HMA KAN SAWN VE E

Krismas leh kumthar dawnah Aizawl khawpui kawngpui lunlaiah ni khat ve ve lirthei tlan kan han khap a, mipuiin nuam kan ti hle mai. Lirthei ngaisang viau anga lang Mizote hian kea kal kha nuam kan lo ti em em mai a. A lawmawm angrengin a boruak a nuam angreng ngawt mai. Nidanga ti deka kan awmna hmunah khan zalen takin kein kan han vak hiai hiai a, lawmawm tak chu a ni. Lirthei heti taka kan chuan nasat chhan hi kea kalna tur kawng awm loh vang a nih te pawh a rinawm ta rum rum. Dik tak chuan Aizawlah hian kea kal hi lirthei avang leh kawng zim luat avang hian a lo hrehawm em em a ni tih pawh a lang bawk.

He 'No vehicle zone' hian kan changkanna eng eng emaw a tarlang vein ka hria a. Mizoten ei tur kan ngaihtuah ve ta hle mai tih a lo lang kha hmuhnawm tak a ni. Tunhma kha chuan ei tur buatsaih kha hmeichhe hna leh hna penhleh ang deuhvah kan ngai a, mahse tunah chuan a ni ta lem lo tih a lo lang a. Chu chauh ni lovin ei tur kan han siam sauh sauh mai leh kawng kama awlsam tak maia puipunna hmuna ei tur kan chhawp chhuak ta kha a lawmawm.

Hnam changkan leh changkan loh tehna pakhat chu ei tur neih tuihnai leh tuihnai loh hi a ni pakhat a. Tunhnai deuh aṭang khan ei tur, kan nu leh pa te hunlaia Mizovin kan chhawp chhuah ngai loh tui tak tak si zawrhna te a lo piang a, puipunna hmunah awlsam taka ei tur zawrhna an rawn intarlang ta thin a. Hei hian kan hnam chuan hma kan sawn ve a ni tih chiang takin a tilang a. A lawmawm hle a ni. Ei tur chi hrang kan neih tam poh leh ei lamah hma kan sawn a tih theih a. Ei tur chi hrang nei tam tur chuan siam thiam a ngai a, siam thiam tur chuan ngaihtuahna te, peihna te, ngaih pawimawhna te neih a ngai.

Tunhma deuh kha chuan Aizawl khawpuiah hian ei tur chi hrang leh tuihnai deuh a tam tehchiam lova, tam tak tan phei chuan riltam angreng tak chung pawhin duhzawng awmna kha a hla thei viau. Kawngkam thingpui dawr, ei tur chi inang deuh pet pet mai kha kan neih tawk kha a ni a. Mahse tunah chuan chi hrang a lo awm ve ta nual mai a, a lawmawm khawp mai. Sa ei mi (non-veg) tan phei chuan ei tur a tam lehzual kan ti thei ang. A chhan pawh sa ei mi chuan sa lo pawh an ei vek thei tlangpui zel tlat a.

Ei tur chi hrang neih kawnga kan hmasawnna hi a lawmawm hle mai a, hetih lai hian Mizo deuh hleka tih tum pawl te pawh kan awm niin a lang a, kan la awm belh zel ang tih pawh a beiseiawm. Kan Mizo hnam nihna nena inzawm thei thil kan buatsaih chhuah thiam chuan a hlut dan a dang. Hnamdang tihdan entawn hi chu a theih mai a, a peih leh mi tumruh tan chuan kawng a harsa vak lo thei. Mahse kan Mizo hnam thar chhuah leh kan nunphung nena inzawm, ei tur remchang kan neih theih chuan a hlut dan a ril deuhin a rinawm. Hmun thenkhatah chuan buhban chhum (chhangban ni lo) te a siam theih ang a, hmun thenkhatah chuan bai tui tak leh tlak tui tak te a chhawp theih ang. Mahse khawlaia ei mai tur atan chuan bai leh tlak te chu a remchang chiah lo maithei. Ei mai remchang tura siam thiam kan awm a, kan tih ngam bawk chuan mi tam tak chuan an duh ang a, Mizoram rawn tlawhtu thenkhat pawhin an hlut viau ang tih a rinawm thei. Zufang te hi ei turah kan chhiar tel ngam ang emaw.

Ei tur lam chu kan neih belh ve ta nual tihah hian duhtawk ila. Hnathawhna hmanraw chi hrang hrang siam chhuak thiam kan nei ta pawh hi lawmawm tak a ni. Hnathawhna ni lem lo, chemte nalh tak tak leh tha tak tak chher thei pawh kan nei ta nual. Theih ni sela kan kuthnathawktute nitin hnathawhna hmanrua hi uluk thei ila a duhawm khawp mai. Chemte nalh tak te hi chu khawi hmunah pawh mipa chuan kan lawm deuh vek a, mahse a hmanna tak hi rin aiin a tam lova; chutichung chuan kan hnawl ngawt thei lo. Chemte hi chu silai ang deuh a ni a, mipa chuan kan lawm viau hlawm a, mahse a hmanna hi a vang duh angreng phian. Hnathawhna hmanraw remchang leh hman nuam hi chu a mamawhin kan mamawh a ni. Hnam changkang apiangin an hnathawh tiawlsam turin hna­thawhna hmanrua an nei tha. Hemi kawngah hian hmasawn leh zual tum ila a duhawm ngawt mai. Khawl nena inlaichin hnathawhna hmanrua hi siam thiam tak tak an awm nual a, a lawmawm. Tam takin chung hmanraw hrang hrang chu kan la hmelhriat loh avang leh kan la hmuh ngai loh avangin kan nei tih pawh kan hre lo thei viau ang a. Chubakah khawl hmanna hi chu hna chi khat thawh teuhna tur thil a nih avangin hmun tam takah chuan a tangkai tur angin a tangkai lo thei. Kei ngei pawhin screw herh luhna leh phawina hmeh vir theih hi ka lei a. Tha dawna ka hriat tehlul nen rin aiin screw herh luh char char tur a awm loh chuan hman tangkai a harsa. Huan neitu tam takin hnim samna khawl an han hmang tangkai te, kuhva zuar thenkhatin kuhva thelna khawl an han hmang te hi chu lawmawm tak a ni.

In lo ngaihtuah ve ngai emaw, khawlaiah hian zurui insual hi an vang ta viau mai a. Kan changkang ve ta tihna pakhat a ni thei ang. Zu ruih hi insual nachhan anga sawi fo hi a chi tawh mang miah lo. Zu ruih avanga insual buaina ai chuan zu in nasat avanga hriselnain a tawrhna leh mimal nun mumal lohna hi a langsar ta viau zawk. Tunhma deuh kha chuan zu ruih kha insualna kai chhuaktu a ni nasa hle a. Kan thelh luai luai a, kan thelh pawr tulh tulh emaw tih mai tur kha a ni a. Mahse tunah chuan zu ruih vanga insual hmuh tur an vang ta. Hmun chengker (World Bank Road!!!) velah te chuan insual zauh an la nei mahna. Mahse mi pangngai awm mang lohna hmuna ruih theih thil tih chingho kal khawmna hmun ang deuh a ni thei awm e. Tun Krismas leh Kumthar liamtaah pawh khan VDP/ YMA Duty post langsar deuh leh hriat hlawh deuh a vang ta viau mai. Kan nunphung chu a inher danglam ve ta deuhva, a inher dan hi a lawmawm lam a ni ang.

Eng pawh ni se a hmu thiam tan chuan kawng hrang hrangin kan changkang ve ta viau mai a tih theih a. Kan sorkar sikul chhe lutuk leh kan biak-In tha lutuk si erawh hi chuan ngaihtuah a tithui duh angreng khawp a. Sorkar pawisa tel hauh lova kan biak-In thatzia leh kan nitin nun leh kan biak-In nungchang a inpersan tlat si te hi chu keini aia hrilhfiah thiamin hrilhfiah nasat a ngai hle te pawhin a lang.