiang mi hrep chu min ṭanpuitu tura rawn inpe a ni ang tih ka hlauh zawng tak a ni. Hetiang mi, Unit leh Block level vela hruaitu pamham zual ṭhenkhat hi awm ta lo se chu kan Mizoram inthlan hi a zangkhai sawt ang a, a thianghlim sawt ang a, kan mi thlan chhuah te hian mipui min zah sawt ang a, kan ramin hma a sawn phah ngei bawk ang. Ṭanpui tum anga insawi reng chunga rawk duhna rilru pu reng si te hian kan inthlan hi an tibawrhbang ngawt mai.

Inthlana senso tam tak hi chu Party Worker te, Unit Hruaitu te, Block hruaituten an eiruk ral a ni. Veivahna atana mamawh petrol intumsak te, patling tha ṭhulha vak chhuakte hnena a Daily Rate ang zawnga lawmman insiamsak fel mai te, lirthei nei ve lote hnena an veivahna atana motor chuan man inpek te hi chu a ṭulna chin pawh a awm a. Heng hi chu eiruk ral ni lovin inthlanna senso a ni. I vote hmuhna turin tu pa emaw, hnathawh tur tul tak tak nei, a then phei chu khawsa thei bik lem lo tak, anmahni sensova i tana vak chhuak a, khaw danga kal tur chuan i beisei ngawt thei lovang. Inhawt phur nana han inhmuh khawm a, thingpui han inho leh chawhlui han kilho satliah te pawh a ṭulna chin a awm. Mahse duh hun huna ui talh a, vawk vuak thluk a, ‘A senso heti zat’ ti a sing chuang chuang bill nghek nghek hi erawhchu inthlan senso titamtu manganthlak tak a ni. Dik tak chuan a eitu tam ang huin heng hian vote a ko haw tak tak chiah lo. Inthlan hmasa lamah khan candidate pakhat chuan, ‘Vawk sawmli ka talh,’ a ti.

Mi ṭhenkhat (Unit leh Block lama mi te) chuan zawi ang sep sawpin, ‘Pawisa chu awm se sawlai mite saw....’ an han ti a. Candidate tan hnial a remchan tawh loh avangin an hnen aṭangin pawisa an tham chhuak a. Chutiang thil thianghlim lo chu Unit leh Block vel hruaituho thenkhat tih thindan a ni. Hmun thenkhatah chuan pawisa hmachhuan candidate ten chutianga ti tur chuan an lo sihhmuh pawh a ni ve mai thei bawk a. Chutia an pawisa tham chhuah chu eng atan tak nge an hman inzawh leh chu thil remchang lo tak a ni tawh a. Candidate ṭhenkhat, an hausakna hriat phak loh, khawilam pawisa nge an neih tih pawh hriat lohva nei em em tan chutianga tih chu tihdan phung pangngai te pawh a ni hial ang a. Mahse chutianga pawisa ren lo Candidate reng reng chu a tlangpuiin thuneihna an chan chuan ar vena ven pawha an MLA Fund hman tangkai hleih theih loh chi an ni deuh vek ang.

Ṭhenkhat chuan pawisa an nei a, an nei em em tih hai rual a ni lo. Chung mi thenkhat chuan tlinna tur a nih chuan zah leh pawisak nei hauh lovin pawisa an seng a. A pawi angreng viau mai. Chung mite khawsak dan chuan inthlan leh huna kan awmdan tur a hril miau avangin an pawisa hmachhuan thiltih hi a pawi viau. Neih vanga hetia pawisa hmachhuan ringawt maia invawrh tlin tum te hian kan inthlan kalphung nasa takin an tichhia a. Mamawh thianghlim inphuhruksak chin a inthlan te chuti taka a hautak loh laiin a mawi lo leh a thianghlim chiah lo hian inthlan a tihautak a ni.

Candidate thenkhat, manto tak tak a midang chibai ching an awm bawk a. Heng mite findan pawh hi ngaihsan a harsa khawp mai. Vote neitu hnena a hring a hrana pawisa fai pekna chi reng reng hi chu a ngaihsanawm lo vek a, a Kristian zia lo hle bawk. Chutianga mimal hnena pawisa pe a, tling leh ta si lo te chu khawngaih pawh an buaithlak khawp mai. Khawngaih tum loh law law mai a hahdamthlak zawkin a lang.

Mi tlawmngai leh mi dik tam tak awm karah mi dik lo thenkhat hian kan inthlan hmel an tihbalh laiin chanchin ngaihnawm leh Mizo tana inchhuanna tur tam tak he Mizoramah hian a awm. Mission venga pawl pakhat chuan an inthlan zawh a tlin lawm nan thingpui lumna te an mamawh em tiin an candidate-in a zawt a, ‘E, thingpui in khawmna tur chu kan nei e,’ an ti thei a. Mission veng paho nge nge, an lo Mission veng leh thin. Hetiang hi chu ni hlawm ila chu Mizo hmel hi a tha lehzual tur hi a nia.

Mi tlawmngai, an pawlin kawng dik zawh a, mipuite changkanna tur an thawh chhuah theih rin avanga mahni sensova theihtawp chhuahtute an ngaihsanawm em em a. Chutiang mi te chuan kan Mizoram hi an chawimawi a, Party leh Candidate tan pawh chung mite chu mi zahawm an ni. Eng pawla mi pawh mi dik leh rinawm hi chu an zahawm reng mai. Chutih laiin mi pamham leh dik lote avangin kan inthlan hi a hautakin a hahthlak a. Chu chuan inthlan zawh hnuah hlemhletna a hring bawk.

Tlinna tur atana midang hnena intiam nasa te, sum leh pai seng tam te, therhlo sem peih deuh deuh te hi inthlan zawh hnua nihna an neih hian mi hlauhawm an ni zelin kei chuan ka ring a. Mihring mizia leh mihring kalphung thlir pawhin chu chu a dik tlangpuiin ka ring.