MIZORAM HUN TAWNG

Mizoramin hun tawng lian tham tak tak kan nei: harhna te, ṭampui te, rambuai te leh he Corona Virus te hi a ni kan ti thei awm e. Harhnain Mizoram a’n nuai tak tak mai te hi a hunlai chuan hun ropui tak a ni a, mahse lawmna lam thil, rinna nena inkaihhnawih, sakhuana thil a ni. A ropui zawnga ngaih tur a ni ang. Chutih laiin ṭampui leh rambuai leh he Virus hlauhna hi chu thil rapthlak lam a ni a. Heng zingah hian he Virus hlauhna hi tun thleng hi chuan a la ziaawm ber rih awm e. Mizoramin thil rapthlak kan tawn tawh zingah finna leh fimkhurna hmanga beih let awlsam ber a nih laiin a hlauhawmna mualah chuan a hlauhawm ber zinga mi a ni kan ti thei bawk ang.

He virus lo awm hun hi mobile phone chhuah hnu, inhriat tawn theihna zawng zawng kan kuta a awm ve hnu a nih bakah, mihring leh mihring indona lam ni lovin hmuh theih loh kan vaia do tlan ngai thil a nih avangin ṭanrual a awl a, inthurual a awl bawk a. Chu chauh ni lovin hriatna leh thiamna tam tak hmangin thil a tih theih tawh a, sorkar laipui ṭanpuina thlenga beisei theih a ni a, a lawmawm ngawt a ni. He virus hi hriatna leh thiamna tel lovin han hmachhawn tehreng ila a rapthlak dawn ngawtin a lang. Khawvel hmun danga thil thleng kan hriat theihna mai bakah damdawi thiamna nen kan inthuam ve a, duh angin hmanrua la nei ṭha lo mah ila Mizoram mipui kan inthurual avangin kan dinhmun pawh a hlauhawm nep tawh hle bawk.

He hripui leng donaah hian a thawkrim leh a hah te an hah hle mai a, dinhmun hlauhawm taka ding chungin hah takin an thawk a, an fakawm ngawt mai. Chhun leh zan sawi lovin an tihtur an ti ngat ngat a, mipui mimirin he hrileng kan kai ve palh hlauh loh nan thiam zawng zawng an thawh a, tih dan tur an hriat zawng zawng an ti a. Chutih laiin rawih ni ve lo, hlawh nei lova tlawmngaih leh thahnemngaih vanga thawk, Local Task Force te an awm leh a, heng mite pawh hian mipui tana ṭha tur ni a an ngaih chu an thiam ang angin an thawkin an duty a. He hrileng donaah hian ban tum hauh lovin an tha leh zung te an seng a, an fakawm a ni. Chumi piah lehah chuan mimal thahnemngai, mahni thahnemngaih vang liau liauva mahni tlin tawka thingpui lo lumtu te, Local Task Force hman tur pawisa thawhtute, mi harsa zawkten an inluah man an harsa ang tih hlauva an inluah man awltirtu te, fuihna leh fakna ṭawngkam lawmawm tak tak theh chhuaktute pawh an la awm. Mi hriat lohva ṭhahnemngai em em a mahni tih theih tawk lo titute hi nge ropui thiamna leh theihna hmanga langsar taka thil titu tih pawh hriatthiam a har. Mi zawng zawng hriat daktor te an langsar a, mahse mi hriat hlawh ve ngai lo lab-technician te an phenah rinawm takin an awm a. Engkim thian faitu hmunphiat mawngzang tak te chu tuma’n kan sawi ngai lo. Tu hi nge fak tur ni a tu hi nge lam chhuah ve loh tur hriat loh khawpin pawimawhna hi a chi a tam a ni. 

A Pathian thu zawnga lo kai a, Pathian kan hnaih theih phahna a nih beisei a Bible chang nena kaikawptute pawh kan la awm cheuva. Thlarau lam damdawi atana hman tum ngar ngar pawh engemawzat kan awm ta ve ang. Zaithiam ṭhenkhatin an aw hmangin mipui awih hlim an tum a, hla pawh a piang hman nual. 

Mi ṭhenkhat, mipui leh midang ngaihtuah hauh lova mahni duhzawng tih theih loh vang ringawta ina awm ning em em te dinhmun te han ngaihtuah hi chuan mipui mamawh leh thil tha tur ngaihtuah a phe vat vat te hi chu an awhawm letling zawk viau. Mahni nawmsakna chauh ngaihtuah a engmah ngaihtuah lova hrehawm titute tan hian a ninawm ber zawk mah thei awm e. Mahse chu ngawt chu khawvel thlirdan a ni si lo.

A pumpui thua Mizoram tanrualna leh kan awmdan han en hian kan changkan tawhzia a lang chiang viauin a hriat theih. Kan do ber leh kan bihruksan tum ber hi hmuh theih leh hmachhawn tak tak hleih theih loh, mahse a awm thei a ni tih kan hriat vek thil a ni mauh mai a, mawl taka hlau lo awm taka mawi lo taka khawsa kan awm mang hauh lo mai te hi lawmawm ve tak a ni. Kan tuar chhuak ṭep tawhin a lang a, vanduaina engemaw takin min tlakbuak zui ta erh a nih loh chuan kan him thei mai dawn te pawhin a lang.

He kan kumhlun lohna khawvelah hian, “Engmah hi thil kumhlun a lo awm lo, i buaina thleng pawh khan kian hun a nei,” an tih angrengin kan hrisel lai ni te a liam ang bawkin kan bawrhsawm hun te, khawvel bawrhsawm hun te hi a liam ngei dawn a. Tuna kan Corona Virus chungchangah ngat phei chuan ni sawm erh awrh dang kan inkharkhip leh theih chuan kan buaina hi fel mai turah te pawh a ngaih theih a. Hetih hun laia buai ber ber leh midang te tana thawk nasa ber ber hi he inkharkhip hun ninawm ti lo ber ber an nih te pawh a rinawm hial zawk. Tihtur dang engmah nei lova inhria leh ti ve thei hauh lova inhria, ṭawngkam ṭha takngial pawh theh chhuah tur nei lo te hi he inkharkhip hun hrehawm ti ber ber kan ni mai awm e.