ELECTRIC VENG PA PU H.RALTAWNA

Mi tam takin Lunglei Municipal Council inthlan result kan nghah a, kan nghahhlelh em em lai leh mi thenkhatin hlauhthawnna rilru nen an thlir lai khan Pu H.Raltawna, Electric Veng Pa chu April ni 1, zan dar 11.30-ah a lo thi ve mek a. A tuk, April ni 2, 2023 khan a ruang chu an in atangin an thlah liam ta.

Kohhran upa zahawm tak i hmuh duh chuan Pu H.Raltawna kha hre ve hman la a lawmawm ngawt ang. A hawiher, a nungchang leh a awmdan atang khan kohhran upa ni hliah hliah hian a lang a. Han en maia a lan ang chiah khan kohhran uapna kawngah leh kohhran mite tana a inpekna kawngah kohhran upa ni awm reng a ni. Damlo lu chunga kut nghata han tawngtai te kha a inhmeh a, kohhran upa ang a han fiam te kha a chakawm bik a, kohhran mi han nih a, a beram anga han awm kha a chakawm bawk. Amah a palian a, a inchei fai a, a hmel a zahawm. Heng hi chu kohhran lam leh sakhaw lam thlirna atanga amah enna a ni a, hemi phenah hian amah tak tak kha a zahawmin a thianghlim a ni.

Tunhma atangin Officer lian a ni a, a sorkar hna thawh tawp lamah phei kha chuan IAS nihna te an pe a. Land Revenue Department-ah a thawk rei em em a, chuti chung chuan in hmun lo ram a nei thliah thluah lova. Electric venga a in hmun bakah chuan Chawhmeh bazar bulah dawr hmun a nei tih ka hria a. Chu a dawr saknaah chuan kan tleirawl chhuah hlimin ka inhlawhfa ve nghe nghe a. Ka rilru chuan, 'Pu Raltawna pawh Revenue Officer te a ni bawk a, hei dawr hmun te pawh a lo nei ve a nih hi,' ka ti a. Engmah ka sawi ngai lem lo. Mahse a thih ni khan kha dawr hmun a neih chungchang kha an sawi chhuak a, ama inpek pawh a lo ni lova, midangin an pek a lo ni a. Lawmthu pawh a lo sawi duh lo nghe nghe a. 'Ka dil vanga min pek pawh a ni lova, an phal vanga min pek ve ringawt a ni a, lawmthu sawi a ngai hlei nem,' a ti mai a. Mimalin an sah thlak ve a ni ang chu ka ti mai. Kan tawng tu huatthu chang suh se Land Revenue & Settlement Office a thawk, in hmun lo ram nei tu tu emaw ka hre nual a. Thenkhat phei chu an chhungkhat laina te ngawt pawh itsik tham deuhthaw an ni.

Mi felna leh thatna han sawi dawn hian thenkhat rilru kan lo tina palh ang tih a hlauhawm a, mahse chutiang chu kan tum a ni lo. Tum khat chu LAD Director a nih laiin lehkhaip puar angreng tak hi a hnuaia thawk pakhatin, 'Kan puten han pe rawh an ti,' tiin a pe a ni awm a. Ani chuan hawng lem lo chuan a chhunga awm a zawt a, a petu chuan hlau chung chungin pawisa a ni tiin a chhang a. Pu Raltawna chuan, 'La kir leh rawh. Ka sign tur zawng zawng ka sign fel vek tawh a, engmah buaina tur a awm lova, he thil hi ka la lovang. I puteho chuan an duh leh insem rawh se,' a ti ta a. A pisa lamah pawh a Pathian biak chu a pangngai rengin a bia tih a chiang mai.

Amah neltu leh ngamtlak, a hming pawh a ko lova, 'Ka u,' ti a kotu pakhat chuan ram lak (acquired) tur a hriat ruk thu leh chu chu pass lo siam a, to deuh hlek a hralh leh tur a hriat thu a sawi a. 'Ka hre ru ran mai si a, a hnenah sawiin pass min siamsak turin ka ti a. Ani lah chuan, "Chutiangin ka ti lovang," a ti bur mai si a, sawi thui ngam pawh a ni lo,' tiin a sawi. Pu Raltawna kha mi rinawm, sorkar leh midang tan pawha rin ngam zan a ni.

Tunhma chuan a kawmchhak ram awlah chuan veng bilin Krismas te kan hmang a, ruai te kan theh a, nuam kan ti thei ngang mai a. Ram a lo thang a, lirthei te a lo pung a, a kawm chhak ram awl chu thian tha pakhatin, 'Hei helai hi a zawl sa si a, tlemin han dawh belh la motor dahna tur a awm ang a, pawisa i hui lut tawk tawk mai dawn alawm,' a ti a. Ani chuan a hnathawh lai pawh chawlhsan duh chuang lem lovin, 'Hlu kan tih zawng hi a va inang lo ve le,' a ti ringawt a. Ani tan chuan chulai ram awl a naupang infiam vel chu a hlu zawk daih ni ngei tur a ni.

An nu Pi Rita Neihpuii hi Mizo hmeichhe zinga M.A pass hmasa ber a ni a. Lehkhathiam ve ve innei an ni bawk a, mite angin sum leh pai um mi niin khawvel hausakna leh ropuia lang thlahlel mi ni se an in leh lo te pawh khir ve fe leh chhawng sang ve fe awm tak a ni. Mahse an ina i kal chuan chutiang a ni lo tih i hmu ang. Tunhnu hian a tupain lam zirna lam te a mamawh tak avangin a kawmthlang lamah in a sak belh ve ta chauh zawk a. He khawvel sum leh pai hian an nupa chu a tibuai lo ngawt mai.

Hetiang mi nghet leh nunphung fai nei mi hi Mizoramin kan mamawh em em reng a, mahse a kum te a lo tam ve tain kum 93 lai te a lo tlin takah chuan a tlin reng ta bik lova, sawi tawh angin mual min liamsan ta. A hun a thleng ve tawh a, hunin a lei taksa a her liampui kan ti thei ang. Mahse keini Electric veng chuan chungho tan chuan Pu Raltawna kha a hmel hmuh ringawt pawh a thlamuanthlak thin a. Ram buai hlim, mihring kan retheih em em hun lai te khan Pu Raltawna a awm kha chuan Krismas-ah ruai kan theh theih te kan han ring a. A rilru ang kha pu lo se Officer lian nih vang ringawtin Krismas ruai tur hi miin an theh chhuak zel thei lo tih hre chiangtu ka ni. Ani aia inti milian leh Officer lian anga lan tum, thawhlawm khawn nikhuaa kut zum leh viau si te pawh kan tawng ve ta. Keini naupang thanglai rawp tihrehna bakah khang hunlaia a inphalna kha tunhnuah a hlutzia ka hre chhuak. A kawm chhak hmun awl, hnim hring dap awmna a vantlangin ruai kan han theh te kha chu kan chên chereu nasa tih a lang reng. Tunlai mi changkang tam tak ni se an han remtih dawn loh turzia ka ngaihtuahin Pu Raltawna te nupa ka ngaihsanna a zual.

Kohhran nuhovin tel leh ilo an zawrh te khan, 'Pawisaah hian thahnemngai lutuk teh suh u. Dawr te siam a eizawng mi harsa zawkte eizawnna dipdal zawngin kan khawsa ang e. Kohhran hi chuan kan nei mai zel a nia,' te a ti thin a. Tumkhat tuten emaw thawhlawm an thawh tam tak deuh khan fel lovin an hria a, Pu Raltawna khan an thawhlawm kha chhiar tel a remti ta lo ni awm tak a ni.

Pu Raltawna te ang kha kan sorkar officer hi ni hlawm se chu kan buaina tam tak hi chu a reh chawpchilh nghal maiin a rin theih a, a reh fai vek ang tih erawh sawi theih a ni lo. Mahni pisa a Pathianni a kan biak Pathian be chhunzawm zel rawngbawltu Pu Raltawna kha a ngaihawm mang e.