TAXI LEH A BEHBAWM

MNF sorkar, Pu Laldenga kaihhruai ni lo a lo pian aṭang khan Taxi chungchang hian sawi a hlawh tan ti ila kan sawi sual lo awm e. Mizoram sorkar khan Taxi permit kha tam tak mai a'n pe teuh mai a. Mi tam tak ngaihdanah chuan Aizawl khawpui mamawh tawk aia tam a pe a. Chutiang bawkin City Bus permit pawh rin aia tam daih mai a pe a. A tam tak luatah chuan kawng lamin a daih ta chiah lova, intlan chhawkin an khawsa a, vawiin thlengin an la intlan chhawk chho ta a nih hi. Chutih hnuah Two-Wheeler Taxi a lo awm leh a, a tangkai a, a lawmawm tehlul nen permit an pe tam leh ta lutuk bawk a. Veng tinah lirthei dinna hmun remchang tha deuh chu taxi (two-wheeler leh four wheeler) dinna a ni zo ta deuh vek mai a. Tun dinhmunah chuan Aizawl khawpuia motor nei tam tak chuan chhun lawnah chuan an motor an keng chhuak ngam tawh lova, an dintir ta fur mai.

Chutiang bawkin Two-wheeler taxi leh four-wheeler taxi pawh an tlan ni pawhin a hmangtu lamin an hmang seng lova, an ding ta teuh mai. Hmun tam takah an dinna tur ni lovah, mi nghah nei ni awm tak tein an ding hram hram a, heng zawng zawng chhan ber hi chu kan kawng hian kan taxi leh bus te hi a tlin meuh lo a ni. Chutih nak alaiin tunhnaiah two-wheeler taxi permit pek an tum hnai leh ni awmin sawi te a awm a, tak tak ni maw. A awmsa pawh a tam tawh viau laiin han pek belh leh hi chu a lutuk dawn hlein a lang. Mahse kan awmdan han en hian Aizawl khawpui tlin tawk leh mamawh lam ai chuan thildang hi kan ngaihtuah ni tlat a a lan avangin an pek belh leh pawhin a mak lem lovang chu.

Taxi (ke hnih nei emaw, ke li nei emaw) te hi kan mamawh reng a, mahse engkim hi a tam luattuk emaw, a nasat emaw chuan a hnawksak a, a pawi a, a buaithlak fo thin ang hian kan taxi te hi a tam ta lu deuhva, kan buaipui ta lek lek a nih ber hi. A chuan man lah hi a tlawm hlei thei vak lova, a lo tam chuan tlawm deuhvin kan hmang thei ang kan tih lah chu khawvel economic dan kalhmang kalhin kan awm a. Tlan theih loh ni an neih tlat avang leh an tlan theih chhunah pawh traffic jam avangin an tlan thuai thuai leh thei ta chuang si lova, an tlan theih ni chuan man to deuhva an tlan loh chuan an hlawk lovang an ti ta tlat a. Economics lama 'perfect competition' tih ang lam khan ro a rel thei ta chuang lo.

Kan taxi permit phalrai dan hi a tir aṭangin a dik lo sa hrim hrimin kei chuan ka hria a. 'Mi eizawnna insiamsak,' ti lam kha kan thu thlûk dan ni tlatin a lang a. A nghawng tur lehzel ngaihtuah lem lovin a eizawnna insiamsak lai kha kan la ngawrh angreng riau mai a. Thildang (kawng zauh zawng te, kawng thui zawng te, mipui tam dan zawng te, City bus chanpual tur te, a dinna hmun tur te, kan traffic police te tana enkawl theih tur te, kan mamawh phuhruk tawk tur khawp te) ngaihtuah ta lem lovin thil chu a inher nawk nawk ang a, a inher rem ve mai ang a, chumi karah chuan mi engemawzat eizawnna tur kha sorkarin a siamsak mai dawn a ni, tih ang deuh ngawtin kan ngaihtuahna a kal niin a lang. Engemaw ti zawnga sawi chuan kan ngaihtuah dan kha a 'scientific' lo ve viau. Mi ramah chuan mipui nawlpui 'general public' tana tha turin sorkarin ro a rel thin a. Mahse kan State-ah chuan mipui nawlpui aiin mihring engemawzat hi kan ngaihsak zawk ni tlatin a lang.

Tunah chuan he ngaihtuahna hian hlet engemaw a rawn chhuah ta ti ila kan sawi sual lovang. Taxi chungchang han sawi dawn hian a neitu lam chuan, 'E khai, thla tinin kan eizawnna hun ni li ni nga sorkarin min tihtlemsak a, chutianga rorelsak ngawt theih kan ni hlei nem, chuti khati.....' an han tih hian hnial thui an harsa ta viau mai a. Kan City Bus te pawh intlan chhawk a ngaih tak avangin nitinin a ding mai mai tawk thahnem tak a awm zel a ngai ta a. Chu chuan hmun te a luah a, hmun tam takah chuan dinna pawh inchan lo napui chu Aizawl khawpui hmun awl remchang leh mipui tana thawveng ve tur lai deuh chu zanlamah tal a luah ta fer fur mai a nih hi.

Hemi bakah hian Two-Wheeler Taxi te permit te hi Party Worker thenkhat sumdawnna angrengin a kal titih ta hial mai a, a zia lo angreng ngawt mai. Two-wheeler taxi tam tak hi chu sumdawnna anga an hralh chhawn a ni a. Eizawn nana hman tum hauh lo khan a permit an han hmu a, chu chu hlep tha angreng takin an hralh leh chhawng ta zung zung mai a, contract thenkhat ai chuan a hlawk te pawh a hlawk ta ve ang. Thenkhat chuan permit pakhat aia tam te an han dil chhuak a, chu chu awlsam takin an hralh leh mai a. Chutiang tur chuan kan sorkar hian heng public service lirthei permit hi kan hmang ta mai mai a. A mak a, a thianghlim loh tehlul nen hian a aia mak leh awihawm loh thil a tam tak em avang emaw ni dawn ni, mak ti awm leh bawlhhlawh ti hmel pawh hi put zawh sen a ni ta chiah lo.

Mizoram hmangaihtu leh chang­kan ve deuh duh tan chuan inthlan hmaa thil lo thleng tur hi a huphurh­awm angreng ngawt mai.