HEI PAWH HI A LA LIAM LEH ANG, MAHSE...

Engkim mai hi a liam thin.

Kan hlim lai ni te hi a liam a, kan lungngaih ni te a her liam a, kan arpa chan lai te hian min liamsan a, kan vahvaih ni te pawh a liam bawk thin.

Mahse a hun a lo thlen chuan hringfate hian kan lawmna te chu kumhlun tur ang maiin kan ngai thin a. Kan chan te hi tha reng turin kan ngai a. Kan chan that pawngpawrh vanglai chuan kan chan that hun hi a liam ang a, kan chan chhiat hun a lo la her chhuak thei a ni tih hre phaa min zilhtu leh fimkhur tura min chahtute chu an ninawm thin a, min lawmpui ve lo ni hial te pawhin kan hre thin.

Chutiang bawkin kan lungngaih ni a lo thlen chuan kan lungngaihna chuan vanpui a tawng chim dawn ta emaw kan ti a. Kan hrehawmna chuan min tuam kumkhua turah ngaiin min hnem tumtute pawh ninawm an changin kan hrehawmna min hriatpui ve lo angah kan ngai chawk. Kan hrehawm lai chuan naktuk kan thlir pha lova, chawlhkar lo awm tur kan suangtuah thiam lova, kum khat hnua kan hlim leh theihdan tur phei chu kan hre pha lo lehzual. Kan hrehawmna chuan min chenchilh kumhlun tawh turah ngaiin kan rum vawng vawng thin.

Mahse kan lungngaihna te chu a liam zel a, chutiang bawkin kan hlim ni te pawh a liam a, kan hlimna min thlentute chu a chang phei chuan kan theihnghilh a. Kan lungngaih nachhan pawh khuareiah chuan nuihzatthlak te a chang fova. Lawm lohna kara vanneihna lo inphum te kan han hriatthiam hnu phei chuan mak te kan ti zawk fo.

Neih theih loh vanga kan lungawi loh chhan, kan thuamhnaw duhzawng tak kha nikhua a rei chuan a hmel kan hmu peih lova, kan neih avanga kan lawm phah em emna kan lirthei te khan vanduaina min thlen ni te a lo thleng a. Hlawhtlinna avanga hlimna vawrtawp kan tawng emaw kan tih khan mual min lo liamsan thei a, kan hlawhtlinna emaw kan tih kha kan vanduaina bul intanna chan a chan chang te pawh zu awm a.

Chhungkaw pakhat ka hria a, an fanu duat lai chuan an duh loh zawng tak mai pasalah a nei mauh mai a. Nasa taka an duh lohna an lantir pawhin awmzia a nei thei lova, inneih that pawha inneihtir duh lovin lunghnur tak chungin an innei a. Mahse nikhua a lo rei chuan an makpa dang tha pui pui ni a an ngaihte ai khan an chhawr tangkai zui ta a, an makpa chhehchhawl anga an ngaih chu nikhua a lo rei chuan an innghahna a niin an thlamuan phah ta ber zawk a, an lawmna kungpuiah a chang ta. Thutlukna kan siam, a landan zawng zawnga dik tur anga kan ngaih te hi a fuh loh chang a lo awm fova. Kan finna chen hian mual a liam thin.

Nikhua a lo rei chuan mihring hmel te hi a lo inthlak a. Nulat-tlangval laia nuihzatthlak khawpa zei lo leh hmel chhuanawm loh ni a kan hriat te hi thangkhat lian a her liam chuan an hmel a lo zahawm tawlh tawlh a, an khawsak thatna nen inkawpin mi awhawm an ni chhunzawm mai a. Anmahni kan nuihzat laia hmel duhawm tak tak putute leh ngaihnobei tak tak, zei bawk si te zeina leh mawina khan mual a liam a, hrisel lohna leh nungchang dik lo avang tein hmana duhawm kha an lo sitawm zo vek tawh a. A hun a laia kan lo hmu duhawm mai te kha mak kan inti rum rum thin. Hun leh kum te chuan mihring hmel a chher chho zel a, a then a chher that telh telh laiin a then chu a chher sual chho zar zar niin a lang a. A then lah thangkhat lian a ral hnuah pawh hmel danglam miah lovin an thi thei dawn ta hial emaw tihtur a ni.

He khawvelah hian engmah hi a kumhlun lo tih kan kâ chuan kan sawi a, mahse thinlung taka pawm erawh a harsa ni ngei tur a ni. Kan chhekkhawl a, kan tiang vum ther thur a, chatuan daih tur ni awm takin kan pawm haw tak tun tun a. Mahse engmah hian eng chen teh vak hi a lo daih lo. Hmana kan venga in mawi leh nalh ber kha kumsul a lo vei tam meuh chuan kan thlirna mit kan thlak ta ni ngei tur a ni, a lo nalh ber ta hauh lova. Mihring kut chhuak mawina te hi chu hunin a liampui fo thin. Chiang angreng tak chu mihring kutchhuak hi zawng a mawina te a lo chuai a, a lo chul thin a, mahse chunglam kut chhuak, ni leh thla eng mawi te, thing leh mau hnah hring mawina te, van dumpawl leh zing daifim mawina te hi chu hman ata tawh a tharin hringfaten kan inrochun zel a. A hmu thiamtu apiang hmuh turin tuan leh mang ata tawh hun lo kal leh zel turah pawh a awm zel ang.

Krismas te a lo thleng ang a, hei pawh a liam leh ang. Mahni kan inhaivurna khawvel thil leh thuamhnaw, kan intuituahna chi hrang hrang leh nawmsakna te hi hunin a liampui ang a. Thlasik ni eng mawi te pawh hi her liamin thal khaw lumin a rawn thlak ang a, chu pawh ral lehin fur ruahtui a rawn baw leh tlawrh tlawrh ang a. Vawiina mi hmanhlel ber ber pawh engtikah emaw chuan mi khawhar ber pawl a la ni mahna.

Hun leh kumin a her liampui avangin kan nunah danglam tam tak awm mahse kan vawiin theuh pawimawhna hi a bo thei lova, liam tawh emaw kan tih tam tak hi a tawpna a ni mai lo fo erawh thil mak a ni. Tawp ta mai emaw kan tih tam tak hi a lo la tawp lova, liam ta emaw kan tih tam tak hi a liam mai lova. Tute hriatrengna bawmah emaw chuan kan nun hi reh thei lova ziahin a awm a. Mihringin a duh ber te zinga pakhat chu ngaina taka mi tam tak hriat hlawh nihna hi a ni.

Krismas leh Kumthar hunpui a lo thleng ang a, a liam leh ang, mi tam tak chu mahni inhaivur reng rengin an hmanhlel ang a, MAHSE mi tam tak chuan tute thinlungah emaw nui hmel leh lawmna an hnutchhiah ang. Mahni inhaivur pawlah nge i tel dawn mite thinlunga lawmna hnutchhiahtuah tih chu nangma thu a ni.

Krismas leh kumthar hlim takin hmang nang che u.