PU ZOSIAMA HNUNG KA ZUI VE TUM KHA

Thianpa Ruatan Pu Zosiama Pachuau chanchin a ziak a, ka rilrua ka lo ngaihtuah reuh reuh lai a ni bawk a, a chhunzawmna angrengin ziak ve ila thain ka hria.

Kum 1991 nge 1992 ka hre ta chiah lova, a kum hi ka hre dik lo hulhual pawh a ni thei - Pu Zosiama kaihhruai PAC hnung kan va zui ve tum kha. Khami tuma ka nuih nasatzia kha! Amah Pu Zosiama dam lai khan ziah nachang te lo hria ila tha tur hi a nia.

Chhim lamah kan va kal a, Lawngtlai leh Saiha velah sawn sorkar hmalakna kan va en a. Nimin piah a thianpa Ruata sawi lan, Lawngtlai a an Sericulture hmalakna kha kan va en a. A chowkider a lo awm a, kawngpuiah kan ding a, a thlang lawkah chuan in te tak te hi a awm a. A bulah chuan hmutih kung khat a ding a. A chowkider khan thatho angreng zet khan, ‘Khu khu kan Department in a ni a, khu khu ka enkawl a. A bula hmutih kung khat bak khu thildang a awm lo ka pu, khu zawng khu a ni mai,’ a ti zung zung mai a. Kawngpuiah khan za em emin kan nui bawk bawk mai a. Kan sorkar Department thenkhat hi chu a Officer te hi kawrchung nen kan han infam ve hlau hlau bawk tak nain kan hmalakna chiah hi chu a mak thei ve ngawt mai.

Chumi zawh leh chuan Lawngtlai khaw fem (Aizawl lam hnaih) ah kan ding a, piah deuhva kawng laih chu kan thlir a. Kawngpui atang chuan kawng hi an lai phei raih mai a, chu kawng chu motor a zawh theih mai hmel a pu a, a chhuk chho lutuk pawhin a lang lo. Chumi atana an pawisa senso pawh chu nuai engemawzat a ni tawh a. Sorkar pawisa hman tawhna chu hmuh tur a awm meuh em tih kan en a ni ber ang chu. An hotute chuan an han kawk a, saw saw kan kawng laih chu a ni e an ti a. Pu Zosiama khan, ‘Saw kawng saw khawnge a kal dawn a, engnge a pawh dawn?’ tiin a’n zawt a. Anni chuan, ‘Khawi mah a pawh dawn lova, sawti ringawt saw a nia. Sawti sawn hmuh phak chin bakah sawn tlem a la awm a, chutah chuan a tawp ringawt ang,’ an ti ta mai a. Nakinah pawisa dang lo kal leh se laih chhunzawm zel an tum em tih te, hla deuh hlekah engemaw kawng a kal avanga han thatpuina awm a awm leh awm loh te kan han zawt a. Anni chuan, ‘Chutiang engmah a awm lo, a piah saw chu kham a ni mai a, motor kalna chi a ni tawh lo. A lang chin zawng saw a ni mai,’ an ti ta tlat a. Amah Sudden Muanga te thukhawchang takin a mak thei ngei mai. Khua emaw, hmun engemaw pawh tur nei hauh lovin a inhlawhna lam ngawt ngaihtuahin kawng kha an lo pawngpaw laih ngawt mai a lo nia.

Dokulha Hall sak mek kan tlawh leh a. A ban khur te an lo lai mek a, a ban tur thir te pawh an lo keuh nual tawh a, ban erawh a la ding lova, ban khur pawh an la lai kim hek lo. Chutah anmahni lam chuan, ‘He Hall ami tur furniture lam chu an lei vek tawh a,’ an ti leh ta a. Kan han nui leh nghek mai a! A eng tak nge an lei ang a, khawiah tak nge an dah ang tih pawh kan ngaihven zui lo. ‘An lei tawh ngei a maw? In hresual a ni ang a?’ te kan han ti a. An lei tawh ngei thu min hrilh chiang hle bawk si. Kan Contract Works leh kan khawsak dan hi keini ang tan chuan hriatthiam a lo har hle dawn a nih hi ka ti a. A nuihzatthlakin a rapthlak rawng te pawh a kai deuh rohvin ka hria.

Saiha lamah kan phei leh a, an D.C.Office complex-ah sawn an in sak, rei tak an luah tawh leh an luah mek pakhat chu a ban leh a kalkhang vel chu concrete a ni ve a. Mahse an concrete ban kha vawkpuiin a khel rek nge a nek rek lah hriat ni lo, a rek ngut mai a. A kalkhang te kha a tliah mai hlauvin thingzai inchi li leh inchi thum bial hian an lo do tuk mai a. Tunlai angin Mobile Camera te han kawl ila a thla lak a chakawm hnuhnawh ta ngawt mai. Kha concrete in rel, thingzaia do ngai kha kan concrete ngaihdan nen chuan a dang deuh.

Khami tuma kan chhimlam va zin khan thil nuihzatthlak tak tak kan va hmu tamin kan hre tam a. Sorkar pawisa kan enkawl dan pawh khata tang khan tam tak chu a lang a. Nikhua a rei ta deuhva, kan thil hmuh leh hriat tam tak kha ka theihnghilh then tawh hialin ka ring.

Pu Zosiama kha thinlung taka mi inngaitlawm a ni a. A mihrinna kha ngaihawm ka ti a, a zahawm ka ti. Assembly House te kha a tingaihnawm a, tum khat Speaker tiang a’n lek uaih uaih mai phei kha chu a ropui hi ka ti khawp a. Tih tak takin House-ah chet a thawh thin tih a tichiang a, a thusawi kha a ngaihnawmin a ti tak tak a ni.

Tum khat chu Ngopa lamah kan zinhova, Teikhang leh a chhehvel khua te kan han tlawh a. Khami tum khan a Private Jeep kha a keng ni tlatin ka hria. Naupanghovin an han chuan tak tak chu khawlai an va fang, an lo let leh lamah chuan a ‘body bracket’ zawng zawng kha an rawn kuai tliak mam mat mai a. A manhla ta ngawtin ka hria. Amah lah kha a nui mai mai a. Khami tuma kan haw kha nge ni, Tuirini kam velah hian nuho feh haw tur, hawna tur motor chang an lo awm a. Kawng sir thlam atang khan amah zuitu zawng zawng Officer motor-ah khan an maipawl leh an mai ken tur zawng zawng nen min phurhtir vek a. Ka ngaihsan zawng tak a ni. ‘Hei kan Officer-ho motor-ah hian chuang rawh u,’ a tih thur thur kha ka bengah a la cham reng mai. Minister a nih lai leh a nih loh lai kha amahah danglamna a awm lovin ka hria a. A ngainatawm a ni.

A sawi ka la hriatreng dang pakhat chu, ‘Vairengte a kan awm lai te chuan Bhagha vai te hi chu kan han ngam khawp a. (A hming sawi kha ka hre ta lo) Chumi phei chu Bhagha bazar ni te hian cheng hnih hlawhin vai velh tur te hi a’n zawng ta thin a. Vai va vel teh kan han ti a, amah lah khan, khai aw tih pahin a’n chil phei ta mai thin a. Vai te hi chu ngam tak kan ni,’ tih thu sawiin a nui huk huk thin a. Khang a thil sawi te kha vai a diriam vang leh a huat vang emaw ni lovin Vairengte tlangvalin tunhma atanga vai an ngamzia fiamthua a sawina a ni. Amah kha pa titi thiam leh titi nuamti chi a ni a, a bula awm kha a nuam thei ngawt mai.

Ram hruaitu leh mi challang, hetia an hming ziaka chanchinbua chhuah tur hian ngun takin ka inngaihtuah ve a. Mi tam tak hi chu an chanchin ka ziak lovang. Pu Zosiama khan a hunlai khan Mizoram tan a theih tawk a chhuah ngei niin ka hria a. A hlawh leh a thawh chhuah phu lovin sum leh pai a huikhawm lo bawk.