INTHLAN A HNAI ZEL

Political Party te chu inthlang turin thiam dan ang angin an inbuatsaih chho zel a, a ngaihven deuh tan leh a ngaihven lem lo tan pawh kil hrang hrangah thawm hriat tur a awm chho zel a. Mipui ngaihdan lakna (Opinion Poll) pawh Youtube lamah en tur a awm ta nual mai. Mi tam takin he kan inthlang tur hi an ngaihven a, inthlanpui reng reng chu a ngaihven tan chuan thil pawimawh tawpkhawk a ni a tih theih awm e. A chhan pawh he inthlan hian kan ram awmdan tur a hril tlat a ni.

Inthlan ngaihventu tam tak hi chuan kan ram hi an ngaihtuah a, kan ram hmasawn leh hmasawn loh hi inthlan atanga intan tur a ni tih ngaihdan nghet tak an nei a. A dik pawh a dik reng a ni. Ram hmasawn lo leh hnam zahawm lo te hi an hruaitute zir loh vang te a ni a, ram changkang pawh an hruaitute avang bawk a ni. Chuti a nih chuan ram hruaitu thlanna hi thil pawimawh tak a ni lo thei lo.

Heti a nih lai hian mipui ngaihdan laknaah mi pangngai awm fu fuin inthlan lam an ngaihsak lova, chinchang an hre lo em em a ni tih hriat tak maiin ngaihdan engmah an nei lova, ngaihdan latute pawh chhanna mumal an pe thei lo tih a lo lang a. Hei hian kan nunphung hniamzia leh kan ngaihtuahna tawizia a lantir thei awm e. Rindan nei lo rau rauah pawh neih lohdan kawngkal deuh a awm a, thenkhatin rindan an neih lohdan hi chu ngaihtuahna tlakchham vang leh hmathlir neih loh vang a tih theih ang. Mahse indem ngawt theih a ni lova, mahni nihna tawk bakin a lan chhuah hleih theih tlat loh a ni.

A mipui lam chu heti hi kan ni a, ngaihtuah nei lo tak tak zingah hian ngaihtuahna zawng zawng seng leh ngaihven em em an awm a. Thenkhat phei hi chu an awm mai mai hi an tang teuh reng mai niin a lang a. Hei pawh hi a mawh lo. Kan dinhmun leh thil awmdan thenkhat han hmuh hi chuan thin te a rim a, rilru te a na a, mipuite mai ni lovin mahni thlengin kan inkhawngaih thei hial. Hetiang dinhmuna kan lo ding ta hi ngaihtuah chian chuan a tlawmthlak a, a rilru natthlak a ni.

He kan hma inthlanah hian tu a te pawh lo thlang tling ila kan mi thlan chhuah te chuan mipui hi min zah zui sela a duhawm khawp mai. Mipui zahderna tel lova ram hruaitute an khawsa anga a lan chuan a hrehawm a, a thinrimthlak a, a beidawnthlak bawk. Nakinah, rorelna thutthlenga an thut hunah mipui min zah derna tel lova an khawsak a, duh duh sawikhum mai mai theih anga min ngaih zui chuan a thin natthlak hle dawn a, kumkhuain lung a awi lo thei a, ram rorelna fawng an vawn tawh loh hnu thlengin anmahni pawh mimal takin kan zah lo ve thei a ni tih tun atangin hria se a duhawm khawp mai.

ZPM Candidate te zinga thenkhat hian MLA an nih pawhin an eiruk loh tur thu an sawi a. Hei hian thla chu a timuang deuh. Party dang candidate zawng zawng te pawh hian hetiang hian sawi ngam ve se a duhawm khawp mai. Inthlang ila, ZPM Party hi rorelna fawng vuan khawp lo thlang tlingin roreltu ni ta sela, hlemhletna laka an fihlim lo ni a kan hriat chuan mipui hian kan chhuahchhal ngam tur a ni ang. Rinawm awm taka lang, fel taka inchei, inkhawm te pawh inkhawm ve zat zat, han biak a hawihhawm taka min chhawn, mahse rinawm hauh si lo hi ram hruaitute zingah hmu nualin ka inhria a, hrehawm ka ti thin. Ram hruaitu, pawisa thila rinawm lo hi hman atang tawh a kan harsatna ni ngar ngarin ka hria a. Pawisa thil kher lovah pawh hleih nei taka rorel a, mahni chhungkhat laina leh Party mi te duhsak uchuak bik lutuk te pawh kan harsatna a ni. Hmanni lawkah Assembly House a thawktu tur lak thuah thuneitute vua leh vang hlir mai an han tling thup te kha chu Court lamah leh dan lamah thiam chang eng ang mah se a awihawm thei lo reng reng a. Khatianga zak lo taka ti duh lo tur kha kan roreltute hi ni se a duhawm khawp mai.

Thiamna leh finna hrang hrang hi a hlu tehmeuh mai, mahse dikna leh rinawmna a tel loh mauh chuan chung thiamna chu a tangkai nep thin. Thiam loh vang leh hriat loh vang ai chuan eiruk leh eiruk loh te, hlemhlet leh hlemhlet loh te hi kan buaina chu a ni zar zar zel. Dik tak leh rinawm taka kan tih rau rauah thiamna leh zeina te, hmangchang hriatna te hi chu a tangkai lehzual a. Thiam eng ang mah se hlemhletna nena roreltu chuan a rel fuh tak tak ngai lo. Chuvangin he kan inthlan turah hian an eiru dawn nge dawn lo, hleih an nei dawn nge dawn lo tih hi kan mi thlan tur te kan tehna lian tak a ni turah ka ngai.

Congress hian that loh theih lohna bawm an sawi a. Khawvelah hetiang thil hi awm ni se chu a tha awm ngawt mai. Democracy te hi a thu leh hlaah chuan a tha viau, mahse a tak taka kan han hman chuan eiruk hmang ni ngeia lang pawh kan thlang tling leh zel thei miau mai a, a buaithlak khawp mai. Engkim hi a titu a zir zel a ni. Eng bawm pawh hi a enkawltu a zir zel a ni. A sawitute zinga mi hi mi rinawm leh rintlak tak tak hmel an pu a, mimalah pawh kan lo rin pawl an ni. Mahse 'loh theih lohna' tih ang chi hi he khawvelah hian a awm tak tak ang em tih hi ngaihtuah a ngai. Pu Lal Thanhawla khan eirukna kha a zung chawpa phoro a tum thu chiang takin a sawi a. Mahse term khat ral hmain a tumna kha a zuzi ral ta niin ka hria. Chutiang bawkin Pu Zoramthanga khan Chakma District Council thiah kha a hna hmasa ber tur a nih thu chiang takin a sawi a, mahse a hlawhtling lo. ZPM hian District Hospital tina RT-PCR khawl dah turin an Manifesto-ah an ziak a, eng tak ang maw le.

Mi tam tak leh a bikin thalai tam tak phei chuan hmasawn ve tawh kan duh a, tuna kan awmdan hi kan lungawipui thei tawh lova, chuvang chuan inthlan hi kan ngaihven a, mi zawng zawng hian ngaihven ila a tha khawp mai. Mahni chunga roreltu tur ber pawh kan thlan uluk peih loh chuan roreltu tha nei tlak kan ni lovin a lang. Kan mi thlan chhuah te hian khawngaih takin he ram nula leh tlangval rumna hi min chhawk zangkhaiin State dang te nena inkhaikhin dawn pawh a hmai uang ve theiah min siam se kan va ti em!