YMA DAY

YMA Day te kan han hmang leh thin hi chu a va lawmawm tak em aw! Tanpui ngaite tanpuitu pawla tel nih hrim hrim pawh hi nun nawmna tham pakhat a nih avangin YMA lo ding tir kha a thang duangin Mizo zawng zawngin kan pawm kha a ni reng a. Tunhnuah hian YMA Day lo thlen a a buai pawlah leh a thatho pawla han tan leh lek phei chu Mizo nula leh tlangval tan chuan nihlawhthlak tak a ni.

YMA Day a lo thlen a, a liam leh hi chuan mi tam tak tan chuan kum chawhnu lam kan lo hnaih leh ta tihna ang deuh hial a ni thei. Krismas zawh hnu hi chuan YMA Day hi YMA ngainatute tan chuan nghahfak pakhat a ni ve fo thin reng a. Kuminah hmun tam takah YMA Day-ah ruah a'n sur lo khauh mai a, a danglam ve viau te pawh a tih theih ang - YMA Day-ah hian ruah sur chang hi a tam ve em a ni.

Mi tam tak, that lai huna YMA leh a thuthlung lo ngaisang ngar ngar thintu tam tak tan chuan YMA Day hi lunglenna kai chhuaktu a ni thei. Vanglai hun zawng a YMA lo tulpui thin tan chuan nula leh tlangval thatho hmel taka han phusa vel hmuh te hian lunglen ve awm tak a ni. Mahni awmna Branch hrang hranga kan hmandan, hmanlai leh tunlai a lo inang tawh chiah lo ang a, han sawisel tur awm chiah lova khawhar ruk riau te pawh a awm thei ang chu. Khawvel chu heti hi a ni reng a, hunin kan tih thindan te, kan chindan te a liampui a, tihdan thar leh tihdan dang a lo chhuak zel a, kan tih thindan kha chu kan mangtha a ngai fo thin.

YMA Day hlut riauna pakhat chu a lo thlen tikah chuan thalai lam tan intihhlimna te kan han buatsaih a, chutih rual chuan YMA Day-ah chuan vantlang tan eng thil tha emaw tal tih tumna kan han nei a. A chang chuan a hma ni lamah emaw, a ni tak zingkarah emaw tanpuina hnathawh lam kan han tifel a. A ni tak, June ni 15-ah chu intihhlimna hun atana zuah ta Branch tam tak kan awm thin.

Tunlai Aizawl hmun tam taka YMA Day danglamna lian tak pakhat chu tunhma angin zaihona hun a awm ta meuh lova. Kan music system neih that a leiah a awmsa kheuh chhuah mai a awl zawk a. Chu kawng awl zawk chu a zawhtu kan tam ta deuh. Zaiho thenkhat pawhin YMA-in kan sak fo thin ram ngaih hla te kha sa lovin KTP kalkhawmna leh TKP kalkhawmna lama hla an sak fo thin kha emaw, ram ngaih hla ni lem lo, lengzem hla thenkhat an sa ta daih a. A mak angreng viau. Tunhnma kha chuan YMA Day-ah na na na chuan ram ngaih hla kha sak turah kan ngai kha a ni ngai a.

YMA Day a kan thiltih zingah chuan thingphun hi a tlanglawn pawl tak a ni ta a, kan thingphun zawng zawng hi hre kim thei ta ila a tam duh viauin a rinawm. Amaherawhchu enkawl zui lova thamral leh ta hi a tam leh viau thei bawk a. Thing kan phun tam tak hi chu kan phunna tur hmun kan ngaihtuah chiang vak lova, reilote hnua tuten emaw an ram anga an ngaih a, an chil chhiat lehna mai tur hmunah te kan phun a. A then hi chu engtikah mah kan en zui tawh lo hrim hrim bawk a. Kan phun tam ai hian a chawr chhuak leh a nung chhuak a tlem ta thin a ni. Mahse thing kan phun ve hrim hrim kha a lawmawm a, a tha ve phawt mai. Hei aia thaa kan phun theih dan tur chu a phunna hmun tur leh a thing phun tur (a lian chi nge a te chi tih te) lo ngaihtuah lawk ila, chutah kan phun tawh hnu te chu han enzui deuh hram hram ila chu tun ai hian kan tha thawh a hlawk lehzual ang tih chu a hriat sa mai.

Hmun tam takah chuan YMA Day-ah mi harsa puih ngai te kan la pui a, kan YMA zia anga kan ngaih tam tak kha a la bo lova, a lawmawmin chutianga midang tanpuina atana YMA Day hmang­tute thawm thangva chuan thinlung a tilawm thin. Branch tam tak leh Central YMA pawhin he YMA Day denchhen hian tanpuina pawisa fai te pawh an sem chhuak thin a. YMA Day tiropuitu leh tihlutu tak zinga mi a ni.

Kumin July 2022 ral hma hian YMA Branch hrang hrang hnenah an venga mi tlawmngai, tlawmngai nopui, Rokunga Award dawng thei tur te Rokunga Memorial Society hnena thehlut turin ngenna thawn a ni a. Tlawmngaihna chawisang pawl, YMA tan chuan theihtawpa mahni Branch huam chhunga mi te thehluh tura zawn chhuah tur dap awm tak niin a lang. Dawt leh infak mawi chawpna thil ni lo, mi tlawmngai tawh sa chawimawina tur thil a nih avangin YMA hruaitu tan chuan phur taka tih a, thahnemngai taka 'recommend' tur zawn awm tak ni te pawhin a lang. Mipui hma a tlawmngai tura infuih hluah hluah a, tlawmngai nopui dawm tur mahni huam chhunga mi te ngaihven tha leh lem si lo nih chu a inhmeh lo thei. A thlangtu lam tan pawh a en tham fe theh khawm theih awm tak a ni.

YMA Day a lo thlen apiang hian Mizo ten YMA kan neih avanga kan vanneihna hriat chhuah fo theihna tur te, kan lawm thar leh fo theihna tura YMA Day lawm thei leh kalpui thei te chu an fakawm ngawt ang a, chumi baka hlimna leh lawmna min thlen thei tura hlim taka ni khat na na na min awmtir lehzel thei a nih phei chuan a lawmawm lehzual ang.

'YMA dam reng rawh se,' tih tawngkam te hi YMA hian a inhmeh bik riauin ka hre thin.