THAWNTHU

Pu Lalkunga leh Pi Thangi te chuan Pathian malsawmna dawngin fa pali an hring a. An fate chu hmeichhia pahnih leh mipa pahnih an ni. Anni nupa hi thingtlang khaw lian vak lova cheng, chhungkaw naran tak aṭanga lo seilian, nulat tlangval laia inhmel duh a, innei ta an ni a. Kut hnathawka ei zawng, chhungkaw dang tam tak ang a lo nei, remchang apianga inhlawh an ni.

An fate chu an lo leikang ve zel a, Wadi-ah te kalin Pathian zarah hrisel loh pawh nei hran lovin an khawsa chho naw naw a. An thawh chhuah an ei a, an hlawh chhuah apiang chu an pawisa neih chhun a ni zel a. An faten Wadi an han pelh aṭang chuan an lu a hai chho tan ta miai miai a.

An khuaah chuan sorkar sikul a awm a, mahse zirtirtu nei mumal lova an awm rei tawh avangin nu leh paten an fate luhtir an hreh tlat a. Khawchhung titi-ah chuan an khaw zirtirtute chu khawpuiah an awm niin an sawi a. A then chuan an khaw zirtirtu tura an dah, an sawn te khan an insawn rualin an khaw zirtirtu nihna chu khaw dangah an pempui zel niin an sawi a. A then lahin an khaw sikul chuan anmahni pualin zirtirtu an nei lo hrim hrim niin an sawi bawk a. Thenkhat lahin zirtirtu an indaih lo ve hrim hrim niin an sawi a. Thenkhat lahin khawpui lamah chuan zirtirtu an tam lutuk a, sikul thenkhatah phei chuan zirtirtu leh naupang an inzat niin an sawi. Mipui mimir tan chuan a eng ber nge an dinhmun pawh hriat a ni lo. Mahse zirtirtu an nei mumal lo tih erawh an chiang.

An khaw sikulah chuan zirtirtu an awm mumal theih tak reng reng lohvah chuan mi thahnemngaite’n Private sikul an din ve ta ngawt a. Pu Lalkunga leh Pi Thangi te tan chuan Private sikula fate han dah loh chu a tlawmthlak a, chu chauh ni lovin a thlaphanthlak a ni. Mahse an dinhmun an han en a, Private sikulah chuan fee chawi a lo ngai a, an fate pahnih emaw an dah chuan an khawsak a buai dawn tih an hre kiau mai si a. Chu chauh ni lovin a dawt leh an dah chhoh a ngai zel dawn bawk a. An dah loh lah chuan an faten puitlin hunah rual an ban zo ve lovin thiante an phak lovang tih an hlau si. Sum tuakin tan han la dawn se an khaw kawng, khaw thenawm nena an inkar kawng km sawmhnih chuang emaw lek lah chu a piah leh lam km 100 aiin a kal a huphurhawm a, tisa thil tak pawhin a kal a hautak a, hrisel veng vawng tan lo chuan motor chuan ringawt pawh huphurhawm a nih nak alaiin motor chuan man te lah a to em em zui a. Chuvangin, a theih phawt chuan zin chhuah chu an pumpelh hram hram thin. An fate sikul fee tur tuakin tan han la dawn se an khaw chhungah tihngaihna a awm lova, an neih ve theih chhun thlai lah a phurh chhuahna man a to dawn tih hriat sa reng a nih avang leh kawng chhia avanga an kal chhung a rei avangin an thlai thar, hmun danga zawrh ve chu a tina tin chi a ni si lo. Chuvangin an tan sum leh pai tuakna a vang em em mai. An lu a hai a, tapchhaka an han thu te chu kim lo engemaw awm tlat hian an inhre hial a.

An khaw sikul chuan chanchin thui tak a nei a. Sorkarin sikul a dahna chu kum 30 vel lai kal tawh kha a ni awm e. Zirtirtute pawh a tirah chuan pangngai takin an awm ve dawn emaw an ti a. Mahse an pangngai chhung chu a rei lo. ‘Thiltithei’ an tih mai te chuan an khaw zirtirtute chu an sawn chhuak zeuh zeuh a, zirdan thar that hmel tak tak an tlangaupui dup dup laiin a zirtirtu tur ber chu an awm thei tlat lova. Zirlaibu te han thlakin zirtir dan thar, fail theih loh te an tih te chu sawi mah se Pu Lalkunga te nupa chuan an man thiam vak lo. A chang phei chuan, ‘World Class’ te an sawi awm e. A enga pawh ni se an buaina hmasa ber leh hnuhnung ber chu zirtirtu a ni. Zirtirtu ber mai chu an tam chang chuan panga paruk te pawh an awm ve thinin an sawi, mahse awm tur anga ngaih awm miah si lo te, awm reng si zin reng mai te, an khaw sikul hminga hlawh la, an khua tlawh hauh lova khawpui khawilai Office a thawk ta emaw te an awm ni awmin an sawi.

An sorkar zirtirtu zinga an khaw mi awmchhun chuan taima takin chowkider hna nen, zirtirtu nih nen, Headteacher nih nen a kawp hi a ni hrim mai a. An V/C te leh an Party Unit te chuan ‘Hotute hnenah kan thlen,’ chu an ti ve thin ngei mai a, mahse zirtirtu an neih belh thei lova. A sawitu inti te chuan a chang chuan anmahni hlawkna tur therhlo tlemte te hi an rawn hawn thin a ni awm e. A sawi theitua an ngaih te chuan Private sikul fee chu an nei deuh alawm le. A chang leh nula nalh angreng fe te an lo lang nawlh a, chawlhkar hnih khat hnuah an bo leh daih a. A then phei chu chawlhkar kar pawh cham lo te pawh an awm. A chang leh zirtirtu an lo thleng khawm a, pathum pali te an han awm ve hial a, an lawm viau thin. Mahse chutianga an lo thlen khawm tawh phawt chuan sorkar milian, Minister emaw, sikul lama thuneitu sang tuemaw hi a lo kal dawn tihna a lo ni chawk a. Hotute kal liam rualin a then chu hotute motor-ah an chuang haw leh a, a then chu ni hnih khat an cham chhunzawm a, reiloteah an bo leh diak tho tho thin.

Chutiang chu thil awmdan a nih avangin Pu Lalkunga te khuaah chuan nu leh pa thenkhat pawhin an fate chungchang sawiin, ‘A, keini zawng a tihngaihna kan hre lo. An thiante luhnaah lut ve dawn se kan tlin ngang si lova, sorkar sikula luh lah chu a thiante an awm si lova a hreh ve tlat si a....’ an ti hliam hliam a. Sorkar sikulah chuan a thlawnin chhun chaw an dawng a, Uniform an dawng a, zirlaibu an dawng a, thlatin fee chawi a ngai lo chungin thei leh thei lovin Private sikulah mi tam zawkin an fate an dah a. Private sikulah chuan thlatin fee an chawi a ngai a, harsa an ti em em a. Uniform lei te a ngai a, zirlaibu lah inlei chawp vek a ngai bawk si. An harsatna te leh an hahna te chu nu leh pa chuan an han sawi khawm sateh thin a, an tan chuan tihngaihna a vang em bawk a ni. Lungawilo mah se engtinnge an tih chuan ang?

Tumkhat chu an khaw thenawmah Pu Lalkunga chu a kal a. Mi lian tak, lal zet mai, vengtu leh tawiawmtuten an hual thup, han en reng reng pawha pawimawh tih hriat tak mai, dawt sawi tura rin harsa tak mai, fai vung mai chuan thudang karah zirna chungchang a sawi zuah zuah a. A sawi zawng zawng chu hrethiam lo mah se a sawidan hmang chuan zirna kawngah sorkar chuan theihtawp a chhuah reng a, a chhuah zel dawn a. A awka han ngaihthlak chuan a thlamuanthlak ngang mai. Mahse kha mi zahawm tak thusawi a hriat aṭanga kum nga dawn lai a liam takah leh an khuaa zirtirtu an neih hleih theih loh avanga hautak taka Private sikul an belh a ngaih takah chuan Pu Lalkunga chu a indawm kun vawng vawng a.

Pu Lalkunga te dinhmun anga ding hi Mizoramah engzah nge awm tih chu tuma’n an hre thei lo nain a nghawng erawh kum lo kal zelah duhawm lo takin Mizoramin a la hre dawn tih erawh a chiang hle.