HRIPUI KARA PHUL LEM PHAH

Mithiam leh mithiam lem lo thenkhat sawi lawk ang ngeiin hripui nen chuan kan inchenchilh ta viau mai a, kan chengho zel dawn pawh niin a lang. Zawi zawiin kan chengho telh telh a ang ta viau mai a, chenpui dan kan thiam loh chuan kan hah zual ang a, chenpui dan kan thiam chuan kan ziaawm deuh ang.

Sorkar lam tihtur han ngaihtuah hian pawisa hi kan mamawh viau awm mang e a tih theih a. Mahse kan pawisa sum leng vak lian ber chu infiamna lamah kan dah ta tlat mai ni hian a lang a. Han ngaihtuah vang vang hian a mak tih mai lo chu sawi tur a vang letling phian mai. Kan awm dan han en vang vang hian nula pakhat khawsak dan te kha min ti hre chhuak a. Tlangval nen an tlan dun a, an fanu duat lai leh pasal neih la hun lo ni a nu leh pain an hriat kha tlangval nen an lo inruk tak maiah chuan nu leh pa chu an thaw halh halh mai a. Takam tangkawng dawlh ang maiin an thu mel reng mai a. Chutih lai chuan an fanu chu ama thuin a rawn lang hlawl mai a. Thinrim leh mangang takin, ‘Kha, i lo haw a ni maw? Engatinge i lo haw leh?’ tiin beiseina nen an lo zawt a. Ani chuan, ‘Nokia pin tê ka theihnghilh a......’ a ti e an ti a. 

Damchhung thil, nunkawng zawng zawng her danglamtu leh a zuitu awm thei thil te nu leh pain an ngaihtuah a, an rilru a hah em em laiin a mobile phone charger ngawt chu an fanu chuan a lo lungkham tih a lo lang ta a. Nu leh pa te thu ang lova a pasal neih chungchang te, nakin zela a awmdan tur te chu ngaihtuah ta lo chuan a pin tê chu a rilruah a lian ber tihna a ni. 

Kan hripui hian min chenchilh a, kan duh lo chung chungin kan hnenah a awm a, a awm leh awm loh te kan ngaihtuah vut vut a, mikhual leh laina te kan mitngo rangin kan melh a. Kan awmphung pangngai pawha awm hlei thei lovin kan khaw chhung leh veng chhung aurinna lamah chuan hripui chungchang kan aupui luah luah a. Kan ri tak mur mur a. Chutih laiin kan nitin hna a thuanawp zova, kut hnathawk mi te an mangang a, hna hmabak neitute an chi-ai em em a. Kan tihdan leh kan tihdan thu-ah ngawt pawh veng hrang hrang mipuite kan inngur lek lek a. Kan sorkar pisa a buai zova, kan khawlai te a reh vung vung a, a chang leh thil lei inchuhin kan phu mur mur a. Buai chitin rengin kan buai a. 

Chutihlai chuan kan pawisa leng­lam (SEDP) tam ber chu infiamna lamah kan han dah mauh mai a. A awmzia hrethiam apiang an mangang a, mak an ti a, hrethiam tura kil hnai tak tak thenkhat tan phei chuan hnathawh zai rel a har ngawt ang. Hripui hi tuang tihchhah avanga kiang mai tur a ni lova, tute pawi khawih emaw ang a, ‘Miin an sawi rei peih chuang lovang,’ tih ngawt chi a ni hauh lo. Kan beih a, kan do a, kan hneh a ngaiin a lang a. Mithiamte thlirna a ‘December thlaah chuan hri kai hi 5000 kan tling ang,’ an tih hi a thlen dik vaih phei chuan kan nasa lo dawn viau mai. Chutih laia phul lem phah ngawt kan lo buaipui a, kan pawisa lenglam tam ber hmanna tur atana kan dah ta mai hi ngaihtuah chian chuan a mak tih mai lo chu sawi tur a vang.

Tunah hian Aizawl lamah chuan hri kai leh kai lo endiktu tur hi an indaih lo hle a, a thawk chhun te pawhin rim takin an thawk a, an tlin loh pawh hlauhawm tak a ni. Tun aia indaih deuh zawka kan hri kai leh kai loh endiktu kan neih theihna tur te, hmanrua kan neih tam tawk theihna tur te, hei aia rang leh chak zawka hri kai leh kai lo kan finfiah zung zung theihna tur te leh hri laka kan him theih nana inzirtirna kan neih theihna tur te leh kan hripui nena kan indona lama thil tul zawng zawng fel taka kan tih theihna tur hi kan mamawh hle a a lan laiin khelmuala hnim lem phah nana hetianga pawisa kan han dah hi chu kan nauvi ‘nokia pin tê’ ngaihven nen kan inan hmel ngawt mai. 

Thil awmdan han en vang vang hian damdawiina in nawr luh zel mai hi a kawng niin a lang lo hian ka hre ve a. Heti chuan kan la indaih lo ngei dawn tih hi a chiang viauin a lang a, tun atang hian hun harsa zawk atan kan sorkar pawisa pawh kan renchem a ngai viauin a lang bawk a. Kan tlin reng theih dan tur zawngin mahni in lama inkhung hran dan leh tihdan tur te hi inzirtir a, hman nghal a tul hlea a lan laiin a phul lem a zawngin kan kal mauh mai a, a hun lo angreng hlein a lang. Hri avanga thi kan la awm lova, kan vanneih vang te leh kan hnathawktute leh kan sorkar hmalakna vang te pawh a ni ang. Mahse theihtawp kan chhuah chung pawhin mithiamte sawi lawk angrengin kan pung chho hret hret zel a, chutih laia phul lem hian rilru a kap lo thei lo. 

Zaipawl an zai dawn a, Conductor duh thawh deuhvin a thunawn sang laia an tlin loh tur khawpa sanga a ‘key’ a lak mai chuan a buaithlak ang hian, kan hripui buai lai hi chuan infiamna lama kan pawisa hman tur te hi chu ngaihtuah rih lo ila, hripui do nana pawisa renchem te inzirtir ila, a thawktute pawh rimtawng lutuk lova tlo taka an awm theihna tur ngaihtuah a that viau laia phul lem phah nana kan pawisa sik chhuak hian ngaihtuahna a hruai thui hle zawng a nih hi.