DAMDAWI

Tunhnaiah damdawi man tlawm a lei theihna tur damdawi dawr hawn thar a ni a. A lawmawm hle. Mipuiin hlutsak nachang hria ila a lawmawm ngawt ang a, sorkar tan emaw, midang tan emaw ai chuan keimahni theuh tan a hlawk bawk ang.

Damdawi chungchang hi thu lian tak mai a ni a, ngaihtuah a ngai viau. Kan mimal tana damdawi kan lei aṭanga sorkarin a kalpui dan thlengin ngaihtuah a ngai a. Damdawi a nih miau avangin kan manganna leh kan thih leh damna nen a inzawm tlat a. A pawimawh rual chiahin hemi hmanga thil a kal sual hian a pawi zual bik a, mipui pawh damdawi hmang hian bum kan awl a, kan pawisa pawh damdawi thilah hian a kal nasa bik bawk.

Damdawi hmanga sumdawnna hi sawi hleih theih loh khawpa lian tham a ni a. Keini ang mi naranin kan suangtuah thiam phak bakin damdawi hmanga sumdawnna hi a che vel a. Chutih karah chuan mi thahnemngai leh midangte tana inpe, damdawi tha leh damdawi dik, a mamawhtute hnena thlentir tura suangtuahna zawng zawng seng mi tam tak an awm a. Chu mite piahah chuan a sumdawnna lai chauh ngaihtuah, mipui mimir hriselna lam chu ngaihtuah reng reng lo sumdawng an awm bawk tih hriat reng tur a ni.

Doctor tam tak chuan natna pakhatah damdawi chi thum bak chawh hi an duh hauh lova, ram changkangah phei chuan a natna zir chian hmain damdawi an chawh mai duh hauh lo bawk. Chutihlai chuan natna nasa vak lovah pawh doctor tam tak chuan damdawi chi nga chi ruk an chawh bawrh bawrh mai a. Heng hian doctor tan hlawkna a lo thlen reng mai a lo ni. Company tam takin doctor te chu be tlawnin an damdawi chu chawh thin turin an ngen a, an damdawi siam chhuah chu doctorin a chawh tam dan a zirin chutianga damdawi chawhtu doctor te chu pawisa te an pe a, a chang leh an chhungkuaa hmun nuam deuhva an kalna tur senso zawng zawng te an tumsak bawk a. A chang leh thilpek hlu tham tak tak te pawh an pe bawk thin.

Damdawi man tlawma an zawrh te hi damdawi man to ang bawka tha leh rintlak a ni a. Mipui tan lei a manhla hle a ni. Damdawi inang rengah he dawra mi ai hian damdawi dawr pangngaiah chuan a let te, a let thum te, a let li tein a to zawk tih hriatreng a tha khawp mai. Vairamah chuan vantlang rawngbawltu tam takin hetiang damdawi tlanglawn hi an kawl a. A zuar turin mi an zirtir chawp a, man tlawm te tein mipuiin an lei thin.

Khawvel hmun tinah inbumna angreng hi damdawi leh natna chungchangah pawh a tam em em a. Keini ram te angah phei chuan mipui kan fimkhur loh chuan tul lovah pawisa kan seng teuh ang a, dam phah loh mai chu sawi loh, damloh phah te pawh kan awm nawk ang tih hlauhawm tak a ni. Damdawi chawh sual tuar te, damdawi thi hman avanga ramtuileilova awm te leh tul lova damdawi mana nei lo chung chunga insengso chiam chiam kan awm nual ang.

Mizoramah hian damdawi chi hrang sangthum chuang lai an zuar a. Mahse kan natna zawng zawng hi damdawi chi zathum vel hmanga enkawl theih a ni. Damdawi a tam poh leh inbumna a tam a, tul lo lei a ngai nasa bawk. Damdawi chi hrang hrang, a hnathawh dan inang reng si, mahse into hleih tak tak a awm thei bawk a. Chungte chu eng dang ni lovin a hming kha kan lei tel a ni mai. Pheikhawk inang chiah pawh ni se dawr changkang leh lianpuia i lei chuan a man a to nge nge thin ang mai hi a ni.

Damdawi lama fimkhur loh hi a pawi thei hle a, hriat ve vek lah chu thil harsa tak a ni bawk. Chuti chung pawhin mahni phak tawk tawka thil kalhmang hriat ve tum a tha hle. Hnam fing chuan damdawi leh a hnathawh dan an phak ang chin chin anmahni mimalin an zir ve tauh tauh thin a. Mi pangngai chuan an hre viau zel bawk. Doctor anga inchhal zingah zirna pangngai lo deuh leh hmun biru deuh emaw, certificate fumfe lem lo hmanga midangte chawh ta mai engemawzat an awm chawk a. Chung mite lakah pawh fimkhur thiam a tul hle. Kan thian pakhat pawhin doctor kan hriat ngai lem loh a rawn a, damdawi tam tak mai a chawh a. Chawlhkar khat a ei chuan, ‘Ei zel ila ka thi ngei ang,’ a ti a. A damdawi ei a titawp a, doctor pangngai a rawn a, a dam khawchhuak leh ta.

Kan sorkarin damdawi man tlawm dawr a’n siam hi chu a fakawm hle a ni.