CHAWLHKAR HNIH DANG

A huphurhawm zawnga ngaihtuah chuan a huphurhawm ngel ngawl hle mai. Hei chen kan inkharkhip hnua thla chanve zet zawt dang han inkharkhip leh chu ti a ngaihtuah chuan huphurhawm thei tak a ni. Tam tak tan chuan eizawnna a chat thak lo thei lova, a bikin Taxi khalhtu te, dawr veivak hmanga sumdawng te leh eizawnna kawng hrang hrang zawhtute eizawnna chu a bulhin a bul hmak mai a. Inhlawhfa te pawhin thawk peih mah se an hnathawhna lamah hnathawhna hmanraw chi hrang hrang a chatlakin a khaihlak zo tawh thei a. Nunphung chu buai lo ve thei tak tur a ni.

A êng lam thlir chuan hetia kan han inkharkhip takah chuan ruihhlo ti, nghei thei reng si, chhungte khap beh zawh si loh tam tak chu he inkharkhip hian a khap bet dawn a. Chhungkaw tam tak tan chuan a vanneihthlak phian thei. Ruihhlo ni kher lo, ruih theih thila insum nachang hre lo, chhungkaw member pangngai ve tak thenkhat pawh he inkharkhip hian a khuahkhirh tawk an awm ngei ang a, chung mite tan chuan he inkharkhip hi malsawmna a ni thui hle ang. 

Pathian thu lama riltam thenkhat tan pawh TV lamah thusawitu thlan bik thenkhatin an sawi indawt nual a. Bawhbuaitu dang awm mang lovin rilru zalen angreng tak siin hman deuh maiin hengte hi a thlir theih ang a, dam tea he hun hi kan kal pelh chuan nakinah chuan heng hun te hi a la ngaihawm letling phian mahna le. 

Khaw thenkhat chuan he inkharkhip hi malsawmnaa chantir ngei tumin hnathawh uar sauh sauh turin an infuih a. Khaw dang panna chhuahka an khar sauh sauhva, ram lama hnathawk turin an infuih a. In lama awmkhawm an khap a, ram lama hnathawh an insawihmuh hlauhva. Heng mite tan hi chuan inkharkhip hi nakin thlenga hmasawnna thlentu a ni thei ang. Hetiang rilru pu hian he inkharkhip hun hi hmang thei ila Mizoram tan chuan a duhawm ngawt ang. He hripui hi ramhnuaiah leh luidung velah awm lovin ram dang atanga lo kal dangte nena inhnimhnaih avanga lo awm a ni a, nizung leh boruaka kan chenna hmuna awm mai a ni lo tlat a, a vei tawh sa nena kan inhnaih loh phawt chuan a pawng a takin a hlauhawm lo. 

Kan nau pakhat chu vairam atangin a lo haw a, chawlhkar hnih chhung a pindanah chaw an pe a, amah lah chuan, “A hrehawm lem lo. Ka thesis ziah lai hi ka ziak ang a, ka zo hman mai ang,” a ti awlsam et a. A inkhung hran hun chhung chu harsa lo tak pawh ni lo, tangkai takin a hmang tlingtla mai. 

He khawvel thil zawng zawng hian hmai hnih a nei vek ti ila kan tisual awm love. A hmai tha lam leh a hmai chhe lam a awm vek a. He hripui hi a hlauhawmin min luhchilh vaih chuan a rapthlak dawn hlein a lang a. Chutih laiin a lo kalna kawng hi chiang takin kan hria a. A lo awmna lam tur kan hriat chian tawh ber chuan a inven dan kan hriat ang leh kan mithiam te, kan sorkar hotuten an siam te hi zawm tha ila kan vanneihpui thei. Amaherawhchu veng thenkhat chu a hnathawh thulh zawng ngawta thil ngaihtuah te pawh awm theih a ni. Mahni thenawm leh mahni in bula awm, khawiah mah chhuak lo, hri vei anga lan theihna pakhatmah nei lo te hi chu inhlau lutuk lo ila a pawi dawn em maw ni aw? He hripui hian chhungkaw tam tak chu malsawmna a thlen ka ring a, thenawm tam tak inkawm ngai tawh mang lo pawh an inkawm leh phah ang tih a rinawm a. Kan tih peih loh tam tak kha he hripui avang hian kan tih te pawh a rinawm bawk. Chuti a nih chuan a hlauhawm teh nain he hripui avang hian malsawmna engzat tak nge kan dawn a hriat chiah loh ve tho mai.

Chawl hman reng reng lova inhre kumkhua, englai pawha tul vut vut renga inhria tam tak chu hman awm em em a thutna pindana thut hun te kan nei ve thei a. Tam tak chuan nun kawngah pawh nghehna kan neih phah ang a, hringnun chhiar dan kan thiam phah hial awm e. Eng em kan ti zui lovang a, he hripui hi hetia kan tuar chhuak a nih chuan mi tam tak chuan kan vanneih phah viau ngei ang. Kan vanneihna lam chhiar lova, kan vanduaina lam ngawt kan chhiar chuan thla chanve dang kan hman leh tur hi a huphurhawm sa viau mai a. Mahse a êng lam zawnga thlir chuan kan vanneihna hi nasa tak a ni tawh ang. Chutih laiin a hmang thiam lo leh a ninawm zawng ringawta thlirtu tan leh sum leh paia kan hekna lam chauh ngaihtuahtu tan chuan a vanduaithlak hle a ni.

Kan sorkar rorel dan leh thutlukna pawh a pawm a nuam ta viau a. Mahse ramri lamah chuan a hma zawng aiin khauh se duhthusam a ni.