HRINGNUN CHAWMTU

Kan khawvel theuh­vah hian min hualtu apiang hi kan nihna hriltu leh kan nun hriltu a ni tlangpui a. Chuvangin thian te an pawimawh a, nu leh pa an pawimawh a, zirtirtu te an pawi­mawh a, thenawmte an pawimawh a, kan lehkhabu chhiar leh kan milem hmuh te leh kan mi kawm thin leh biak thin te an pawimawh.

Tunlaiin Social Media an tih mai, inbiak pawh tawnna leh inkawmna hmanrua, Facebook leh Whatsapp te a awm a. A hlutna tam tak awm chungin a pawina lai mi tam takin an buaipui niin a hmuh theih a. Chutihlaiin a hlutna leh a tangkaina lai ngaihtuah chuan a tangkaiin a va hlu em!

Lehkha chhiar tha peih tawh lo leh remchang tawh chiah lo, nunphungin a ken tel tawh lem loh avanga lehkhabu leh lehkhabu thehlep chhiar hman tawh lote tan thu lawmawm leh thu ngaihnawm tak tak, awmna hmun remchang apianga kheuh chhuah mai theih a a’n awm te hi chu a hlu zet mai. Hringnun kawng zawhna atana thu tha, chapo lohna tur thu te, kan dam ve hrim hrim hlutzia sawina thu te leh thu ngaihnawm chi dang dang khawi aṭanga lo kal nge tih pawh hriat chiah loh kan han hmu thin te hi chu a lawmawm thin.

Pawisa hi a hlu hle mai a. Mahse pawisa hi engkim a ni lo hle a. Kan lungngaih laia pawisaa inthlem dam tum ngawt mai chu thinrimthlak leh ngeiawm tak a ni thei a. Kan lawmna lantir nana pawisa hman tum vek hi thil lungchhiatthlak tak a ni thei. Chutiang bawkin kan hringnun chauh changa kan inhnemna atan chuan thu mawi leh hnemna thu aia hlu a awm lo hial ang a. Kan hlawhtlinna atan pawh pawisa tam tak inpek aiin tihdan dik inkawhhmuh leh ngaihtuahna dik neih te a tul zawk ang. Chutih huna kan ngaihtuahna tihlim thei thu tha leh nun hruai thei, kan Whatsapp a lo lang te hlutna hi a sang khawp mai.

Thudik, mawl leh mawi tak mai, kan rilrem zawng tak han chhiar te hi chu kan tan hian a hlutzia sawiin a siak lo. Naupan deuh lai chuan thu tha leh tuihnang nei hlutzia leh pawimawhzia kan lo hre tawk lo hle a. A chang chuan engmah sawi lova min lainattu hmel ringawt te hi he mihring hian a dam phah thin.

Lungngaih leh thlaphan laia thiante hmel a hlut tehreng nen nun kawng dik lo min zawhtir tura thian sualin min hruai kawi nasat theihzia ngaihtuahin min hualtu leh kan khawvel peng pakhat, thiante hi an lo pawimawh khawp mai. A chhe zawnga min hruaitu pawimawh ber pakhat chu kan thiante an ni chawk a. Min hual veltu zingah thalai tan phei chuan thian tha leh thian sual pawimawh dan a inchen thiak awm e. Thian tha kawp avanga mi ang pangngaia chhuak ve ta an awm laiin mi pangngai leh nunphung pangngaia nung ve mai tur, thian sual kawp vanga ruihhlo bawih a tang ta te, ngaihdan dik lo vuan a, thlah leh thiam tawh si lova, thatlai hun zawng kawng dik lo zawh nana hmang ta kan tam ngawt ang.

Chhungkaw inzirtirna leh inkaihhruaina pawimawhzia chu sawi tet theih a ni lova. A pawimawh luat avanga sawi loh law law hial tlak a ni - kan sawi buangbar zo vek zawk ang tih hlauhawm khawpin chhungkaw inkaihhruaina hi a pawimawh. Chhungkaw pawimawhna sawina lehkhabu tam turzia hi ka ngaihtuah hian a lo sawi ve kawkalhtu nih pawh a inthlahrunawm hial.

Keiin ka sawi duh ber zawk chu kan tawn leh khawvel thil inher chhuah dan hi a tangkai zawnga hmandan a awm lo’m ni tih lai te chauh hi a ni. Whatsapp khawvel te hi tunah chuan kan tlansan theih mai dan tur kan suangtuah thiam lova. Mahse thenkhat hi chuan kan ti lutuk ve deuh chuan ka hre fo thin. Awmkhawmna leh inkawm laklawh laia mahni phone khawih reng mai chi te hi chu kawm ngeih viau an harsat chang a awm thinin ka hria. Kutzungpui lem leh RIP tih han chhut mai te hi chu tam tak chuan kan sam a. Mahse a tangkaina chiah hi kan ngaihtuah lem lo. A pawina pawh awm tehchiam lo mahse a tangkaina tak hmuh tur a tlem angreng a. Chutih laiin thenkhat hi chuan kan phone bih nan leh khawih nana kan hun hman hi kan ngaihtuah lem lova, rin ai tak chuan hun kan paih tam a. Lehkhabu chhiarna hun nei hauh si lo hian kutzungpui lem chhu tur leh mi kutzungpui lem chhut sa en nan vela kan hun senso hi a tam tham ve viauin a rinawm.

Thu hlimawm leh nun hruai thei thu tha tha awm ve teuhmeuh mahse phone khawih aṭanga inzir chhuak ta erawh kan tlem viau chuan a rinawm e.