FIT THUM CHUNGCHANG

Dam lohnain min tlak­buak avangin chawlhkar thum chhung zet chu ka huang luah zo lovin damdawi-In lamah hun ka hmang pek a. A nuam lo ve angreng ngawt mai! Mahse damlohna pawh hian tangkaina tak a nei ve a, inngaihtuah fimna hun tam tak ka neih phah a, chu chauh ni lovin TV ka en nasa a. Chuta tang chuan eng eng emaw ngaihtuahna ka neih belh phah ve bawk a. Keini ang, misual laklawh hi chuan chunglam atanga zirtirna awmkhauh deuh te hi kan mamawhin kan veivung lutuk tur min beng hniamtu hi kan mamawh ve chawk ni ta hian ka hre thin bawk.

Ka thuziak hnuhnung berah khan Biak-In pui chungchang ka ziak a, khatah khan thil pawimawh leh chhinchhiah tlak deuh mai ka lo ziak tel lo pek a, ka rilru a kap reng mai a. A hunlai deuh hian han ziah chhunzawm leh law law ka duh a ni. Biak-In pui hi an sak that dawnin kawngpui atangin fit thum lai an lo tawlh tlum a. Helai, Mission Veng biak-In zawna vantlang kawng atan hian Mission Veng kohhran chuan fit thum zai zaia tam mipui leh sorkar tan an lo sat thla tihna a nih chu. Sawi tawh angin Aizawl khawpui veng lunlai bera biak-In pui huam chhung, an ram ni sa ngawih ngawih atanga vantlang tana fit thum zai zai an pek hi ropui tak a ni. Chu chauh ni lovin helai kawngkam tuihawk luankawr hi tha takin an siam zui leh thlap a. Chumi bakah chuan an tawlh luh fel vek tawh hnuah biak-In pui bathlar chu mipui vantlang kal nan fit li vel an han pe chhunzawm leh a. Mipui vantlangin kan hman tangkaizia leh helai kawtthlerin a zauh phahzia hi ngaihtuah tham tak a ni.

Hetiang thil vel hi ka vei zawng tak leh ka atchilh lam a ni ve a. Kum 1994 kha ni tain ka hria, khatih lai kha Congress sorkar lai a ni tih ka la hre chiang a. Central YMA Hall kawmthlang kual hi a zau tawk lo deuhva. Khatih lai khan Central YMA kha kan la pachhe ve lehchhawng bawk a. Sorkar hnenah khan helai kawngpui hi la marin tizau deuh ila, mipui vantlang tan tha hle turah kan ngai a, fit sawm min laihsak theih chuan vantlang tan fit nga kan pe ang a, keinin fit nga kan la chang ang e kan ti a. Kawngpui zau kan mamawhzia ngaihtuah a, sorkar tan thiltih harsa tham a nih lohzia ngaihtuahin thil tih mai theih tur niin a lang a. Mahse kan sorkar khan a ngaihsak reng reng lova. Mak ka ti hle mai a. Hetiang deuh bawk hian tuna kan awmna Khatla South-ah hian kan kawngkual hnawksak tak mai hi a ram neitu, kawngchhak lam amite chuan sorkarin a laih theih chuan kan ram hi kan pe phal e, an ti a. Chu pawh sorkar chuan a tihlawhtling lo leh bawk a. Vawiin thlengin kan harsat phah ta viau zawng a nih hi.

Hetianga vantlang kawng tihzauh hi ka thil ngaihtuah nasat lam te pawh a ni ta ve ang, hmun hrang hrangah hetiang chanchin hi sawi tur ka hria a. Tuten emaw an ram baka in an sak avang te, eng thil emaw an tih tlat avang te emaw a kawng lo zim ta hi ka hmu nual a. Chu chauh ni lovin mimalin in an sak te hian vantlang kawng hlat turin ka sawipui ve ringawt thin a. Thenkhat phei chu a hunlaia min hnial ngam chiah si lo, phal chiah bawk si lova an bathlar siam danglam ta te an awm a. Mahse nikhaw reiah chuan an tan a lo remchang zawkin a lo tha zawk ni te pawhin ka hre thin. Chutianga ngaihtuahna lo seng hrep tawh leh mahni hmuh phak tawk tawk china engemaw lo ti ve tawh ka nih avang chuan he Mission Veng biak-In thiltih hi a ropui ka ti a, kan hriatreng hi a tul ka ti bawk a.

Veng tam takah hetianga vantlang kawngpui tihzauh duh avanga an in sakdan tidanglamtute hi a vengin hriatreng a tha ka ti a. A ti tha deuh pawh chhinchhiah chuang lo, a pamham deuh pawh chhinchhiah ngam chuang lova awm dual dual a, inhrut rual vek tum ngawt mai te hi thil tha leh inzirtirna tlo pawh niin ka hre lo.

A hun laiin sorkar, a ngaihtuahtu ber turin mipuite tana thil tha a ngaihtuah duh tlat lo hi kan buaina zaa sawmthum emaw, a aia tam emaw pawh hi a lo ni thei reng mai. Miin in an sak dawnin sorkarin an ban phun theihna tur chin a bithliahsak tha tawk lova, chu chuan kan Aizawl khawpui buaina leh nawm lohna tam tak hi a hril ta ngar ngar a ni ber mai. Hmun pakhatah chuan kawng kual laiah khawtlang hruaituten bazar an sa a, kawngpui hnaih lo deuhva kual nuam deuh turin tawlh hla turin ka sawipui ve ringawt a. Mahse an lo duh teuh lo mai a, bazar in lian deuh neih kha ropuinaah leh thiltih theihnaah an ngai tlat a, vantlang kawng ai khan bazar kha pawimawh zawkin an hre tlat mai a. Vawiin thlengin a buaithlak ta viau mai a, a tihdanglam leh dan lah chu a vang tawh em em bawk si.

Hmun pakhatah chuan an in kha concrete building-in an sa a. Kawng hnaih tak mai hian an sa a, an sak zawh deuh atanga rei lutuk lovah chuan a satu an tlangval leh a pa chu an thi ta daih a. An in hnawksak tak chu vantlang an rochun ta tawp mai a. Engemaw zawng taka ngaihtuah chuan a ngeiawm angreng khawp mai.

Aw le, hetiang thil hrang hrang ka'n sawi duat duat nachhan hi eng dang ni lovin kawng mar tha laia Mission Veng Biak-Inin fit thum an pek hlutzia hi kan hre lovang tih ka hlauh vang a ni. Thlarau lama chang sang hle si, leilung lama duham hle si te pawh hi awm theih a ni ve bawk a, kan leilung enkawl danah hian Krista hmel lang tel se kan chenhona khawvel hi a nuam zawk ngeiin ka ring bawk.