KAN CHAMPION E

India rama football inelna sang berah Zofate kan han champion a, mipui kan va lawm tehlul ngai ve le! He dinhmuna min hlangkaitu zawng zawng te chungah lawmthu awm mawlh teh se.

Kan pi leh pu hun han chhut ila, kan nu leh pa te han ngaihtuah ila, kan hriat phak chinah football leh kan hnam zia pawh hi chhui tur teh vak a awm lo. Chuti chungin tun hnu deuhva football a harh tharna kan chan aṭangin India ramah ro kan rel titih ta mai a ni ber a. Mizo te football hi hnam dang tan sawi nep a buaithlak tawh hle ang. Sub-Junior-ah te kan chak a, Santosh Trophy-ah te leh thildang dangah kan chak kan chak ve ta mai. Kan chakna hi vawikhat tih fuh teh mial thil a ni seng zozai ta lo. Kan chak ve ta a ni tih loh rual a ni lo.

India ram ropuizia leh State dang tea mihring tamzia te, keini aia football an lo khelh nasatzia leh an lo lak thutak rei tawhzia te ngaihtuahin kan chakna leh kan hlawhtlinna hi kan tan a ropui ngawih ngawih a, a hnam nawlpui anga kan ngaihsan infiamna ngeiah hriat hlawh khawpa kan han ding chhuak ve hi a lawmawm a ni. Tu te bulldozer hmu emaw ang maia mahni chauhva meilum ai chung pawha bang chhak lam hawi a, ‘A va lawmawm em!’ tih bauh bauhna tham zet a ni mai.

Hetia chak ve thei reng leh chak thei dinhmuna lo ding reng tawh kha kan Football management fel tawk loh avangin rei tak chhung kha chu kan tualchhung bak kan lo pel lova. Football enkawltu (MFA kan tihna a ni ber) te khan hnaivai te teah hmasawnna zau zawk ngaihtuah lovin mimal duhdan leh hlawkna themnem te te vang ni chek tur khan tualchhung pel thei lek lovin min awp a ni ta ber ang chu khati khan kan awm a. MFA han insiam thar hnu aṭang chuan a chho zawng hlirin kan kal ta zawt zawt mai a ni ber a. Tun dinhmuna heng danglamna hmutute hi chu kan vannei teh zawng a nih hi.

He ni lo thlen nana tha thawhtu hrang hrang an fakawm a. Footballer S.Malsawmtluanga te thawhrah te pawh a ni pha daih daih ang a. Zonet te pawh he dinhmun thlenna tur atan hian kawng sialtu a ni ang a. Tunhma aṭanga Football lo atchilh tlattu khawilai maha mipuiin an lam chhuah loh tam tak an awm ang a, inkhel en taima tak tak leh thuthmun aṭanga ngaihven thin tam tak te tui chhuah te pawh a ni tel ve ang. Kei phei chuan ka pu Dengchhuana, Social Welfare Department Director a nih laia AFC din chhuaktu te zinga tel te kha ka hrechhuak rum rum a, lung lung te pawh a leng ve ta hial.

Shillong a inkhel enna hmunah kan Mizo nula tlangvalten inkhel an en zawhah an thuthmuna an bawlhhlawh hnutchhiah tur an han chhar fai leh kher kher a, keimahni ka aṭang ni lo, hnamdang ka aṭangin fakna thu kan han dawng phei chu hnuk a ulh thei rum rum zawk.

India ramin kan mithmuh lai ngeiin ‘danglamna’ hmel a hmu a, Prime Minister Modi a rawn inlar a, Bihar-ah Nitish Kumar awmin Tripura-ah Manik Sarkar a awm a, Mizoramah MFA kan nei bawk a. Tunhma Bihar te, tunhma Tripura te ngaihtuah chuan Mizote kha an lakah inchhuang thei niin kan inhre ve thin a. Kan MFA te khawsakdan en khan vairam lama an Football enkawltute pawh kha kan lakah an lo inchhuang ve thin ta hial awm e.

Heng zawng zawng hre chiang pha leh hmu phaa awm vawiina dam mek te hi kan vannei em em a ni kan ti thei ang. He Mizo hnam tlem te hi India ramah Football-ah kan champion thei a nih ngai chuan kan ram, kohhran leh YMA leh tlawmngaihnain a tuam ngheh tlat zim te enkawl hna hi tuna kan kalphung ang lo deuh hian enkawl ni se chu Gujarat te pui pui chu sawi loh, Tripura te lai pawh kan ang pha ve thei ang tih a rinawm.

He khawvelah hian engkim hi Management a lo ni deuh vek mai a. Kan AFC pawisa zawng zawng hian an elpui tak ber Mohun Bagan Club a an player pakhat, Nordi-a leina man a hen tawk chauh an ti a. Chutianga kan Football Club te an champion theih lai chuan an Tripura Chief Minister chuan, ‘Mizoramin Central aṭanga cheng za an hmuh chuan cheng 20-in hna an thawk ang a, keini chuan cheng za kan hmuh chuan cheng 80-in hna kan thawk thung ang,’ a ti e an ti a. A na nget ngawt hle mai.

Football aṭang hian eng emaw chu zir tur kan nei ngei ang maw le!