YMA vs CAG REPORT

Tunlai chu kan ram hruaituten CAG Report an tilar bawk a, an sawi ang lo daih subject lo sawitu nih pawh a inthla­hrunawm rum rum mai. CAG hian an Report an thehlut fel a, keini kan buai tan dawn chiah ni te pawhin a lang. Mahse CAG hnathawh dan lam hi ka hre tlem khawp a, khatia an Report-ah, “NLUP a hlawhchham lailet der” ti anga a tlang an kawm hnu khan engtinnge thil a awm zel ang a, chu Report chuan kan sorkar (state sorkar) kalphungah engnge nghawng a neih ang a, Central sorkar lamin engtinnge he State sorkar hi a rawn tih zui dawn tih ka hre pha hauh lo.

Amah Thangkura te tihdan takah tunah hi chuan CAG Report awih pawl leh awih lo pawl kan awm ta a ni ber mai a. Keini lam (kan ram hruaitute) awih lohna tanfung lian ber pakhat chu, ‘Chutiangin NLUP pawisa dawngtu tur NLUP Apex Body-in an duh duhin (CAG Report a a landan ang hian) an thlang ngawt lo. YMA te pawhin an thur chhuak alawm,’ an ti ta a. A YMA lai tak hi keini ang chuan kan lo ngaihven ta chat lo thei lo a ni.

YMA leh sorkar thil : YMA te hi kan kalphung­ah tunhma aṭanga kan lo awmdan aṭangin sorkar emaw, Department emaw hian YMA te hi kutke atana min hman chang a awm a. Kan thuthlung a “Sorkar hi ka ta a ni a, sorkar ta ka ni,” tih kha a taka chantir kan tum viau thin a. Mahse a tira buaina awm lo awm tak, thil tluangtlam tak emaw kan tih kha hmun thenkhatah chuan a lo tluangtlam lo thei viau mai a. Chu chauh ni lovin kan sorkar Department thenkhat te khan YMA te kha thuneihna leh sawi ve theih nei si lo, a hnua thil a kal khawbaw tak a, ‘YMA tih alawm,’ tih mai chang kha a awm ta zauh zauh mai a. Kan khel ta laih laih thin a. Chu chauh ni lovin YMA tel lova tih a, pawisa tam tak senna turah khan YMA hnena pawisa pek kha Department thenkhat chuan an tum der lova. Department thenkhat phei chuan an thil hriat duh kha Central YMA hrilh tawp a, anni’n an Branch te an lo tihtir ang a, an tih zawhsa chu thenawmte tuboh hawh lak a va lak tawp mai te an tum a. Lehkha thawn chhuahna envelope leh stamp man takngial pawh tum lova YMA tihtir mai tum tawk te pawh an awm nawk. Chu chauh ni lovin YMA tih sa chu zawt chiang leh tawh set set lova an remchan dan anga tihdanglam mai te an tum bawk thin. Heng zawng zawng hi YMA chuan a hriat chhoh tak zelah chuan fimkhur a tulzia a hre chho zel a. Chuvangin Central YMA pawhin, ‘Central YMA aṭanga thu a awm loh chuan Branch hnena hetianga ti tura sorkar emaw, pawldangin emaw an tihna hi zawm loh phawt tur,’ tiin thu a titlu ta a.

Mahse YMA Branch thenkhat chuan heng thu hriat hma hian tlawmngaihna thlirna aṭang te, a pawi theihna hriat loh avang te leh thahnemngaihna avanga an dinhmun ena thil tul tak ni a an hriat avang tein Central YMA thuchhuak nghak lem lovin Department emaw, sorkar emaw thu anga thil lo tih mai an nei zauh zauh a. Hmun tam takah chuan a pawi lo ve thei bawk.

NLUP thlan leh YMA : NLUP dawng tur thlan chungchangah hian Central YMA hian inrawlh loh tur a ti tlatin ka hria a. YMA hian NLUP dawng tur thlannaah hian kut a thawh lovin ka hria. Chuti chung chuan Central YMA thuchhuak nghak lem lova lo ti mai Branch tlemte an awm maithei, ka hriat thawi dan phei chuan a lo ti chhun tlemte pawhin, ‘Kan thlan angin engmah an ti tak tak chuang lova a lungawithlak loh,’ tih thawm a awm tlatin ka hria.

Han ngaihtuah mai pawh hian Central YMA-in NLUP thlannaa inrawlh tura Branch te a hriattir hi a rinawm lova. Kan kal tawh dan enin thil tihchi vak pawh niin a lang lo bawk.

A za lai : A pawimawh lai tak ni a ka hriat tak chu kan sorkar hruaitu lamin, ‘CAG Report hi a dik vek lo, NLUP thlannaah pawh YMA ten tha an thawh ve,’ an ti ta chat mai hi a ni. YMA chu Mizoram chhung hmun tinah kan awm a, kan awmna theuhvah kan thlan leh thlan loh member-ten awlsam takin kan hre thei vek a. Keini a thlang lo Branch member tan chuan kan hotute hian eng angin nge min ngaih, eng thu pawh sawikhum mai theih angah min ngai em ni? A thuhrimin Central YMA-in thlang tura min tihna sawi tur hre fak fak thei te an nih loh chuan kan hotute thusawi hi a thanatthlak hretin a lang.

Hetia chawplehchilha finfiah mai theih hmanga thu rintlak lo tak anga lang kan han sawi duh ta mai hi a sawitu lam nge inngaihtuah ngai a mipui lam tih chhut tham a awm. Mipui kan ding khawm thep thawp a, kan tih hauh loh tuin emaw kan hmaah midang hnenah, ‘Heng mite hian an ti alawm,’ min tihkhum ta piap piap mai se engtinnge kan ngaih ang? Chutianga tih theih tawk lek chu kan niin kan inhria em? Chutianga an tih chuan politics thilah ngaiin kan ngaizam zel dawn em ni ang? A titu hi Congress an nih leh MNF an nih lam a ni lova, kan tih loh pui ti anga min sawi a, hlawhchham chhuanlam tanfung atana min hmang ta mai hi YMA member-ten eng angin nge kan ngaih zel dawn?

Central YMA tan erawh ngawih tlat a hun thungin ka hria.