LUNGLEI MUNICIPAL COUNCIL

Vawiinah Lunglei Municipal Council chu an inthlang ang a, tun atang chuan Lunglei khawpui huam chhung chuan inenkawlna dan thar an nei thuai tawh ang.

Council enkawltu tha tak an thlan chhuah a, ro an rel thiam chuan an thatpui viau thei a, chutiang a nih loh hlauh chuan an awmdan hlui kha ngaih chang an ngah ve hle maithei. A bikin khawpui daideng deuh, Hauruang te, Zobawk te, Theiriat leh khawilai hmun hmunah emaw chuan tunhmaa V/C ten an awp thin leh ro an relna hmun thinah khan Council-in thuneihna a'n nei ang a, an thuneihna bawhchhiat ngawt dawn a remchang chiah lo, mahse inrelbawlna leh Municipal Council ruangam (structure) -in a tlin chiah si loh thil thenkhat a awm thei viau ang. Chutih laiin a hlawm puiin politics nen a inkungkaih lehzual thei a, mi tam tak tan chuan buaithlak ve tak tak a tam viau thei dawn tih hriat a tha.

Lunglei Municipal Council hian ro a rel dik a, rinawmna leh dikna nena ro an rel a, tih tak taka an tih a, eirukna leh hlemhletnain hmun a chan loh erawh chuan Aizawl lama kan Municipal Corporation ai hian hna an thawk tha zawk theiin a rinawm.

Aizawl lama kan tihdan hi entawn tlak loh fe fe a awm nuk mai a, heng hi Party sawi lovin rawn ti ve lo se ka duhpui ngang mai. Aizawl lamah chuan Local Council kan han inthlang phat hi a chak lam Party Unit hian Local Council Chairman hi a hring a hrana an ruat tur emaw an han ti phat mai a. Dan bu-ah 'Thlan thar te chu an thukhawm ang a, Chairman tur an thlang ang,' tih awm sa reng chungin a tling tam lam Party Unit khan, 'Chumi chu ni rawh se,' an han ti a, chu chu thut khawm leh pawm tlan tura thlan tlinte ko khawm set set lovin Chairman awmin an awm zui mai a. Treasurer leh Secretary te leh Vice-Chairman thlengin an ruat zui tawh mai a. A chang phei chuan a lo ni tawh sa te hnen atanga Charge an lak te pawh Opposition lam chu an han hrilh duh lo zui a. Chutiang a nih tawh chuan Village Council aia danglam chuang lo hming hran nei, khawpui zia ang lo taka Party inbeih loh theih lohnaah chhuah mai a awl khawp. Aizawl Municipal Corporation lamah han vuivai dawn ila AMC lama awm lo Party aiawh tan chuan a beidawnthlak sa nghal ringawt a. Engmah ang chuang lova mi kawi leh phunchiar nihna mai tur niin a lang. Chutiang ni lo tur chuan dan dik taka invuah a, inthlan a, dan awm ang ang te zah tura inzirtir a pawimawh khawp ang.

Aizawl Municipal Corporation hnuaiah hian Ward Committee hi a awm ve a. Mahse Ward Committee thukhawm reng reng lova Ward aiawhtu Party Corporator duhdan dana kal ta mai mai hi an awm nual a. Kan duh leh kan it hi a te angreng hlawm khawp. Heng tireh tur chuan a bul atanga Lunglei Municipal Council zahawm leh tha tak siam a hlawkin a tangkai hle ang a. Tuna Lunglei tana mi thlan chhuah te hi Council zahawm leh tha tak nei turin an pawimawh ngawt mai. A ding hmasa berte hian tihdan zahawm leh tha tak an hnutchhiah chuan a dawt leh ami te tan a awlsam sawt ang. A bul tan that chuan kawng tha leh dik thui takah Lunglei Municipal Council hi a hruai ngei ang.

Hetiang ram rorelna leh khawtlang thila rorelna kawnga kan buaina ber chu a bulah chuan pawisa hi a ni duh khawp a, a tawpah pawh pawisa bawk hi a awm chawk. Mi pangngai ve tak emaw kan tih thenkhat hi chuan an tih theih hun laia pawisa an neih belh theih deuh dawn chuan a hnu lama mi sawi leh sel tur te hi an hlau reng reng lova. Pawisa ber an neih tawh chuan insawi fihlim leh thei dawnin an inhria a, an hming te pawh chhe zui lo turin an hria a, hmingchhe turah an inngai thei lo reng reng tih a lang chiang viau. Pawisa sum lama bengvar zet mai leh sum duh thiam riau mai te hian kan ram leh khawtlang an tichhia a, chung do let tur leh bengdai tur chuan mi dik tan chuan huaisen a awl khawp a. Dan lek kawh kawnga huaisen awm tak an huaisen tlat loh emaw, mipuiin ngaihdam loh tura an hriat an ngaihdam theih viau emaw chuan an lo dik tawk lovin anmahni kha an rinhlelhawm ve tawh tihna a ni. Lunglei Municipal Council Chairman hmasa ber hi chu George Washington te leh Pu Bawihchhuaka te ang maia rinawm leh huaisen tak, duham lo tak mai ni se a duhawm mang e.

Lunglei Municipal Council inthlang tura hnehtu nih hi Mizorama Political Party te chuan an tan a pawimawh em emin an hria a. He inthlan hian November thla vela Mizoram inthlang tur hlimthla hi a tarlang dawn tlata an hriat vang a ni bawk. Chumi avang chuan Aizawl lama Political Party hruaitu lian te pawhin an enghelh a, Party lian pathum, MNF, Congress leh ZPM hruaitute zingah langsar taka a hun lai taka awm ve lo chu Party President pakhat chauh niin a lang. Minister te, MLA te, Party mi leh sa te leh Party hruaitu tam zawk chu Lungleiah hian an fuankhawm avangin he inthlan hi Mizoramin a ngai pawimawh tih loh theih a ni lovang. Party tana a pawimawhna hi chu thu khat ni se, Lunglei mipui tana a pawimawhna tak tak hi a sang fe zawk a tih theih ang. Municipal Council rintlak leh tha a lo pian chhuah hlauh chuan tunhnu zel atan Lunglei khawpui tan malsawmna a ni ang a, chutiang ni lova eiruk theihna khur pakhat laih belhna ang leka a chhuah palh hlauh chuan Lunglei mipui tan a lungchhiatthlak thui hle ang.

Party mal emaw, thawhhona atanga lo piang LMC sorkar emaw lo piang pawh ni se chu sorkar (Municipal Council) enkawltute chu rinawmna leh dikna kengkawh mi ni se Lunglei leh Mizoram tan chuan a hlawk ber dawn a. Parking fee khawn chhuah sa te an phurpui luattuk a, Municipal Council sum bawma a lut lo chin te a awm mai chuan a fel lo hle ang a. Mipui nawlpui tana rorelna dik aia mahni duhsak zawng te leh mahni Party mite vulhna lama ke an pen chak chuan a pawi hle ang. Theih ni se Pu Bawihchhuaka te, George Washington te anga rinawm, Pu Vanlalhlana te ang a, 'Ka eiru dawn lo,' ti ngamin he LMC lo piang tur hi hruai se a duhawm ngawt mai.