CORONA VIRUS FIAHNA

Min tlan turin van khawpui aṭangin Lal Isua a lo kal a, kan rinna fiah turin China rama Wuhan khua aṭangin Corona Virus a lo thawk ve thung a. Ringtu anga kan ngaih tam tak te, mi chinchang hria anga kan ngaih thenkhat te pawh chu fiahna hmaah chuan kan ding zo ta lo. 

Chinchang hriatna lam thlirna aṭanga han ngaihtuah mai pawhin buhfai te chu Mizoramin kan ngah ve lai tak a ni a, thingtlang hmun hrang hrang kudamah te, kan sorkar kudamah te a awm ve lai a ni a. A chuha inchuh zawh mai chi ni meuhvin a lang lo. A chuh a chuh zawngah chuan kan inchuh zawh hmain sorkar kan nei a, eng sorkar pawh ni se sorkar chuan hma a la ang a, chuh chak policy chu he Mizoramah hian a ding tluan dawn lo tih hriat ve awm tak a ni. Chu chauh a ni lo, Mizote hi buhfai lo chu ei thiam mang hauh lo kan ni a, buhfai chhum chauh lo chuan puar tum hauh lo hi biak-In tinah chawlhni apiangin kan thu khat thup thin a. Chu chauh ni lovin bazar lun vanglai taka phu nuai nuai te hi buhfai chhum lo chu chaw a ni lo emaw kan ti tlat mai a ni. Buhfai chu chutiang taka pawimawh, kan chaw pui ber a nih miau avang chuan an Corona Virus pawh leng sek sek, buhfai hi chu kan chawk luh a ngai tho tho. Buhfai phurtu motor khalhtute hi km nga dan zelah pawh damdawi hmanga inphuh thianghlim ngai zel pawh ni se a buhfai a awm a, a phurh man pawisa a awm phawt chuan kan sorkar hian a phur lut ang. Eng vangin? Buhfai ei loh vanga mi an thih dawn tho tho chuan thih huama buhfai phurh luh chu a ngai a ni mai. Chuti a nih chuan kan thih phal lotu sorkar chuan buhfai a phur lut ngei ngei ang. Chu thil awmdan hre pha lova buhfai chuh rum rumtu chu hriatna lamah a englo ve deuh tihna a ni mai. 

Mizo nihna thlirna lam aṭangin han thlir ve leh ila, ‘Keiin hung tlar dul ila, thenawmte chuan chang lo mah se a pawi tawh love, eng pawh ni se keini chhungkua hi chu i’n thlaphang lo fal nalh mai teh ang,’ ti ang ziazanga thuthang avanga tlan rawk rawk te kha tlawmngaihna meichher chhit sa kengtu atan an iaiawm lo thei lova, an iaiawm satliah lova, hman an remchang lovang. ‘Sem sem dam dam, ei bil thi thi,’ tih kha chu Kristian nih hmaa pi leh pute lungmawl vanga an lo changchawi angah chhekkhawltute hi chuan an ngai ang. Tunah zawng Mizote chu an mithmuhah chuan kan lo fing ta em em a, hmanlai pi leh pute thurochhiah leh thu inrochun te chu thangthar whatsapp khawvel chuan a hnuaichhiah zo ta vek a, bengvarna hmanga midang ngaihsak lo leka tlan hlawk hlawk chu finna ropui berah an ngai ni ngei tur a ni. Chuti ni lo se khati takin an chuh nasa nang. 

Kan sakhua hi biak-Ina tawngtai nan te, inkhawm huna nalh taka inkhawm nan te, tui taka Bible thu hmanga sermon thlak nan te leh kohhran mi inthliar nan te kan hmang tangkai hle a, midangte nuna thawvenna atana mahni inpekna te, neih sa leh thildang sih chhuah nan emaw, midangte ken nan emaw chuan a hman a remchang lo a ni maithei. Kan sakhuana chu Corona Virus a hlauhawm hunah meuh chuan biak-In lamah kan hnutchhiah a, buhfai awmnaah chuan hmuh tur a lo awm ta lo mai a ni ta ve ang. Engkima min ngaihtuahtu tur kan Pathian chuan min theihnghilh palh kan hlau nge, min hriat chhuah loh kan ring nge, keimahni kut ngeiin mawi leh mawi lo pawh thlu hman lovin a chuhin kan chuh a, kan inchhek khawl ta a nih kha. 

‘Thlen chin aṭanga hmasawn...’ tih vawi tam ngaithla tawh khan chi van tur thu leh purunsen thawnthu aṭang khan kan zirlai kan zir thiam zo lova. Dik tak chuan chi van tur thu avanga chak taka chuhtute tho kha buhfai chuhtute hi an nih te pawh a rinawm rum rum. Hringnun zirtirtu ni ta ila, chi van thuthang leng avanga buai hrep tawhte zingah buhfai chuhtu an awm a nih chuan thiam thei lo kan ti ve ngawtin a rinawm.

Buhfai chhek khawltute u, khawngaih takin Mizo hnam hmingin lo zak ve ula, mahni chipuite hmaa huamhauhna leh derthawnna in lantir kha in tu leh fate chu zirtir ve lul suh ang che u. Missionary chawm nana in thawhlawm te kha khawvel sual thima êng chhit nana in thawh a nih chuan in buhfai chuh hian tam tak chu thimah a chantir leh ta tih in lo hre dawn nia. In nihna ang anga chachhuah in nih loh nan in buhfai chhek khawl kha a ruk tein inthlahrung chungin ei zo vek ang che u. Mahse Mizo theuh kan ni a, in ei ta rau rau a nih chuan tui ti takin ei ula, chaw eitui vek ule.