MIZO AWARD

Mizo Award chu December ni 1, 2022 zan dar 7.45 khan Dr Tawnenga, Pachhunga University College Principal hlui hnenah hlan a ni a. Inkhawm felfai leh tawite zahawm tak buatsaih a ni.

Mizo Award hi tunhmain Chief Minister hlui, Brig. Thenphunga Sailo hnenah hlan a lo ni tawh a, Joy Pachuau hnenah hlan a ni tawh bawk a, Dr Tawnenga hi he Award dawngtu pathumna a ni.

He Award dawngtu tur hi a thlangtute hian an thlang uluk hle mai a, mi naran leh mi satliahin dawn chi awzawng a ni lo. A thlangtu lamin tehfung hrang hrang hmang a uluk taka an en a, dawng tlak ngei ni a an hriat te hnenah chauh pek a ni.

Dr Tawnenga hian Pachhunga University College a enkawl lai khan kawng hrang hrangin a chawikang a. Kawng hrang hranga College-in hma a sawn theih nana thawktute zingah thawhhona tha a tuh kha a ropui pawl tak a ni a tih theih ang. An College result a tha a, result tha ringawt ni lovin College naupangte khan kawng hrang hrangah tih an neiin Mizo nun te kha engemaw ti takin an inzirtir a, he College aṭanga zir chhuak te chu college dang aṭanga zir chhuak te ai chuan danglam deuh ta sela a mak lovang. Hemi bakah hian College-in a mamawh building leh hmunhma te nasa takin buatsaih a ni a. India ram pumpui college endiktute pawhin he hlawhtlinna hrang hrang hi rawn hmuhpuiin India ram College tha ber pawl zingah Mizorama kan College upa ber chu chhiar tel a lo ni ta.

Dr Tawnengan hetiang a tih theih chhan, mi tam takin kan ngaihtuah hauh loh tur leh kan hriat loh tur pakhat chu eiruk lohna hi a ni. UGC nge, NEC nge, Mizoram sorkar nge kan hre ve si se lova, sum leh pai hmangin College building te an sa a, tunhmaa College-in a neih ngai loh thil tha tam tak mai leh man tam tham tak tak College-in a nei thar a. Chung an neihna kawngah chuan sum duhin lo chan ve zel tumna rilru chu nei ngat se zirtirtu leh hnathawktu zingah chumi man thiam phak chu an awm ngei ngei ang a, chu chuan hnualna a thlenin mihring inzah lohna a thlen ang tih hi a chiang.

'Sum chu awm se a tih theih,' titu tam ber hi chu sum pe ila pawisa tam loh thuin a hmawr an bawk fova, chu chuan an pawisa chelek dan dik lo hmutu a siam chhuak a, phurpui theih lek lohvin mihring rilru a nawr kawi tawh thin. Thil tha tam tak hria a, sawi zung zung leh thiam taka sawi tlawr thin te hi thil tihlawhtling lem lo an ni ve fova. An hriatna leh an sawi thiamna zawng zawng chu eiruknain an khahchhilh a, an tih tur ang an hlen chhuak lo thin. A tira a daih tura sum ruahman, a tawpa daih ta lo tam tak hi a titu hi han belchiang ila, an sum hmanna dik tak sawi duh hauh lo, an senso zat dik tak sawi hauh lova, 'Pawisa hi a tlem deuhva,' tih te, 'A pawisa hi a tlem hrim hrim a,' tih te sawi mi an ni chawk. Heng hi ka tawnhriat ve tawh tlemte aṭangin fiah takin langin kei chuan ka hria a. Dr Tawnenga hlawhtlinna phenah hian rinawmna leh dikna a awm tlat a. Chu chu a kipui ber zinga pakhat niin ka ngai.

Hetianga Award buatsaih thei kan han nei ve ta hi a lawmawm em em a. Mi dik leh rinawm leh ram tana mi tangkaite tarlanna huang khat kan han nei ve ta hi Mizo tan lawmawm tak a ni. Tunhmain hetiang hi kan lo la nei ngai hauh lova, chawimawi atan te, hriatreng atan te leh ngaihhlut atan tea mi itawm tak tak - Pu HK Bawihchhuaka te, Pu C.Pahlira ten mual min han liamsan a. An dinhmun aia sanga ding, anni aia insawi tlawr thiam leh hotute leh mipui tlawn kawnga thiamna kawng hrang hrang ngah leh zahtheihna tlachham miten pawisa tam zawk leh thuneihna zau zawk hmangin ram an kaihruai a. Mahse chung mite chu chawimawi dawn ila an tawngkam chauhvin a phu a, an thiltihin a phu lo. An chetna lam apiangah rinhlelh tur a awm a, damloh nikhuaa kan hmuh thin lian tual tual ang maiin sum leh paiah an thang vum thur thur a. Chung mite chawimawina kawngah chuan mi tak tak leh rinawmna leh dikna ngainatute tan phurna tur a awm lo. Mi rinawm leh tlawmngai leh Mizo hnam tana mi tangkai te min hmelhriattir a, anmahni tar chhuahna hun siamtu, Mizo Award hi Mizoram tan thil hlu tak a ni.

He Mizo Award hlut bik em emna chhan chu a dawngtu tur thlan chhuahdan hi a rinawmin a rintlak a. Induhsakna leh inbiak thiamna mai mai leh insawipui avanga dawn theih a nih lohna hi a hlutna bulthut a ni kan ti thei ang. Chawimawina thenkhat hi chu a leia lei theih deuh reuh te hian a lang a, thenkhat chu midangin an dil loh remchan laia dil fuh vang leh a recommend-tuin a recommend thiam avanga dawn te pawh a awm thei. Mahse he Mizo Award hi chu chutiang a ni ve lo. A phu leh a dawng tur dik tak ni ngeia langin an dawng chat chat zel a, Award hlu tak a ni.