CONGRESS NIH LOH CHUAN.....

Hmanni lawkah Mizoram Chief Minister-in Bhavan inkhawmah emaw ni, Congress an nih loh chuan a chhungte pawh ni se engah mah a tih loh thu leh a ni fanu (emaw ni) pawh an in aṭanga pasal neih a phal loh thu a sawi lai video a darh chiam mai a. He thu hi ngaihtuah tham tak a awmin ka hria.

Mizoram Chief Minister chuan khatiang thu kha sawi lo se ka duh a. A sawi kha ka ṭhuthmun aṭangin pawi ka lo ti em em a ni. An chhungkaw thu a nihna lai awm mahse Party politics hi khatianga kan lak dawn chuan a ṭha lo hlein ka hria. Kawng hrang hranga an lo tanpui, an lo chhawmdawl tawh, an thu te chu a kawi a ngila zawm ve tura an beisei leh mite thlirna aṭang pawha an chhawm chhuah liau liau te pawh a lo ni maithei a. An in aṭanga pasal neih a phal lo emaw, a pasal neihnaah an chhungkua an kal duh lo emaw a nih chuan kan sawi tur a awm lo. Mi chhungkaw thu a ni.

Mahse Congress nih loh vanga an chhungte pawh ngaihsak duh lo ang khan a thusawi aṭang chuan a ngaihtuah theih ta tlat a. Chu chauh ni lovin anmahni chhungkaw huangchhung ni lo, Party inhmuh khawmna lama khatianga a sawi kha chu a pawi ka ti.

Congress nih loh vanga chhungte pawh kan Chief Minister hian a ngaihsak duh lo a nih chuan a chhungte lo phei chu kan chan a chau dawn hle tih a ngaihtuah theih nghal a. Kan Chief Minister hian Congress mi leh sa chutianga a ngaihsak bik emaw, Congress ni lo zawng te chu a en dawn a nih chuan Mizoram Chief Minister chuan Mizo mipui ai a awh zo lo hle tihna a ni thei ang.

Mizo ka ni a, kan Chief Minister hian Mizo fa ka nihna avangin se khual enin min en tur a ni lovang. Inang rau rauvah a Party mite chu lo duhsak se ka hrethiam, mihring ve bawk a ni. Engemaw chenah chuan a tihtur a nihna lai te pawh a awm kan ti thei ang. Mahse mahni chhung leh khat te pawh Congress Party mi leh sa an nih loh avanga khati khawpa en hrang duh chuan an chhungte pawh ni ve lo keini te ang leh midang zawng, Congress ni lote chu min han lainat dawn lo khawp hian a hriat a. Congress ni ve lo, an chhungte pawh ni ve lo bawk tan chuan a thlamuanthlak loh ta khawp mai.

Tunhma aṭangin kan Chief Minister hi pa dam duam mai, nelawm leh mamawh thilah chuan pan ngam tak ni thinin ka lo hria a. Mahse kum te a lo veiin lalṭhutthlengah an lo thu rei ta bawk a, thuneihna te hi an lo rui ve deuh tawh em ni ang tih ngaihtuahna min neihtir a. Mihring hi retheih luat chuan rilru te a hniam zo thin a, chan a chhiat rei tawh chuan rilru pawh a chenbeh zo vek thei a. Chutiang bawk chuan dinhmun sanga din rei luattuk chuan midangte dinhmun hriat hi a harsa ve thei a. Chuvangin tunhma leh tunhnuah pawh roreltu fing leh tha chuan mi harsa zawkte dinhmun hriat nan dinhmun hnuaihnunga awm te pheikhawk, a khat tawka inthawlh ve hram hram an tum thin a. Lal thuam hlip a mi naran thuama inthuam a, thil awmzia enchian tumin lem te pawh an chang letling thin a. Mahse kan ram hruaitute chuan chutiang lam an hawi lo hlein a hriat a. Englai pawhin an thutna nuam tak leh an dinhmun ropui tak chu luah tlat a, an nawmsakna kawl ang ang te chu chen ngar ngar an tum ni maiin a lang.

Kan MLA zingah damlo han paw bahlat thei mai te, bike a Assembly Session chhim tura kal thawm han hriat te a ngaihnawm tehlul nen chuti zawng ni lo, mahni thuneihna leh thiltih theihna zawng zawng englai pawha lek chhuah tum ram hruaitu kan nei tam deuhvin a lang.

Chumi lo lan chhuahna chu motor a MLA tih tar vek kan phurpui em em dan aṭang hian kan nihna hi miin an hre lovang tih kan hlau hle angah a ngaih loh theih loh. Kan nihna te, kan chanvo te hi tar chhuah a, chhipchhuan kual zel tur lam ni lovin mawhphurhna min awrhtirtu a ni a, thlan lal te lek phei chu a nihna dik takah chuan roreltu an nihna aia rawngbawltu an nihna lam langsar zawk tur ni awm tak a nia. Mahse keini chuan thlan dawn lai vela chhiahhlawh ang taka inlantir, thlan fel chiah a lal ropui tak angin kan hmu ta tlatin a lang a. Chu chu anmahni an inhmuh dan pawh niin a lang.

Chu zia chu kan inthlah chhawng zel a, Sorkar Officer te tak te te, an nihna kan hriat avanga khawlaia tangkaina nei hauh lo te pawhin nihna chhipchhuan (designation plate dah) chu kan uar em em a. A tangkaina nei lo lovin an tuipui niin a lang lehnghal a. Kan Chief Secretary-in hma hruai lo phei se chu kan nasa tawh viau ang. Vanneihthlak takin Chief Secretary danglam leh mi tak tak kan nei hlauhva, kan nasa lutuk tur pawh kan ziaawm phah hle.

Engpawh ni se, Mizote hi eng vang mahin inmu leh ar mai lo ila, Mizo kan nihnaah hian i inpumkhat ang u. Ngaihdan chu inang lo ngai, mahse kan ngaihdan ang lova ngaihdan neite hi misual an ni vek love. Party politics kan la na lutuk hi a pawi a, u leh nau chu sawi loh, Mizo kan nihna ang pawhin he Party rilru kal nasa lutuk hi bansan i tum ang u.