LUNGLEI MUNICIPAL COUNCIL INTHLAN LEH A BEHBAWM

Aizawl Municipal Council (Aizawl Municipal Corpo­ration lo ni ta) inthlan aiin Lunglei Municipal Council inthlang tur chu Mizoram mipui leh Political Party ten an ngaihven zawk daih a. A chhan pawh he inthlan hian MLA inthlan lo awm turah nghawng a nei dawn tlat a rinna a awm vang a ni. A nei chiah nge chiah lo chu MLA thlan hunah a la hriat theih maithei.

Lunglei Municipal Council (LMC) inthlan result hi mi beisei loh tak mai a ni ti ila a sual lovang. Heti khawpa Party lian pahnih an tlak chian hi inthlan chanchinah a la awm lo hial awm e. Hetianga ZPM Party-in hnehna a chang ta hi a mak tih loh rual a ni lova, ZPM Party len zawng nena han teh phei chuan a mak lehzual a ni. Chu chauh ni lovin result chhuah hma zawnga mipui hawiher leh awmdan han ngaihtuahin a vai vaia seat lak vek a, Ruling Party pawh khati khawpa hawihaia an awm kha chu rin phak bak a ni.

Hripui len laia Mizoram sorkarna fawng vuantuten hripui enna khawl, RT-PCR an bun duh tlat lo kha vawiin thlengin mak ka la ti reng a. LMC inthlan leh MLA inthlan lo awm leh tur hrereng chunga khatianga an han ti ngam kha a mak tih mai loh chu sawi ngaihna a awm loh thu pawh he Vanglaini chanchinbuah ngei hian ka ziak tawh a. Khatianga RT-PCR khawl an han bun lo kha a hnu lama campaign leh duh tur tan chuan thil hlauhawm tak ni tura kan ngaih kha kan sorkar hotute chuan an ti ta tlat mai kha keini ang tan chuan hriatthiam phak a ni lo. Chhimlam aiawh MLA te leh Health Minister ngei tan pawh mipui tana thawktu anga insawi dawn chuan ban phah ngamna ni ve awm takah an ngawi tluan zak thei kha thil mak dang a ni leh bawk. Mangang em ema awm laia langsar tak maia intanpui duh hauh loh mai kha a hnu lama vote zawng leh tur tan chuan thiltih awm loh takah kan ngai a. Keini tehlulin kan hria anga kan inngaih ve hi chu kan ram hruaitu, Minister leh MLA te chuan an hriat a rinawm hle a, mahse kan ngaihdan lo ang takin thil an ti tlat si. Vote duh vang emaw, duh loh vang emaw pawh sawi hauh lovin mihring inlainatna te, mihring inzahderna te, mihring leh khaw êng zah vang tal pawhin kha khawl kha bun ve mai awm a ni a. Mahse bun loh dan kha kan sorkar khan a zawng ngar ngar ni tlatin a lang a. Tunhnua han ngaihtuah leh hi chuan kan Chief Minister thusawi duhdan aṭangin bun lo mah se tlin tho inrin nachhan an nei ni te pawhin a lang.

He inthlan hian a hnu leh a inthlan tur hi a nghawng leh nghawng loh chu sawi har tak a ni a. A nghawng titu awm mah se a nghawng lo ti duh an awm chuan finfiah hleih theih a ni tawh dawn tak tak lova. Mahse mipui rilru kalphung en chuan a nghawng hi chu thil rinawm tak chu a ni. Lunglei chauh ni lovin Mizoram hmun dang pawh nghawng ngeiin a lang a, thenkhat hmuhdan phei chuan tun aṭangin a nghawng nghal der tawh ni te pawhin a lang.

Inthlan a lo thlen dawn a pawisa ngah thu kan Mizoram Chief Minister-in (Hnam Runah) a sawi chiam mai te kha mi tam tak ngaihdan chuan a mak leh em em tawh a. Kan Mizoram sorkara a fawng vuantu Party hi chuan pawisa hi a ngaihven em em a, a ngaihven lutuk ti ila kan sawi sual lovang. Mahse kan thurin bu-ah chuan, 'A sum ring mi chu a vuai ang,' tih kan hmu a. Rinrawl bera sum han hman tawp mai hi mi tam tak ngaihah chuan a rapthlak a ni. Mimal nunah te, chhungkaw thilah te leh sorkar enkawlnaah pawh sum ringawt mai avanga fel thei tura inngaih hi chu ngaihdan huaisar leh ngaihdan ngaihnobei lo tak a ni ve hrim hrim a. Sum ngah vanga tling thei tur kan nih thu vantlang hriata han sawi piap piap mai te kha chuan ram hi a hruai tha lovang tih hi keini mi mawl chuan kan ngaihdan a ni. Thil ngeiawm ber te zinga mi chu sum hmanga inchaldelh hi a ni fo thin a. Kan aia nei tih kan hriatchian sa larh pawh hian an ngah zawk thu an han sawi chiah hi chuan an ngainatawmna a bo vek thei hial thin. Inthlan thu-hlaah phei chuan 'inlei' tih te hi chu mihring nunphung hniam tawpkhawk awmphung leh thil sual anga ngaih a ni a. Inthlan dan (Election code of conduct) pawhin pawisa chelek hi theihtawpin a veng a. Chutih kara keini Kristian zinga sum neih vanga tling tur anga insawi duh Chief Minister kan nei hi engtin chiah a ngaih tur nge sawi thiam a har khawp mai. Hnathawhna tur atana pawi­sa, sorkar laipuiin kawng hrang hranga min pek te inthlan campaign nana hmang tur anga sawi tak hmiah hmiah mai ringawt pawh kha thubuai thehluhna tham tling hial awm a ni.

Kan sorkar hian tih ngam awm loh tak hi a ti ta nual mai. Champhai lam aṭanga kuhva ro an rawn tawlh thlak te Mizoram thar chhuah anga MAMCO-in Certificate an siamsak mai kha thil mak leh sorkar pangngai tan chuan tih loh chi tak niin a lang a. Khatiang lehkha dik lo kha chu sorkar aṭanga chhuak awm lo tak a ni. Mahse a chhuak tlat si. Sorkar innghahna pawimawh tak chu dan leh hrai zawm a ni a, sorkar chuan dan lovin thil a ti lo tura ngaih a ni. Mahse MNF sorkar hmasak khan contractor hnen aṭanga 3% lak thu kha Assembly House-ah Mizoram Chief Minister hian a nemnghet tawh a. Vawiin thlengin ka mak tih a la reh lo. Champhai D.C., Maria C.T.Zuali lah kuhva phur duhhovin an hekna changchawiin dan kengkawhtu zawk sawn a ni tawh bawk a. Airport sa chimtu Kamrula Chhangte pawh engtinmah tih a ni lova. Airport nawrlirh lah Kamrula Chhangte bawkin za chuang zet a hnathawh nan a lo hmang chhe vek a, chawitir emaw, hrem mai emaw awm tak a nih laiin sorkarin a thar lei a tum mek thu kan han hre leh a. Hetiang hi kan sorkar awmphung a nih chuan keini sorkar awmphung lo ngaih ve dan nen chuan a inpersan hle zawng a ni.

Airport bungrua hi tuin emaw a contract hnathawh nan a hman theih chuan sorkar pisa danga bungrua, Computer te, dawhkan te leh thildang hi Office building siamtha tura kan rawihte hian an nawm an makin an hmang ang a, a chhiat chuan a titu hrem lam ngaihtuah lovin, 'Kan lei leh phawt ang a, a thil tihchhiat hi chawitir kan tum ang,' kan ti leih leih zel dawn em ni ang?

Kan sorkar hrawn mek khawsak dan pumpui leh mipui mimirin sorkar kan beisei dan hi a intuha ta vak lo ni tlatin a lang thei. Chu chu Lunglei Municipal Council inthlanah a siper a rawn inlar te pawh a ni ve thei bawk.