KUHVA BUAINA

Hmanni lawk­ah kuhva rah chung­changah nasa takin Mizoram kan buai a, kan buaina chu engemaw ti tiin Assam State-in min chinfelsak a ni ta ber mai a. Dik tak chuan keini State chhungah chuan dan lova kuhva tawlhtu ni a mipuiin kan hriat te kha dan lek kawhtu tura ngaih kan sorkar chuan a hum tlat niin kan hria a. Dan lova bungraw tawlhtute kha an ngampa mai pawh ni lovin an huangtau hial niin kan hre thup a. Sorkar berin a ngaimawh ve tlat si loh avangin a tihngaihna tak kha kan hre lo a ni ber mai.

Tichuan, kuhva tawlh kawnga a kipui deuh ber ni a hriat, Abu Mazumder-a chu Assam sorkarin man tumin a veh a, a man te pawh a man ta kha niin kan hria a. Kuhva tawlhtute chuan Assam State paltlangin an phurh theih tak lohvah chuan kuhva ro, Mizoram chhunga an rawn chhek sa pawh chu kan hmalakna vang pawh ni lovin a reh ve ta niin kan lo hria a. Kan thawh ni lem lo avang chuan Mizoram chu Smuggling chungchangah engemawti fihlim hlima fihlim ang deuh reuh chuan kan awm ta a.

Tunah hian dan lova kuhva ro tawlhtute chu Assam State leh Mizoram lam mite kan inthlahdah deuh an rin vang ni maw, tharthawh leh tur angin an awm ni te pawhin a lang. Hei hi chu thudang ni se, a hma lama kuhva ro kan lo tawlhtir vak mai khan kan State chhungah hlet buaithlak tak mai a rawn chhuah leh ta niin a lang. Mizorama kuhva rah thar chhuaktute, Hachhek biala kuhva nei te chu an mang a ang ta hle mai. An kuhva rah, kum danga tluang tak leh tha taka an hralh thin chu an hralh thei ta hlek lo mai a. A chhan pawh Assam sorkar chuan kuhva rah reng reng, Mizoram atanga Assam ram chhunga phurh luh a khap a, chu khapna chuan Mizorama kuhva thar dik tak te chu a huam tel ta tlat a. Kan kuhva hralhna hriat chhun lah chu Assam ram emaw, Assam paltlang emaw chauhvin a ni bawk si a. Tunah hian kuhva chingtute chu an kuhva hralh hun tawh hralh thei lovin an awm ta thup mai a. An eizawnna leh an innghahna ber a nih si avangin an tan mangan loh theih loh a ni.

Kuhva rah a innghat, huan neitute manganna buaithlak dan tur hi chu nasa tak a ni. Entir nan, sorkar hnathawk, Police te ang hian an hlawh hi thla tawpah la lo ta sela an buai viau ang a, thla ruk hlawh an lak loh phei chuan an buai ang - hlawh chauh ring an nih phawt chuan. Mahni hlawh chiah ring sorkar hnathawk reng reng chuan thla ruk hlawh lak loh chu tlin har tak a ni. Kuhva chingtute hian thlaruk hlawh chu sawi loh, kum khat hlawh an la lo tihna ang a ni a, buai a, mangan loh theih loh a ni. Sorkar hnathawkin a thlabi hlawh a lak theih loh chuan sorkarin a hlawh kha a ba reng a, a lak loh ang ang kha kum khat hnuah emaw, thla khat hnuah emaw a la leh mai dawn a. Kuhva erawhchu chutiang a ni ve lo. Vawiina riral hi a riral hlen kumkhua dawn.

Kuhva rah hralh theih loh dan te, a buaithlakzia te leh kuhva huan neitute manganna leh an thlai thar hralh tura an beihdan zawng zawng chu kan sawi lo mai ang. Nitina inhlawhfain a hlawh la thei lo se, serthlum huan a innghat ten an serthlum hralh thei ta lo se, thlai dang chingtute pawhin an thlai chin hralh thei ta lo se an tan a buaithlak dan tur chu a hriat theih vek. Kuhva erawh a danglam bik. Kuhva rah, tuna a chingtute buaina hi a danglamna ber pawh a tam tham a, a chingtu leh a hralh thei lotute hi an tam thamin an pawisa hloh tur hi a tam bakah an hralh theih lohna hi kan State pawn a ni a, chu chuan kan State chhunga pawisa lo lut tur a nghawng ta tlat a ni. A chingtu chhungkaw mal mai ni lo, he kuhva hralh theih loh hian Mizoram pumpui pawisa dinhmun a nghawng thei tlat a, a nghawng ngei dawn bawk. Mizoram chhunga thawhrim rah atanga kan lei chhuah tur, pawisa tam tham tak mai, cheng nuai sangruk vel lai, State pawn atanga kan lak luh tur chu a awm ta lova, chuti a nih chuan pawisa virvel hi a tlem ngei ngei dawn tih a chiang.

He pawisa vir vel lo tlem ta hian kawng hrang hrangin Mizoramah hlet a chhuah ang. Hetiang pawisa tam tham leh kuhva chingtu tam tham te tawrhna hian midang, Hachhek biala cheng ve hauh lo hi nasa takin a nghawng ngei dawn. Thil hi a inzawm thui khawp a, chu a inzawmna chu ngaihtuah lova mahni hmazawn chauh kan thlir chuan chenhona khawtlang nuam lo leh ram nuam lo kan siam chhuak mai tih hi thudik tlawngawl, sawi nawn zahthlak khawpa dik leh langtlang sa a ni. Mahse chuti khawpa thu mawlmang anga lang chu dan bawhchhetute chuan an pawisa lo. Champhai velah khehpuam leh kuhva tawlh tih angreng a hluar chuan Aizawl khawpui in hmunin a to phah zo vek a nih hi. A tha lamah ni se hmana Taitesena te tlawmngaihna khan vawiin thlengin Zofate chu min la khalh a, chu tlawmngaihna thlarau chuan he Zoram hi ram nuama a siam hram kan la beisei a ni. Chutiang taka kan inzawm a nih si chuan he Hachhek bial buaina hi kan buaina a ni ngei ang.

Kuhva ro, dan lova kan lo phurhtir chiam mai kha a hun laiin a pawi a, a pawina kha sawi sen pawh a ni hial lovang. Leilung hmangaihtute tan chuan duhna lai laia kuhva phurhna kawng an han sial mai te kha tahpui tham khawpa pawi a ni thei a. Naupang thanlenna ngaihtuah mite tan chuan Champhai leh Zokhawthar chheh vela naupang tam tak, sikul kal lova kuhva thiara inhlawh duh vanga zirna bansan te kha ngaihtuahawm tham an ni a. Mihring rilru kalhmang leh khawtlang sukthlek ngaihven mite tan chuan sum leh paiin khati tak mai a kan khawchhak unaute, Mizo nun zemawi vawngtu anga kan lo ngaihte nunphung a sawi nghing nasa kha lungchhiatthlak tak a ni. Kelkang ropuina leh Kelkang thlarau zawng zawng kha tunah chuan vawm bo ang a ni ta hial law maw tih tur a ni. Mizoram sorkar zahawmna hi kha kuhva ro phurh vang khan eng chenin nge a tawlh hniam ang tih ngaihtuah tham a awm. Dan lova kuhva tawlhtuten Champhai D.C an hek a, sawn a nih zui tak dan te; Champhai a motor khalhtu pawl pakhatin thuneihna inpe chawp a, lirthei kal an dang ve ringawt ngam ta mai te; kuhva phurh duhtu Smuggler-ten TV-ah a dangtu lam thiam lohna thu an sawi pang pang ngam ta mai te kha dan rorelna atanga thlir chuan bei tidawng tham hial a ni hlawm.

Tunah Mizoram sum hnar lian ber zinga mi, thawhrim rah Mizo kuhva hring hralhna chuan harsatna a tawk ta mek a, a lungchhiatthlak takzet a. Mizoram chhunga kuhva ro, dan lova phurh luh sa la awm nghek nghuk te hi Assam sorkarin kan kuhva hring phurh chhuah a phal theihna a nih dawn phawt chuan kangral vek mah se kan la hlawk zawk thovang. Kan sorkar hian heng kuhva ro, dan lova heng thleng thleng (Vairengte dai te leh Champhai zawl te leh hmundang) a rawn phurh luh te hi thil tha lo titute avanga kan lungngaih chhunzawm zel loh nan thianfai vek se a duhawm hle mai a. Sorkarin mi leh sa a nei daih lo deuh a nih pawhin tlawmngaiin thenfaipui thei ila a tha ngawt ang.