VIP LIGHT

Sorkar laipui lam aṭangin VIP light tihbo thu a lo thleng a, kan ram hruaituten rang tak maia an han la thla nghal thuai mai kha a lawmawm ka lo ti khawp a.

Ka pension hma kum li vel la awm aṭang khan sorkara ka nihna ziahna (designation plate) kha ka vuah duh lova. A tawp lamah phei kha chuan Traffic jam a nasa bawk nen, two-wheeler (bike) khan ka office tam khawp mai. Pathian zarah motor ke pali nei ni lo, ke pahnih neia chuang thei anga ka la inngai ve te kha ka lawm a. Ka chuan avanga keimaha danglamna a awm chuang lo te kha ka lawm a, mi thenkhatin mak min ti ve deuh lek lek te kha mak ka ti letling zawk. Sorkar motor a nihna ziahna dah hi zin nikhua chuan a tangkai maithei a, ka la hre chiah lo. Mahse Aizawl khawpui chhunga ka han tar khan kawngro a sut awm reng reng ka hre tlat lova, han tar vel kha tul ka ti lo nasa hle a ni.

Aizawla khawpui chhunga eng Deputy Director emaw, eng Deputy Secretary emaw (heng hian motor an dawng thei em tih ka hre tawh chiah lova) ten an Designation an tar avanga a sawtna ka hre lova. A dang pawh a sawt lo a ni tehchek ang chu kan Chief Secretary pawhin a tar duh miah lo. A thuhrimin hetia tar sup sup rikngawt mai hi a eng tak hi nge a tulna ka hre lova, a tul ti ber ber te hi tar lo mahse pawi lo ber ber tur an niin ka hria.

Tunhma, Officer tlem lai, motor thawl lai, motor te hi mi vantlangin kan neih phak hma, motor dahna tel lova in sa te an mak lem loh lai kha chuan sorkar motor a han chuan te kha a nuam chuang bik a. Chu chauh ni lovin a chuang te pawh kha an zahawm hmel bik a. Mahse tun ang, motor tam tak hnu hi chuan sorkar motor a chuan hi a chang chuan a zahthlak thei - dawng lem lo tura sorkarin a ziah fel, mahse mahni Office chhunga pi leh pu te nena inbiak thiam avang leh zah theih loh vanga chuang te pawh an awm thei tlat tih kan hre tawh si a.

Mi tam tak chuan VIP light hrim hrim kha an helh viauin ka hria a. Ram mipui dinhmun chhiatdan leh kan eikhawp kan thar lohdan leh kan intodelh lohdan en a, a nuamsaa te an nawmsak lawi sizia ngaihtuah hian mi tam tak chu VIP light an hmuh khan an ter nghal at mai ni hialin ka hria. Chutiang bawk chuan mi tam tak chu VIP light an hmuh khan an inthlahrung nghal a. Motor hmel an hmuh khan an tlawm sa ringawt mai. A pahnih hnih hian awmdan dik a ni chiah lo ve vein ka hria a. Mahse a tihngaihna tak a awm lo. An ngaihdan hian tanfung tha tak a nei ve tlat.

VIP light kha a sen a ni a, Ambulance leh Fire Service hian a pawl leh a sen an vuah niin ka hre bawk a. An vuah loh pawhin anni chuan ‘siren’ an tiri a, chuta tang chuan kan hre mai thin bawk a. Chumi piah a VIP light anga hman, a pawl leh a eng vel kha ka hrethiam chiah lova, hriatthiam pawh ka tum chiah lo. VIP light eng han vuah te kha eng category nge ka hre lo nain ngaihtuahna erawh min neih thuitir viau mai. Khatiang light vuah hram hram peih te kha chu mi taima tak an ni a, in za khuaah pawh awm se YMA Section a Finance Secretary an nihna plate te leh VDP Committee member an nihna te pawh an tar tel vek ngeiin ka ring a. Anmahni awmna kohhrana an nihna, Upa tih te pawh hming ziahna tinrengah ziah tel an tum ngeiin ka ring.

Saprama ka zu kal ve khan motor naran tak pakhat hi pa pakhat hian a rawn khalh a, ka kalpui chuan, ‘Kha kha Senator a nih kha,’ a ti mai a. A motor-ah danglamna engmah a awm lo. Kan Chief Secretary hi London-ah training-in a zu kal a. Dinner te pawh mi lian pui pui te nen an ei ni ngei tur a ni, an zinga pakhat chu Cabinet Secretary, term thum emaw lai lo chelh tawh a ni a. Chaw an han ei kham chuan, ‘Khawnge ka thirsakawr kha?’ a ti ta mai a, tih thu a sawi. England a an Cabinet Secretary hlun tak chu an chawei khawmnaah thirsakawrin a kal mai a. Keini hi chuan cheimawi kan la ngai deuh te pawh a niang.

VIP Light kha ropui ka ti tehchiam lova, mahse lak thlak a nih hma kha chuan keini ang rual, a vuahtute nena khaikhin phak loh khawpa te thamin engemaw lo sawi ve kha a inthlahrunawm em a, ka vuah duh tak loh phak chin, designation plate chungchang vel chauh ka sawi ngam a. Kan ram mipui retheihzia ka hmuh hian VIP Light leh designation plate vel hi ka lawm thei mawlh lova. Mahse chutiang lawm deuh deuh chu kan hotu anga kan ngaih te chu an ni fur si a, sawi ngam kha har ve tak a ni. Hre lo tam luatna hmunah chuan hria nih hi a hlauhawm ve thei tlat.

Tunah chuan VIP Light a awm ta lova, kan hruaitute pawh an ngaihsanawm sawtin ka ring a. Motor naranah mi pawimawh tak an chuang dawn tihna a ni a, keini mi naran tan pawh an zahawm sawt ang a. Kan ram kalphung pawhin engemaw chenah chuan a ṭhat phahin ka ring.

Tak a, nakum maiah kan inthlang leh dawn chu a ni a, tutenge tling ang tih sawi theih lah a ni lova. Thil awmdan te hi lo inthlak ta se, kan hotute zingah hian bangla chhuahsan tur rawk vak duh khawpa rilru lama pachhia an awm ang em aw? Dik tak chuan an bangla chhunga thil awm tam ber hi sorkar pawisaa lei a ni a, fir taka an hlawh an khawl ker ker aṭanga nasa taka inngaihtuah chunga an lei a ni lo. Tam tak chu an Department chanpual aṭanga an lei a ni a, tam tak chu sorkarin bangla chei nana a pek aṭanga an lei a ni a, tam tak chu an luah luh dawna sorkarin a cheina ve hrim hrim a ni a. Chuvangin, ‘Hei chu kan ta,’ ti a han chhuahpui tur a tlem viauin ka ring. Sorkar laipui lamah chuan an luah luh dawna thil awm zawng zawng fel takin an chhinchhiah thlap a, an chhuah dawnah an endik leh thlap a, a kim lo a awm chuan sorkarin a man a chhiar zat an chawi nghauh nghauh mai. Ram hruaitu hna kum engemawzat lo chelh ve meuhvin sorkar pawisaa lei, chatuan daih tur pawh ni chuang hlei lo leh thlahte thlenga hamthatna tham pawh ni hlei lo paipawn chhuah duh tlatna thinlung nei nasa apiang chu ui tlak loh ram hruaitu ni ngeiah ka ngai.