LIRTHEI LEH A KAIHHNAWIH

Sap thufingin, ‘Tihdam ai chuan inven hi a tha zawk,’ a tih chu kan hre ve. Mahse inveng turin chakna te, huaisenna te leh finna te kan nei miau lova, buai tawh hnu chinfel tum a rorum angreng taka rorel leh mai thin hi kan tihtur niin a lang. Invenna tha ber chu dan kenkawh that hi a ni phawt mai a, chu lam ai chuan dan thlahdul a vote hmuh tum hi kan tuipui tawk a ni ngar ngarin a lang a. Engemaw changa rorum angreng taka ro han rel leh thin te hi chu kan tih ve tur reng a ni.

Lirthei intlan chhawkna thupek kan han zawm leh tan ta a. Kan Aizawl khawpui lirthei tawt hian eng ang takin ziaawm phah maw. Ziaawm phah langsar vut vut lo mahse engemaw chen chu a ziaawm phah ang tih a rinawm a. Beiseina nen taima takin zawm phawt ila a tha ang.

Lirthei inhnawh tawt a ziaawm theih nana khawpui zauh tih te lah kan tuipui zawng a ni lova (PC Ministry-in Govt. Complex a siam kha Congress sorkarin an tizuzi satliah mai lova, sorkar aṭanga compensation dawng fel thlap tawh te pawhin an compensation lak pe kir chuang si lovin an in hmun kha an nei let leh ngat a), kan kawng mil tawka lirthei khuahkhirh kan tuipui lo rei bawk si a (MNF sorkar khan Taxi permit kha a phalrai lutuk a, Bus permit a pe tam bawk si a), a tawpah chuan rik rup rup lo hi chu hmabak kan nei lo.

Mi tam takin harsatna engemaw chu kan tawh phah ngei ang a, mahse kan harsatna te chu kan mimal thilah ngaiin mi tam zawk tana awlsamna tur leh kan vaia tana awlsamna tur kan rilruah awm se a tha khawp mai. Kan khawpui lirthei awmdan en hian heti ngawt lova awm tura engemaw tih a ngai tih chu a lang reng mai a, mipui tam ber tana nawmna tur leh thil tha tur chu khawilai tu emaw tan chuan lem sak fet fawt tak a ni ngei dawn tih hi hriat tlan a tha hlein ka hria.

Thil a fel tawh loh hnu a siamtha leh tur hi chuan buaina tam tak a lo inphum tel tawh thin avangin a tir aṭangin thil hi uluk taka tih ni thei se a duhawm em em laiin kan sorkar bawk hi he kum 30 chhung vel hian kawng hrang hrangah a ningnel hle niin a lang a. Sorkar dan fel leh khawng tha tak awm lovin mimal induhsak theihna kawngka hi kan hawng zau angreng a. Sikul hrang hranga zirtirtu awmdan tur (posting) siam fel hauh lovin mimal insawi thiamna leh mamawhna anga kan ngaih hmangin a tlachawp zelin ro kan han rel a le, a tawpa kan awmdan hi chuan nuih pawh a tiza seng zozai ta meuh lo niin a lang. Chutiang bawkin in sak dan chungchangah pawh a hawihhawm deuhvin kawngpui an hlat deuhva, a hawihhawm lo deuhvin an hnaih deuh mai ang chauh a la ni tho mai. Kan lirthei neihdan pawh hman hmanah ‘A dahna nei chauhvin motor neih tur,’ kan ti ve bawk a. Mahse dahna tur nei hawt lo chiang sa tam takin an lei thei tho mai a. Thil chi hrang hranga kan del dulzia leh sorkarin dan a kenkawh loh nasatzia han en hi chuan, ‘Kan sorkar hian a eng tak hi nge maw a thawh aw?’ tih mai a awl rum rum a. Kan sorkar hotute hian an thawh tur ni hauh lova kan ngaih hi an thawh nasat em avangin an buaina tawk hi chu an lo hmu ve mai. Entirnan, an tel ve kher lohna tur ni a kan rin, khawi Department a hnathawktu lak dawn emaw te hian an lo buai ve em em a. Contract hna anga lang chi zawng zawng hi an sem tur emaw an ti a, sem deuh reuh, sem fai vek bik lem si lo hian an buai teh zawng a nih hi. Hetia an buai em avang hian mi zawng zawng huapzo dan tha an siam hman mawlh lo.

Tunah kan Aizawl khawpui kawng a piang belh tawh si lova, a motor lam lah nitinin sawmhnih sawmthumin a tam belh char char mai si a, kan buai dan hi chu nasa tak a ni ta. Bawngkawn paltlang tur sawn a khawi zawng pawhin tihfuh loh tum chuan darkar hnih te a ngai a. Aizawl khawpui tlan tlang tur hian darkar engzahnge miin a mamawh sawi theih a ni ta lo. A chang chuan chhunlaiah te hian ding mang lovin kan tlang leh nawlh thin a. A chang erawh thung chuan kan khawlai hi manganthlak tak a ni.

Kan lirthei che vel awmdan tiziaawm tur hian engemaw a tih a ngai tih hi a chiang. Chu ‘engemaw’ chu a eng ber hi nge dik ber tih tunah sorkar hian a hre fuh chat lo a ni maithei a, mahse engemaw chu a tih a ngai tlat tih hi hriat a tha hlein ka hria. Tuna lirthei nambar hmanga intlan chhawk kan tih hi a lo fuh lo viau thei a, a tha phian thei bawk. Chuti a nih pawhin a chhiat a that hre tham khawpin rei tawk tak chu hman a tha khawp mai. Kan mimal duhdan theuh nena inrem chat chata thil buai laklawh tawh chinfel dan chu khawvelah a awm ngai lo.

Heti khawpa kan kawngpui a tawt tawh hnu pawh hian kawngpui kama mimal in sa tur hian kawngpui an rawn chhim theih chin tur hi kan la bithliah fel ta hauh lova. Kawng aṭanga hla ve deuh hlekah ban pui phun mahse a tawpa an kailawn rawn inkhawh chhuahna tur leh vantlang ram an ei chin tur pawh engmah siam fel a ni leh chuang lo a ni tehchek ang chu kan awmdan teh zung hi a hmuhnawm letling phian.

Motor number a zira tlan theih loh ni siam hi a hmana hman hma hauhvin tute emaw chuan tlan theih bikna ‘permit’ an lo nei leh hman tawh ni awmin mi thenkhat chuan an sawi a. Tak tak ni maw. Thildanga kan awmdan teh nuai en hian tak tak pawh ni se mak tih tur a awm lovang. Mahse khua leh tui tha chuan thu awih takin i zawm phawt mai teh ang.