YOUTUBE/ VIDEO

Tlangval pakhat chu a hnathawhna tur hmunah a kal lo ringawt mai a. A chhan an han zawh chuan, "Nizanah ka tlaivar a, zingah ka tho thei lo alawm," a ti a. "Engatinge i tlaivar?" ti a an han zawh chuan, "PUBG ka khel a," a ti a. Thenkhat tan chuan phone changkang te, social media te hi thanmawhbawk a ni a. Bula mihring awm te ngaihsak lova mahni khawvela min chentirtu a ni a, hna thulhna hnar a ni a, thiamna tura engmah zir peih loh nachhan a ni a, hun min khawhraltirtu a ni. Mahse chutih lai vek chuan kan social media te hi mi tam tak chuan an va tangkaipui si em.

Kan Youtuber leh Media mi thenkhatin kuthnathawktu hlawhtling te a hmunah kal chilhin an hnathawhna hmun ngeiah an hnathawh rah te an hmuhpuiin an thiltih te a thlalak nen an rawn tilang a. A hmuhnawmin mi tam tak tan beiseina an siamsakin bengvar phah nan an hmang a. Keimah ngawt pawh min tiphurin awmhmunah ka lo lawm ve em em a. Kan Mizoram awmdanah beidawn chang nei fo thin mah ila heng kan thil hmuh, kut hnathawktu taimate hlawhtlinna hian beiseina min siamsak nasa hle mai. Mizote hi hnam thatchhia kan ni ngawt lo, a kawng kan la dap fuh lo mai mai a ni tih pawh heng kan thil hmuh aṭang hian a lang theiin ka hria.

Chhimlam, Phairuangkai vela thlai chinna hmun tha tak mai lo awm te kha kan lo hre ngai reng reng lova, mahse Youtuber te zarah khatiang hmun kha a lo awm tih te kan han hre ve a. Nupa chauhvin rim takin an thawk a, an thawh chhuah pawh kut hnathawktu tam tak thawh chhuah ngaihtuah chuan a tam tham ve hle a, thlai chi hrang hrang an hralhna aṭang khan mahni duhzawng lei theiin hringnun nuam zawk an hmang ngei ang tih a rin theih. An hnathawh te, an pawisa lakluh te han hriatpui riai ruai chuan an awhawm ngawt mai. Chhimlamah khatianga hnathawk nasa leh thlai thar hlawkpui an lo awm kha a lawmawmin hmuh a nuam hranpa hrim hrim mai. Mi tam takin hlawk thut tumin kuthnathawh pangngai hnualsuat mah se a ti peih tan chuan din chhuahna te, hlawkna te a awm ngei a ni tih han hmuh a, han hriat khan beiseina te, lawmna te min thlen a ni.

Kolasib lamah ram rem tha laiah behlawi te, tomato te an ching a, an thlai han en reng reng khan a neitute chuan hlawkna engemawzat chu an tel ang tih a hriatthiam nghal theih vek a. Kan Horticulture leh Agriculture Department te pawhin theih ang angin heng kut hna­thawktute hi an lo tanpuiin an lo fuih ve sauh sauh a ni tih han hmuh te hlei hlei kha a hahdamthlak a. Thuthmun aṭanga mi tam takin kan thlai lam Department (Horticulture leh Agriculture) te hian hna thawk vak lo anga kan lo ngaih thinna te pawh a thiat a, duhsakna leh beiseina nena Mizoram lo thlirtu tan chuan thil hmuhnawm tak a ni. Khang video te kha Department senso a siamtir pawh ni ta se thil tih awm tak a ni ngei ang. Thiltih awm tak ni satliah mai lovin khatianga mi hlawhtling te hlawhtlinna tarlanna tur khan a changtu Department te hian pawisa te ruahmanin inelna te pawh siam hial zawk se a lawmawm ngawt ang.

Chhim lam leh Kolasib lam mai ni lo, Mizoram hmun hrang hrangah thlai chingtute hlawhtlinna hi chhinchhiah tur leh tar chhuah tur tam tak a lo awm ta. Khawchhak lamah pawh kut hnathawktute hlawhtlinna hmel hmuh tur a tam mai. Tualte tomato te, Tuipui tomato te pawh hmuhnawm tham taka en tur a awm. Ngopa leh Lamzawl dawnfawh te kha kumin lamah engnge an chanchin ka hre zui ta rih lova, kumin lamah pawh an hlawhtlinpui leh ngei a rinawm. Teikhang purun zung thar chhuahdan te kha a ennawm a, tlema han puih hlek chuan a sukna tui tha zawk neih dan te pawh awm mai thei tur a ni. Mizoram laili, Serchhip-in Mat phaizawla thlai tam tak an thar te kha an la kalpui zel ngei ang a, tunhmaa Silchar thlai thar ngawta kan innghat thin te nen kha chuan tunah chuan kan dinhmun a danglam ta khawp mai.

Pu Vana avangin Mizorama kan rul hmuhdan tam tak hi chu a danglam vek tawh mai awm mang e a tih theih. Rulngan te hi thil hlauhawm tawpkhawk, hmuh tawh chuan min chuk tum reng mai anga kan ngaihna te pawh thangtharah chuan a reh zo vek tawhin a rinawm hial. Saphai te pawh hlauhawm lam ni lovin duat ngai angin thangthar tam tak chuan Pu Vana te hnathawh avangin an hre tawh ngei ang.

Kan thlai thar hralhdan te pawh social media avangin a lo danglam ta hi a va lawmawm em! Kuminah man tha takin hmun hrang hrangah sawhthing an han hralh a. An hralhdan lah hi tunhma ang ni lovin an lilam fel sa vek a, an chawh chhuah ang ang chu motor-ah an hlang zel a, a man an inpe nghal zel bawk a. Tunhma, sawhthing neituten beiseina nen an han cho tawp a, kawngpui tlangdungah an han tiang khawm vak a, a leitu tur lamin duh tawka an dawn a, mittui tla chunga an duh lohna rate a an hralh lo thei lo ang kha a ni ta lo. Tunah chuan an hralhna tur rate hre sain an chova, indawn buai ngai tawh lova an hlang hmiah hmiah mai han hmuh chuan a lawmawm tih loh theih a ni lova. Chu chauh ni lovin an hralhna rate lah rin phak bakin hmun tam takah a sang lehnghal a. Heng zawng zawng hi social media hman tangkai thiam avanga lo awm a ni kan ti thei ang.

Heng thil hi thuthang leh mi sawi satliah mai ni lovin a takin a 'video' kan hmu nghal thei vek a. A hmuhnawmin a lawmawm takzet zet a ni. Heng thil chi hrang hrang han hmuh hi chuan Mizoramah kuthnathawktu taima te din chhuah hun a lo thleng ve ta tak tak dawn em ni aw, ti a ngaihtuah theih hial a ni. Kan Social Media te, kan Youtube channel te, kan whatsapp te a tangkai zawngin kan hmang ta a. Fiamthu leh zahmawh rawngkai te, game khelh nan leh insawisakna leh accident thla te vel en nan ringawt a hmang lova, thil tangkai leh midang fuih tawn theihna tur atan te, eizawnna lama tangkaiah te kan phone te kan hmang ve ta hi a lawmawm hrim hrim.

Heng kan hlawhtlinna hmel tilangtute, min zirtir tura thil awmdan min kawhhmuhtute hi an hlu hle mai a. Thenkhat phei chu an taima tih a hriat sa reng bawk. Mi taima leh ti tak tak tan lo chuan khaw kilkhawr leh chengker tak tak te, hnathawhna hmun leh aiawt chiahna hmun te thleng a a taka min entir tur neih theih hi thil tih theih a ni lo.

Tunah chuan kan mi taima leh remhria te avangin mahni inchhung lum aṭangin Mizorama thil thleng tam tak leh chanchin lawmawm te pawh kan hre thei ta a nih hi. Mizoram tana thahnemngaihna leh taimakna nena midang tana bengvarna tur leh thu lawmawm rawn pholangtute hi Mizote tan an hlu hle a ni.