MIPUI TANA THAWKTU TURTE

Central YMA ruang phurhna motor te, Guwahati Mizo Welfare Motor te, Damdawiin motor thenkhat te hi chu Mizorama hna rawn thawk company leh Mizorama sumdawnna nei thenkhat tihsak a ni a. Khawi khawi laiah emaw hian kan State chhunga hnathawktu company te hian mipui vantlang tan thil tha tak tak an tihsak a. Thenkhat chuan sikulah Computer te an pe a, a thenin thildang an tihsak bawk a. A lawmawmin Mizoram tan thil tha tak a ni. Hindustan Petroleum Corporation Limited (HPCL) hian Mizorama bu an khuarna a la rei loh ang hu aiin thil an ti tam viauin a lang a. An fakawmin an chhuanawm khawp mai. Kan awmna vengah ngei pawh hian Community Centre tha tak mai kan neih phah a, cheng nuai sawm dawn lai sengin he thil hi min siamsak a. A lawmawm hle.

Mipui aṭanga sum la lut company te hian CSR an tih (Corporate Social Responsibility), mipui vantlang tana tha thawh ve tur hian bat an nei a. An hlawkna zaa duli vel emaw ni (0.5 % - a ratio leh pawisa zat vel hi ka hre fuh chiah lo maithei a) vel hi hetianga hman tur hian an dah vek tur a ni. Company a len a, an sum vir vel a tam tham tawh chinah chuan he pawisa hi chhenfakawm tham tak a lo ni a. He CSR atan hian sum an theh chhuak lo a nih chuan hetianga mipui sum hmanga sumdawngte hian an tihtur ang an ti lo a ni. An hlawkna aṭanga chhuta pawisa tlemte anga lang si, mahse mipui tana han hman chuan vantlang tana chhenfakawm tak chu mipui tan company te hian hmang ve turin an intiam a ni. Chutiang

aṭang chuan kan Ambulance Motor thenkhat te hi chu kan nei thei a lo ni reng mai.

State Bank of India hian hemi kawngah hian tha a thawh tha hle bawk a. Hmun tam takah sulhnu an nei a, a lawmawm hle. Kan State sorkar pawisa a indaih lova, hmun tinah daih lo hlir mai a ni a. Khawtlang tihchangkan kawnga thahnemngai leh duhthawh deuh te chu pawisa indaih lohna hian a hrek ngawih ngawih a. Zirtirtu thenkhat te phei chu mahni thawh hlawh ngawih ngawih pawh la thei lovin thla engemawzat an awm reng reng a. Chutihlaia sorkar pawisa ni lo, pawl emaw, mipui vantlang emaw mamawh phuhrukna tur lo awm hi a vanneihthlak takzet thin.

CSR a sulhnu nei ngei tura rin, mahse nei mang hlek lo hi Mizoramah an awm ang em? BSNL te ang te hi mipuiin kan dawr nasat a, mipui hnen aṭanga pawisa an dawn tam tehreng nen hian an CSR sulhnu hi hmuh tur a vang viauin ka hria a. Heti khawpa mipui pawisa dawng khawmtute hian khawtlang laka an mawhphurh vena (CSR) hi an hlen chhuak fumfe lo a nih chuan a zialo khawp ang. Mizorama Telephone lama Service provider dang, Airtel te, Aircel te, Vodafone te pawh hian engnge an tih ve le? Subscriber an ngah angzia a zir zelin vantlang tan engemaw an ti ve tur ni ngeia a lan laiin thil tenau tham te te (Nihliap leh anmahni in-advertise-na vel) -ah chauh an hming kan hmu thinin a lang a. Hei hi chu State mipui kan bengvar loh vang nge mipui min zah loh vang nge engnge hriat a ni chiah lo. An tih awm tawk chu an ti lo ngei niin a lang. Mizote hi mobile lawm hnam, top-up ti reng mai kan nih lai hian kan company te erawh chuan kan pawisa chiah an la a, a lehlamah an tih ve tur an ti lo ta mai a, a ngaihtuahtu leh a ngaihventu tumah kan awm mumal loh avangin an tlat tlatin an tla ta mai em ni ang?

Hetianga company an rawn luh hian emaw, hmun dangah emaw pawh mipui hnen aṭanga hlawkna hmuhna tham khawpa mipui hnen aṭanga pawisa an hmuh dawn phawt chuan company te hian he CSR hi an ngaihven tur a ni a, mipui hamthatna an ngaihtuah tur a ni. Chutih laiin a mipui lam pawhin kan zarin kan bengvar ve tur a ni bawk.

Zep nak emaw, eng zirlai pawl pawlin emaw tihluihna deuh reuhin company hrang hrang hnenah hian puanhnuai thilin pawisa an dil thin a. Heng hi CSR anga an chhiar tel mai a nih phei chuan a zialo hle ang. Pawl hrang hrang pawh hian hetia tihluihna angrenga Mizorama thil an khawn hian nghawng tha lo tak a nei thei tih hriain hetianga dan lo anga mi thil dil mai mai hi sim se a tha khawp ang. Mipui tan eng chiah nge an thawh tih hriat lem loh pawlin an pawl leh an hruaitute invulh vel nana vauna angreng nena thil khawn hi an sim loh chuan mipuiin kan hamthatna tur ang kan hmuh loh phah thin tih hriat a tha khawp mai.

IOC te, AOC te hi Mizorama an dinna a rei tawh hle a, tunhnai lawka lo awm ve HPCL tih zat hi an ti awm hian ka hre lova. An lo ti ve mumal lo te a nih chuan a zialo khawp ang a. Kan aiawha kan thlan kan ram hruaitute pawhin heng hi ngaihven se a duhawm khawp mai. Sorkarin sum a neih loh laiin kan chanvo ve tur heng company, englai pawha mipui aṭanga sum rut char char te hian mipui laka an tih ve tur an ti lo a nih chuan ngaihven a tha khawp ang.

CSR hi ngaihven a tul khawpin a lang.