KRISMAS LEH KUHVA HRALH

Naktip lawkah Krismas a lo thleng dawn ta. Chi hrang hrangin kan hmuak leh dawn tih chu thil chiang sa a ni.

Kumina Krismas hmuaktu khawngaihthlak tak tak zingah Hachhek tlangdung leh Bilkhawthlir leh Vairengte vela awm te an tel ngei ang. Mahni thawhrim rah tel thei hauh lotu mi engemawzat an awm ang a, chung mite chu dan theih loh vanduaina avang ni lo, tute emaw thiltih zarzo emaw an ni dawn tih han hriat hian rilru a na vawng vawng a. Ngun taka han ngaihtuah chuan thin a rim lo thei meuh lo. Tuten emaw dan lovin thil an ti a, a dang theitu lamin an dan duh loh tlat avanga an tawrhna hi lo thleng a ni miau a ni.

Krismas lo thlen dawn chuan rilruah tanpui ngai te an lo lut a, mi zawng zawngin hlim leh lawm taka kan hmuah theih nan duhsakna te kan inhlan tawn thin a. Kan Mizoram sorkar hruaitu lu te hian kum danga an tih thin angin mi zawng zawng huapin duhsakna thu an sawi ri ngam ang em? An sawi tawh leh tawh loh ka hre hauh lova, mi zawng zawng huapa duhsakna thu sawi lo tur te hi kan awm em? Kan kuhva chingtute zinga tam tak chuan hrehawm ti leh rilru hahin Krismas an hmang dawn a, hetianga an awm nachhan hi kuhva tawlh ruk vang a ni. Kuhva tawlh ruk kan tih hi a ruk tak tak pawh a ni chiah lo, kan Mizoram sorkarin kan thar chhuah a ni hauh lo tih hre chunga Mizorama thar chhuah anga lehkha siamsakin bul kan tan a. A tawpah chuan heti hian kan unaute, kuhva huan neitute tan tah leh rumna kan thawk chhuak ta a ni kan ti thei ang. Kuhva huan neitute chhiatna tura bei ngar ngar a, a tawpa hlim taka awm tura duhsakna inhlan leh lawi si hi kuminah a awm em? Kuhva huan neitu, hralh theih loh vanga kum tina kan chhungsaw sum lak luh ve thin la lut thei ta lotu ni ila Mizoram Chief Minister hian duhsakna thu min hlan dawn ta se ka pawm duh ang em? Kei misual pek hi chuan, 'I duhsakna chu ka dawng ve lo mai ang e, kan chhiatna turin theihtawpin i bei a, chem lovin kan lu min la a ni hawt a. Tunah hetiang tawngkam hi kan lakah i hmang thiang hlei nem,' ka ti duh ang.

Kuhva tawlh ruk hi tunah pawh Mizoram chhunga kudam hrang hrangah a la awm niin a lang a, chung te nen chuan Krismas kan hmangho dawn em ni? Kuhva rah ro hi dan phal lohva Mizorama lo lut kan tih si chuan engatinge Mizoram chhungah a la awm reng? Lakluh phal loh thil hi miin an lakluh tawh laklawh vangin kan kawl reng hi a thiang em ni? Hei hi kan awmdan tur a ni thei ang em? Heti khawpa kuhva huan neituten an tawrh phah kuhva ro hi engtinnge a dahna kudam ruak pawh hi Mizoramah a awm ang a, a ruak lo pawh a awm reng ang? Kuhva ro leh a dahna kudam nen hian Krismas hmanho chi ni meuh pawhin ka hre lo. Hengte nena Krismas hmanho hi a remchan dan awmin ka hre lova. Kan sorkar hian kuhva ro, dan lova Mizorama lo lut zawng zawng hi a tiriral vek tur a ni a, chu chauh ni lovin heng chhek khawm nana an hman kudam te hi a thiatin a tiriral vek tur a ni.

Chutianga a tih hnuah chauh chuan mipui zawng zawng huapin Krismas duhsakna thu an sawi thei chauh ang. Chutianga ti si lova duhsakna an sawi a nih chuan inhmuhsitna emaw, intham lohna emaw, inngaih nepna emaw a ni ang a. Ka beng hriata chutiang thu te TV lama an sawi a nih pawhin kei chuan ka pawm hauh lovang.

Krismas hi thil ropui a ni a, a hluin a lunglenthlak a. Keini Mizo te tan phei chuan a lunglenthlak lo thei lo. 'Bethlehem daireh,' 'Bethlehem dai phûl,' 'Min tlantu,' 'Van angel zai ri,' 'Chun riang Mari,' te leh kan hlaphuah thiam tam tak te tawngkam hman hrang hrang han en hian Krismas hi lunglenthlak lo thei a ni lo. A ngaihawmna hi kan hla nen a inzawm a, a lunglenthlakna hi kan hmuh ve loh ram, kan suangtuahna khawvel nen a inthlunzawm a. Mipui nawlpui, zaa sawmriat te hi chuan engtikah mah Bethlehem khua te hi kan zu hmu dawnin a lang lo. Mahse kan thinlung mitthla chuan Bethlehem khua theuh chu a hmu lawi a. Kan hmuh loh ram chu kan hmuh hnu aiin a lunglenthlak zawk lehnghal. A lunglenthlak zawng te, a ngaihawm zawng te leh a hnuk tiulh thei zawng turin kan suangtuah thei vek a. He hun ropui leh lunglenthlak ber mai a kan ngaihtuahna tihrehawm theitu leh min tilungngai a, kan rilrua hahna min siam thei lak aṭangin fihlim kan tum thin.

Hetih lai tak maia kuhva chingtu zawng zawng tana lung­ngaihna siamtu hi chu kuhva huan nei tam tak tan chuan theih­nghilh an har ngawt ang. He thil hi thil thleng palh ni lovin hrereng chung a tih a ni si a.