LEHKHABU PHO RUNPUI

Kum 2022, October ni 25 leh ni 28 inkarah khan Vanapa Hall bathlarah Mizo Writers Association chuan lehkhabu pho chhuah runpui a buatsaih a. Thil chhinchhiah tlak tak a ni. He Lehkhabu Pho Runpui (LPR) hian pawimawhna leh fakawmna hrang hrang a nei a. Chung zinga thenkhat chu hetiang hi a ni.

1. Mizoten Social Media kan han hmelhriat a, lehkhabu kan dahtha sauh sauh a, mahni phone kan bih ta tluar tluar mai niin a lang a. Keini Mizo chauh pawh ni lovin khawvel hmun hrang hranga thalaite chuan kan phone kan bih nasa ta a. Kan zirlai naupang zingah pawh mahni zirlai ngawr ngawr bak eng lehkhabu dang mah chhiar mumal hauh lova College rap ve ta hial te pawh an awmin a rinawm. Lehkhabu kan hlamchhiah nasa ta lutuk hian pawi a khawih nasa hle ang tih a lang mai a. Lehkhabu tel lohna khawvel chuan kan hriatna a titawi a, kan nunphung a tipawnlang a, kan khawthlir a tithuanawp zo vek a. Social Media kan hmelhriat ve hma kha chuan IAS-ah te khan kan tling ve fova, mahse changkang anga kan lan tak hnu hian kan tling thei ta reng reng lo mai te pawh a tih theih ang. Hemi lak ata min tiziaawm tur a hetia lehkhabu a hring a hrana pho chhuah a'n ni ta leh tlawhtu an han insul ta nuai nuai mai hi chuan lehkhabu chhiar hi kan lo la hlamchhiah fel thak lova, chhiar duh leh chhiar peih kan lo la awm tih a rawn tarlang a, mi thahnemngai tan chuan thlamuanpui sawt tlak hial a ni. A rawt chhuaktu, Mizo Writers Association hruaitute an fakawm e.

2. He lehkhabu pho runpuiah hian lehkhabu 31 ngawt mai, a rualin tlangzarh a ni a. Hetianga lehkhabu hrang hrang a ruala heti zat tlangzarh hi a ropui a nih loh vek pawhin a danglam hrim hrim. Hetiang tur hi chuan vanneihna te, remchanna te leh thildang tam tak a intawn fuh a ngaiin a lang. Mizoramah chuan hemi tuma lehkhabu tlangzarh hi a tam ber lawt lakin a rinawm a, khawvel hmundangah ti ve tak maw. A tlangzarhtu atan Pu R.Lalrawna, kum 2021 a lehkhabu letling thiam ber lawmman dawngtu ruat a ni leh zel a, a lawmawm lehzual. Hetiang thila hriatna leh tuina nei mang lo Politician hman leh mai thin hi tam tak tan chuan ngaih hlut a harsa viau mai a. Pu R.Lalrawna an han hmang hi a inhmeh a, a ropui lehzualin a lang.

3. He lehkhabu pho runpui hetia buatsaih theih a nihna chhan hi Ministry hmasa (Congress sorkar) a Finance Minister, Pu Lalsawta, tuna Congress Party President ni ta hi a lo ni a. Ani kha Finance Minister a nih lai khan Mizo Writers Association hian an thiltihnaah an sawm a, chutah chuan an dil pawh ni lem lovin ani chuan, 'In mamawh awm em mai,' tiin 2018 khan cheng nuai riat a pe a. Amah Pu Sawta hi lehkha chhiar mi satliah ni lo, lehkhabu ropui leh lehkhabu tha te chu tuipui tak mai a ni a. Hetia a'n ti hi a inhmehin kan ram hruaitute zingah hetianga ti awm ber te pawh a ni ve tho mai. Chu an pawisa hmuh chu Writers Association chuan kum 2019 khan Lehkhabu Pho runpui neih nan te chawlhkar khat zet an han hmanpui a. Kum 2019 vek khan Khampat, Tahan lamah Writers Tour te neiin mi pakua zet an han zin chhova. An zinna chanchin chu lehkhabu a chhuah nan te an han hmang bawk a. Chu chauh ni lovin Computer leh a Printer bakah Almirah leina tur thlengin tunah hian pawisa an la dah tha ta ran a. Chubakah Ziak Mite Chanchin tih lehkhabu Bu 3-na chhuah nan an hmang a. Synod Conference Centre-ah Seminar puitham tak an buatsaih bawk a. Tunah heti hian Lehkhabu Pho Runpui neih nan an hmang leh ta a. A hmang dik thei kuta a nachang hriain cheng nuai 8 a pek khan heti khawp hian hman tangkai a hlawh ta a. Pawisa hi a tam lam ai chuan a hmandan dik hi a pawimawh mah mahin a lang. Pawl thenkhatin pawisa an hmuh chuan eng anga tam pawh hmu se engemaw hlek an huaihawt chuan a zo nghal zel a, Mizo Writers Association kuta pek a nih chuan kum thum chhung duh duh tih theih phah nan an hmang a ni ber a. An pawisa hmandan hi endik a hnehin khawimaw laiah chuan a pawl hruaitute hian an pawisa an hmang nual awm mang e tih tlak a ni.

4. He lehkhabu Pho Runpui huaihawt tur hian Organising Committee mi pali lek an awm a. Fel takin engkim an ruahman a, fak leh hranpa vak hian kan tibawrhbang zovang tih hlauhawm khawpin an huaihawt fel mai.. Mihring hi rinawm a, mahni tihtur hriat chuan mi tlemte pawh hian hna ropui tak a thawh theih a. Puithu tak maia Committee zahawm tham siam rup rup te hi hlawhtlinna a ni ber lo thei tih a tilang chiang viau. A ngaihna hre mang lo, ngaihchan ngai ve duah si inruat tlar dul ai chuan a ngaihna hria leh mahni tihtura rinawm mi tlemte hi an tha zawk daih thei tih finfiahtu zinga pakhat a ni.

He Lehkhabu Pho Runpuiah hian lehkhabu sanghnih chuang pho chhuah a ni a, ni nga chhungin cheng nuai kaw chuang man lehkhabu hralh a ni. Mizo tawng lehkhabu zawng zawng hetah hian pho chhuah a ni lo tih han hriat phei chuan a thlamuanthlak lehzual. Zofaten lehkhabu heti zozai kan lo nei ve ta hi a lawmawm a, mitdel hawrawp chungchang ziahna thlengin pho chhuah a ni. Lehkhabu ngaisang thenkhat, Zirsangkima te leh midang thenkhat te pawh a hralh tam pawl ni hauh lo mah ila nuam ti ve hrim hrim, mahni piancham lawmna emaw ti ni awm fahran a nuam ti kan awm a. Thenkhat thungin an lehkhabute an ngaihsak hman miah lova, lehkhabu pho chhunga rawn lang hman ta miah lo chung a lawm taka awm thiam an awm a. Thenkhatin an lehkhabu zawn ngat ngat thin, a leina tur an hriat tawh si loh, he lehkhabu pho runpuia an han thur chhuak nalh nalh te chu hmuhnawm leh lungawithlak tak a ni. Thenkhatin ni hnih ni thum chhungin puar el euhvin an ipah lehkhabu an thun a, inah an va dah a, an rawn kal nawn leh thin.

Thu leh hla hlutzia leh ziakmite hlutzia te ngaihtuah a, cheng nuai riatin hna a thawh nasat theihzia ngaihtuahin he lehkhabu pho runpui hi a hlu hle a ni.