YMA

Ruah a sur cherh cherh a, YMA Flag a phe vat vat a, hnatlang tur an chhuak khawr hlau hlauva, nula tlangval an infiam hawr hawr a. A inhmeh vel vek mai.

Khawchhe hnuaiah Hall chhungah kan han thu thep thawp a, ram ngaih hla kan han sa tluk tluk mai a, a karlakah vengchhung fiamthu thiamin thiam an han thawh a, hnaivai te teah kan mi hriat zawng te hming an han lam kual a, kan nui hluah hluah a, pawn lamah fatu an han vir vat vat mai te khan hmun tam takah mual a liam ta lek lek mai. Hmun thenkhatah erawh chuan chutiang kalphung chuan tihdan tlanglawn tak chan a la chang maithei a, khawpui thenkhat leh hmun thenkhatah chuan a hla ta deuh. Kum thum danah pawh ‘Kan Zotlang Ram Nuam’ hla sa lo te chu member vantlang tak an ni thei ta tlat a. Hla hruaitu atana tha fahran si, ram ngaih hla hriat a bar nei lo te pawh kan naute zingah an awm ta nual. Ram ngaih hla sakna hmuna awmna tur hun an nei tawh lova, ram ngaih hla sak ri hriat tur an nei meuh tawh lova, ram ngaih hla sakpui tur an vang ta deuh a ni.

Kuminah Mission Vengah chuan YMA-in bazar chawhmeh zuarte YMA Day pualin ei tur an lo hlui ve mek a. Tihdan thar mawi tak pakhat chu a ni ngei ang. Chutiang chanchin duhawm kan hriat mek lai chuan YMA Duty ten Aizawl khawpui chhunga ruihhlo tam tham tak an man thu hriat tur a awm ve mek bawk a. Hmanlai ang deuh bawkin YMA hnathawh a la inpersan viau zel. Chanchin lawmawm ve ve si a nihna a inpersan. Kuminah pawh hian YMA Day hmanna tam berah chuan zirlai tithate leh chawimawi tlak dangte chawimawina hun hman a ni leh ngei ang a. YMA chu lawmpuitu, venghimtu, thlamuantu, tanpuitu, chhawmdawltu leh nundan tha chawisangtu a ni.

Englai pawhin mihring hi hruaitu a zir zirin an danglam a. Ram tlabal tak te pawh hruaitu thain an hruai chuan a ding chhuak zawk zawk a. Hruaitu tha lovin an hruai chhung zawnga misual leh mi mawl chenkhawmna ni awm tak kha hruaitu tha hnuaiah chuan mi danglam an lo ni a, a mimalin mifing chawr chhuak sup sup lo mahse nunphung a invawrh sang dawrh dawrh thin. Chutiang bawk chuan YMA theuh theuh Branch tin a danglam a. Nikuma YMA sawprawp tak awmna hmunah khan kuminah chuan YMA par vul mawi tak, nu leh pa leh rual u zawkte YMA thlarau chawl tawh pawh lunglenna hmanga kaitho thei a lo awm thar leh thei a. Hmana YMA mawi tak awmna hmunah khan YMA nawizel zet, sawisel nuam mang si lo a lo ding a, YMA Day te chu rilru tihah, lawm dawna huphurhawm, lawm loh dawna ni chiah si lo angin a chhuak thei. Hmana mawi taka ram ngaih hla sakna hmunah khan hla ti ziah zuah an zaitir zut zut a, member-ten an zawm thup thup a, ‘Ka chawi ang che, sakhming hluanin, Zonun parmawi ka ti ang che....’ han tih dep dep te chu ral lehlam mual phenah a biru ta khiau a ni awm mang e tih mai tur a ni. Eng pawh ni se hruaitu a zirin YMA Day chu kan phurpuiin kan thlahlel thin. YMA hruaitu, englai pawha YMA tha hman lo, member-te mitmei ven avanga hnatlan rawt hlei thei lo reng mai awm theih a nih laiin englai pawha YMA leh khawtlang tana inpeih reng awm theih a ni ve ve.

YMA tel lo Mizoram hi ngaihtuah a buaithlak em em a. Kum engemawti kalta (1970-80 bawr) atang khan YMA tel lo Mizo khawtlang ngaihtuah hi thil buaithlak a ni. Khawi emaw lai hmun bikah chuan YMA tel lovin hming dang vuahin YMA hnathawh ang thawktu an awm mahna. Mahse chung te pawh chuan YMA kalphung tam tak an chhawmin YMA tihdan tam tak an hmang a. Ram pawn YMA te hlei hlei a hlu zual emaw tih tur a ni.

Inpekna leh inhlanna meichher kengtu YMA chuan a hmel a thlak ve hret hret zel a. Hmun thenkhatah phei chuan politics rim te a nam thuak thuak palh tawh ang tih a hlauhawm ta hial. Mahse chung hmun chu mi thiam bik leh mi fing fel fal bik tuanna mual a ni fo thin a, chutiang mithiam chungchuang an kal liam hunah chuan kha hmunah vek khan rim dang nam lo YMA chu YMA-ah bawk a let leh ang. Engemaw changin YMA chu han silawng deuhvin a hawiher han danglam thin mahse, kawngpuiah lo chuang chhuak lehin YMA lamlian pui te pawh a rawn zawh leh ang.

‘Kan ram a nuam, YMA vangin,’ tih hla kha sa ri kher lo mah ila kawng tam tak ngaihtuahin he hla hi rilruah chuan a awm lo thei thin lova. Dawhsan chang ve lo tan pawh a kil atanga member rinawm tak nih ve mai pawh inchhuanna tham a ni fo. YMA-ah ngat phei chuan dawhsan changtute hi a ropui ber ber an ni lova, a kila ngawi renga hotute thu lo ngaichang a, inpekna leh tumruhna avanga mahni hmaa tlawmngaihna hna hlen chhuaktute hi YMA lungphum pawimawh an ni fo.

YMA vul zel se.