HMEH LOH HAM LOH NI

Kan neih apiang hi kan neih chhun a lo ni deuh zel mai a. Keini pawhin Aizawl khawpui hi kan neihchhun a ni ta mai a. Mizoramah Aizawl ang dang hi awm mawlh hek lo, Mizoram lovah lah chuan a vang tulh tulh si. He khawpui hian kan Mizoram hmel a tarlang a, Mizo hlimthla tam tak chu hetah hian a awm ta tlat a. He khawpui hawiher hian Mizote nihna a hril a ni. Chuvangin kan Aizawl khawpui awmdan tur hi mipui mimir leh sorkarin kan ngaihtuah a ngai.

Aizawlin kan hriat hma daih khan ramdang leh India ram khawpui tam takah lirthei awmphung hi fel takin an lo duang a, an lo hmang a. Keini pawh hmuh theihin nitin deuhthaw kan danglam chho zel a. Kan naupan ve lai chuan Zion Street chhukah te sawn thirsakawr Brake nei fumfe lo kan han ‘risk’ thla chiam mai thin a! 1980 bawr vel te kha chuan motor khalh chhuak thei kha chuan Bazar pheiah te hian kan duh duhna laiah kan han hung chawt zel mai a. Hmun tam takah chuan motor hi a sira motor dang a len tawk tawk chuan hung ringawt mah ila a sawiseltu apiang chu misual an ni zawk zel. Engemaw changa Traffic Police awmchhun te’n min han hauh a, lo hnial pawng pawng te a mak loh hun kha a la rei lo. Mahse tunah chuan chutia tih chi awzawng a ni ta lo. Mamawhna chuan thil danglam tak tak a rawn hring chho ta zel a. Tunah hi chuan motor dah fimkhur loh pawh hmun tam takah chuan a dahtu tan a zahthlak ta. Ngam leh ngam loh, theih leh theih loh lam ai mahin zahawmna leh zahawm lohna a ni ve ta hial. Chutih laiin kan Traffic Rules te hian zawm a hlawh tawlh tawlh lo thei lova, Traffic Police lama tang hi a ni telin kan pung ta tulh tulh mai.

Kan neih chhun, Aizawl khawpui mawina ve ber pakhat chu awmze nei lova Horn hmet vak vak kan tlem ve khiah hi a ni a. Hetia kan mawi vena chhan pakhat chu kan thlang lama mite awmdan dik loh vang a ni! Kolkata, Guwahati, Silchar, Delhi leh India ram khawpui dangah han kal ila, mihring zahawmna bo rawk khawpin Horn an han chelek a. Chung zawng zawng rawn paltlang chhoh hnuah chuan helai Aizawl kilkhawr tak maia kan lo inzui diah diah hi a mawi sam ta riauva. Hei hi kan chawi nun hi tul hle mai. Tuna kan awmdan pangngaia awm mai hi duhtawk lovin kan awmdan pangngai aia tha hian awlsam takin kan awm thei tih a lang. Tunah hi chuan a hmetin an hmet a, a hmet lovin kan hmet lova. A hmetho hi a pawimawh zual bik pawh an ni lova, nunphunga misual tihngaihna awm lo pawh an ni lova, hriatna lama pachhe lutuk vek pawh an ni bik lo. An hmet ringawt a, khaptu leh zirtirtu hranpa an awm loh avangin an hmet leh thin a ni mai. Heng mite hi zirtirna hmuh theih pe turin Hmeh rik loh ni (No Horn Day) siam ila. Chumi ni a Horn hmet te chu man theih, chawitir theih ni sela. Chutia kan tih chuan ngaihtuah chiang lova Horn hmet thin zawng zawngin Horn an hmeh dawn apiangin a hmeh loh theih hram em tih te an ngaihtuah ve ang a, kan Aizawl khaw­pui hi thawklehkhatah a thianghlim belh phut ang. Nia, bengchheng hi bawlhhlawh huangah kan khung tel a ngai tlat alawm. Tul lova bengchheng lek phei chu kan ngaimawh theuh a nih hi.

Fing ta lo napui chuan finna hi engnge a nih chiah ka hre lova, ka hrilhfiah ngam hek lo. Mahse mi tihdan leh mi tawngkam han ngaihthlak hian mahni tih theih zawng leh mahni tana remchang leh kan nunphung tha te chawilar a, chhawm nun that hi finna chi khat chu a nih ka ring. Fapa, Football lama malsawmna dawng nei na na nain Badminton khelhtir tum tlat se a finthlak lovin ka ring a. Tawng muang hnam na na na, tawng rang tura inzirtir chiam chiam a, intur chiam chiam ai chuan kan tawng muan ang ang a khawvel hmachhawn ve mai hi a that zawk ka ring. Kan nihna leh kan awmphungin a ken sa, horn hmeh loh hi kan nunpui a, hetah hian thangchhuah kan tum law law hian Mizoram mawina hi kan belhchhahin ka ring tlat a ni. He khawvel hi an buanzawlah vek buan lovin kan buanzawlah hian a theih chin chinah buan hram dan kan ngaihtuah a ngai. Mi khawpuia awm ang, Fountain te, Circle Crossing te, 8 Lane Roads te hi chu kan tan a buaithlak ka ring. Chuvangin kan tih theih leh kan thangchhuah vena tur chu kan neih sa leh kan thiam sa chawi nun lama ramtan hi a ni ngei ang. Hemi bawhzui nachang leh uar nachang kan hriat chuan kan chhiatpui aiin kan thatpui ngei ang. Kan neih theih loh tur leh kan ram leilungin a ken tel loh hmanga mi tihdan zawm tum aiin kan hlawkpui ngei ang.

He Hmeh rik loh ni hi a khat tawkin han hmang ila thil awmdan chu a lang thuai maiin a rinawm a. Chumi rual chuan kan Traffic Police thahnemngai leh fel tak tak te hamrik hi chumi ni emaw, eng ni dangah emaw han chawlhtir ve chhin ila engnge a an hmuh a chakawm khawp mai. Pollution Control lamin Aizawl khawpui bengchhen zawng an teh khan hamrik hi a tibengchhengtu ber pakhat niin ka lo hria a. Hre dik ila hre dik suh ila kan hamrik pawh hi tul lova ham a awm ve nualin ka hria. Chubakah a hamtu lam biang pawh a rimtawng lutuk reng reng. Kan ham loh theih zel phei chuan a lawmawm dawn em asin. A nih loh vek leh Traffic Police-in hamrik an hamkhum chiam nih chu insawisak nan te pawh hman tlak hial khawpin kan Police te hi kan dah sang lehzual ang. Duhthusamah phei chuan hamrik tel lo, Horn tel lo khawpui te hi nei thei ila a va duhawm em.

England-ah te, USA-ah te hetiangin Horn an hmet ve vak vak lova, an lirthei che vel a buai chuang lova. India ram khawpui hrang hranga han len kual hian mihring zahawmna hi a tlahniam ta rawih rawih hian a hriat a. India ram hmun dang nena khaikhin chuan Aizawl chu nuam tak a ni. A pawimawh lai tak chu hei ai hian kan la mawi thei a, chuti takin thil harsa ni lovin a lang bawk tih hi a ni. Tunah hian kan awm mai mai hi a sawi uar deuh chuan, ‘No Horn City’ te min han ti ve mai hial a. Kan lawm tehreng nen tih fuh loh ni chuan Horn ri hi hriat tur a la tam khawp mai. Hetia a van tla nghak a, tih belh leh thawh belh nei lem lova chawimawina dawng ta ngawt ang ni lem lovin tlemin han pên belh zeuh ila chu fak tlak kan ni mai dawn a ni. Kan ram leh hnam hi miin a der ni lovin, kan nihna dik takin min fak se a hlu em em si a.

He Horn chungchang hi ka ziak zing ta viauin ka hria a. Hei aia chawimawi kan hlawhna awlsam hi ka hre lova. Tuna kan tih theih laia inzirtir hian kan Mizo nunphung thui tak leh kan lirthei awmphung a hril dawnin ka hria a. Hetia en ngawt lo hian inzirtirna neih tha ka ti hle mai.