HRI DO KAL ZEL

Mizoram leh khawvelin hripui a tuar a, thiamna leh finna hmangin tunhma ang lo takin kan do a, a hlawhtlin pawh kan hlawhtling viau a, a lawmawm hle. Tunlai thiamna ang neih hma ni se he hri rapthlak lehzual dan tur han ngaihtuah hian a huphurhawm hle.

Kan hri do hi a khirh bawk a, kan do rei ta deuh bawk nen, thu leh hla mak pui pui a awm tan ta zauh zauh mai. Covid19 vei leh vei lo enna khawl, Opposition MLA, Pu Zodintluangan Mizoram sorkar hnena a pek chu Lunglei lamah an inhlan chhawng kual zak zak mai hi keini ang tan chuan a mak tih mai loh chu sawi tur a awm lo khawp mai. ‘A va mak ve, a mak hle mai maw, a mak takzet a ni,’ te pawh lo ti ve ta mai mai ila a awm lo hauh lovang.

Han ngaihtuah mai chuan hetiang khawl pe thei an awm phawt chuan sorkar chuan lawm takin a dawng tur a ni a. Lawm hauh lo mah se lawm angin a lang ngei ngei tur a ni. Kan lo ngaihdan chuan he hripui enfiahna khawl hi thil man tam leh hautak zet mai, sorkar tan pawh lei mai harsa khawp a ni ang a, kan sorkar hian a lei zung zung thei lo a ni mai awm mang e te kan lo ti a. Chutih kara pe thei an awm chuan lawm taka dawn turah kan lo ngai mai a.

Mahse chutiang a lo ni hauh lo ni awm takin a lang ta tlat mai a. Keini ang chuan kan hrethiam ve pha ta lo a ni. Pu Zodintluanga hian sorkar remtih loh chung chungin a lei lui ṭalh nge, sorkar lam a be thlithlai lo reng reng nge, hetiang hmanraw ṭangkai leh man to hi chu sorkar tan hnial tina tin chi a ni lo tih engmah kan hre thei ta lo. Thil awmzia kan hriat ve hma khan mimal takin a lawmawm te ka lo ti a. Pu Zodintluanga te hian an chawr chhuahna lam Lunglei duhsakin heng thil hi an ti ṭang ṭangah ka lo ngai ve mai a. Mahse a hlan thlakna tur fumfe pawh awm lo khawpin a lo buaithlak ni ta hialin a lang mai.

Ngaihtuah dan tam tak a awm thei a, a ṭhen laiah chuan a zah te pawh a ram pum dinhmun ngaihtuah chuan a zahthlak thei deuh roh. Kan sorkarin pawisa a nei lova, sorkar hnathawk hlawh hial a hrensak kan ti dawn nge a hmang puk kan ti dawn, kan insingsa mup mup a. Mipui mangangin Chief Minister Relief Fund-ah pawisa an chhung lut ruih ruih a. Chutih lai kara kan hri do ber endikna khawl hlan thlak hleih theih lohva Lunglei Civil Hospital leh D.C. pisa inkar vela a vir tawn ta mai hi a mak ngawt a ni.

‘Sai an insual chuan phul hnimin nasa takin a tuar thin,’ an lo ti a. Chunglama engemaw a awm avang hian kan hripui finfiahna khawl chuan hna thawk thei lovin a awm lohna turah min awmsan dawn ta mai ni te pawhin a lang a. A tuartu tur chu mipui kan ni. Keini ang duang lo ngaihdan chuan a rang a rangin he khawl hi bun tur ni awm tak a ni a, mahse heti hian a awm ta tlat mai a, kan hrethiam ve ta lo a ni. Hetiang hi thil awmdan a lo nih takah chuan he khawl thawnthu hi eng nge ni chiah tih te pawh hriat a chakawm ta zek zek mai. Kan ngaih ropui ang hu ai hian engemaw ṭawngkam in hriat fuh loh vang te, thil ngaihhai palh vang te leh chhan leh vang ril tak engmah awm hauh lo hian he khawl hi Lunglei khawlaiah a taihai te pawh a lo ni reng thei a. 

Thil ho nuihzatthlak tak engemaw mai mai vang pawh a ni thei ve tho bawk. Eng pawh chu lo ni se thil mak ve tak chu a ni.

Covid19 do nana pamphlet siamna tur cheng nuai sawm hian sawi a hlawh hle niin ka lo hria a. Dik tak chuan lehkha chhut leh a kalhmang hre tan chuan a tam deuh hlek chuan a lang. Cheng nuai sawm man lehkha sem tur chu tam tham ve tak a ni a, sem ral pawh huphurhawm tham tak a ni ve thei. Pakhat chhut man cheng li cheng nga lo ni ta se, Mizorama a chhiar thei zawng zawng hi chuan kan chang kim pha vek dawnin a lang a, a ṭul chen chen lovang tih pawh hlauhawm a ni.

Pawisa hi a chang leh kan nei viau ang te hian a inngaih theih a, a chang leh nei lo viau ang te hian a inngaih loh hleih theih lova. Hetianga pawisa kan hmang a nih chuan thawhlawm lampang chi hi chu thawh tur chuan thilphal fe a ngai dawnin a lang. Ṭhahnemngaia mi ṭhenkhatin an mimal pawisa an thawh laia a hmanna lama kan pawk viau si a nih chuan thawh zel tur chuan ngaihsam a ngai tel deuh hial ang.

Kei chuan he khawl ropui tak mai kan dawnsawn dan hi ka hrethiam pha lo hle a ni.