SINGAPORE LAM BAWK

Kumin chu Singapore lam chanchin kan ziak tam ta hle mai a. A inthlahrunawm lek lek mai. Mahse kan mamawh leh kan nun nena inrem niin kan hre miau mai si a, kan han ziak leh poh a ni ang chu.

Tunhnaiah ṭhiante zarah Singapore Prime Minister Lee Hsien Loong-a thusawi Whatsapp lamah ka lo hmu a, a ropui ka tiin kan ram hruaituten en ve se ka ti ngang mai. Loong-a chuan heti hian a sawi :

"Thlawhna lama thawkte an nuar a, anmahni nen hmaichhanah ngei kan inhmu a. An hnenah chuan, 'Tunah hian duhthlan tur pahnih in nei. In thiltih hi in bansan dawn nge in chhunzawm zel ang a, ka thuneihna ka hmang dawn? In thiltih avang hian darkar tinin sorkar pawisa tam tak a luang ral a, 'advertisement' kan tihna zozaite kha a uiawm lutuk. In duh chu thlang fel ula, in chhunzawm zel dawn chuan ka thuneihna tawpkhawk ka hmang ang,' tiin hmun leh hmunah ka hrilh a ni," a ti a.

Singapore Airlines len turzia leh hnathawktu tam turzia te, an ṭanrual chuan an hlauhawm turzia leh International travel thlenga an buai phah dan tur chu helai Vailuikam aṭang hian kei phei chuan ka hrefiah phak lo hialin ka hria. An thlawhnate han chawl ta tak tak se darkar tina an buaina te, ni khat chhung an buai pawha zin mi leh hna ṭul nei tam takin sorkar an nawr nasat turziate leh, buaina a tam turzia chu keini Singapore pawh a taka la hmu lo tan chuan Kolkata Airport mitthlaa hmu chung ringawt pawhin a rapthlak tham a ni. Chuti chungin an ram Prime Minister Lee Hsien Loong-a chuan, "Kha leh chen kha he ram hi siam tumin kan lo bei tawh a, nangni'n hetia in chawh chhiat mai hi ka phal reng reng lo," a ti a. Ni hnih ni thum an buaina chungchang leh an pawisa hloh tur a sawina chauh a ni lo, kalphung chungchang a sawina a ni daih.

Kan sorkar kal tawh kan hriat phak chin, Brig. T.Sailo kaihhruai tih chauh lo kha chuan sorkar hnathawk inpawlkhawmte huaikawm bawlna leh thil ngiat avanga an thiltih reng reng thuneihna leh thil awm dan dik hmangin a chhang let ngai meuh lo va. Sorkar hnathawk leh pawl lian tham deuh nena innawr ai chuan eng emaw tia an duh ang diak diak ni lova inbiakrem a, a pumpelhna eng emaw zawn hi finna ropui berah kan ram hruaitute hian an ngai zel niin a lang a. Vawiinah chuan kan sorkar lakah hian kan huangtau ta viau zawng a nih hi. Thil awm dan dik sawi chiah lo va, lehlama mihring awmin a pai dam theih tur thu ngawt zawng chunga indawr hi kawng tam takah ṭha ve mah se a ṭha vek lo — mi kan tingampa zel.

Tunhma aṭang khan kan sorkar hrawn ṭhinte rorel dan hi ka lo ngaihtuah ṭhin a. Lungawi lo zingah kei ngei pawh ka tel tawh ṭhin. Chu chauh a ni lo, kan sorkar zar zovin tun thlengin thla tinin pension hlawh ka la ve ngat ngat a. Mahse kan sorkar hotute thil thlir dan leh Lee Hsien Loong-a te thil thlir dan hi chu chhim leh hmar angin a inpersanin ka hria. Loong-a te chuan ram neitu dinhmun tak tak aṭangin thil an thlir a, tih theih hauh loh chin leh mihring pangngai tana tih duh miah loh chin an nei a. A ṭul chuan chu chu an sawi tlang mai a. Mahse kan hotute ve hi chuan tih duh loh chin pawh an nei lo a ni awm mang e; tih hial tlakin ṭawngkam thlum leh ṭawngkam thiamna hmanga intih lungawi hi an thupui niin a lang.

Tunah hian kan sorkar hnathawkte hlawh pek theih ngawr ngawr hi kan State sorkar chuan a buaipui a ni ta ber mai a. Kan sorkar sum dinhmun awm danah chuan sorkar hian cheng za a neih chuan chumi aṭanga sawmriat vel chu sorkar hnathawk hlawh leh ilovah hian a ral a, chumi bakah cheng za aṭang chuan cheng sawm vel hu hi hmasawnna hnathawhna tur a awm ta chauh mai a. Chu pawisa tlem tè chuan tlin ngang lo mah se, chu pawisa tlem tè pawh chu eirukna nen kan chawhpawlh a, chuti a nih avang chuan ṭawngkam thiam hmanga mipui tihlungawi tumin thu kan sawi vak vak a, kan thawh chhun chhunte chu a ropui thei ang bera lantir kan tum a, a chang leh Pathian hmingte kan lam nawk nawk bawk a. A chang leh mipui tam tak tihlungawi tumin pawisa faite kan han sem leh lawp lawp a. Kan buaina awm reng erawh hnathawktu atana dan ang thlapa kan lakte hnena hlawh pek theih leh theih loh a ni si.

Lee Hsien Loong-a te chuan Airlines hnathawktu lungawi lo ṭhukhawm chu a'n hmachhawn ang ren rawn a, "Hetia in tih zel vaih chuan in bang vek ang a, thubuai ka siamsak ang che u a, inchhir vawng vawngin in awm ang," tih chu a sawia sawi lovin a hmel leh a chetziain a lantir a. Darkar khat leh minit nga chhungin an hna ngai an chhunzawm leh vek mai. Keini chuan kan sorkar hnathawkte ngam loh hi kan intihhmuh a. "Office kal loh tur," an tih vaih chuan kan ṭha en mai zel a. Vawiinah chuan heti khawpa pawisa kan harsa a, kan dinhmun a chhe chung hian kan ram hruaitute hnenah chuan zahderna leh timna chhe té pawh awm lovin, "D.A hi Central sorkarin a pek anga min pek hi in ba," "Sorkar hnathawkte hi kum 62 kan nih thlengin kan thawh min phalsak rawh u," an ti ta ngawng ngawng mai a. Kan ram hruaitute lah chuan, "Ekhai, kum 62 thleng thlenga in thawhna tur chhan a awm lo. Keini State leiba ngah ber ramin State dangte tih duh loh heng thil hi kan tih a rem lo," ti ta lo chuan ṭawngkam ṭhaa thlem daih leh eng emaw ti tia an huatthu sawi loh ringawt an tum ni tlatin a lang. Dik tak chuan heti khawpa sorkar hnathawk hlawh pangngai pek pawh kan harsatpui laia heng thu sawi hi chu huangtauthlak tak niin a lang. A nihna tak anga sawi dawn chuan, "Ekhai, heng hi keini Mizoram sorkar tan tih rual a ni lova, in hre vek a. Chuti chunga lungawi lo tlat in awm chuan in bang ngam a nih loh chuan ṭawngkam dengkhawng leh thiltihin min nawr hauh suh u," tih hi kan sorkarin a chhanna tur niin a lang a. Chu thu chu pawm nahawm deuhva an sawi thiam chuan a ṭha, pawm nahawm vak lova an sawi a nih pawhin sorkar hnathawkte hian an hrethiam tur a ni ang.

Khaw ṭhenkhatah chuan V.C te hian an khaw tana Development pawisa lo kal chu an ngaihdanin anmahni V.C member emaw, VCP emaw chan tur tawka an ngaih an han sik thla duai mai a, a bángin a daih tlem chuan a daih tlem ang angin an ṭawngkam thiam hmangin an sawi fel tawh mai ṭhin niin a lang a. Chu chu khaw mipuite zingah pawmpui tawk an lo awm a, a pawmtu an awm takah chuan a pawm lotu tan sawi a lo nuam tawh ṭhin lo va. Huaisenna leh neitu rilru putna tak tak nei lo tan chuan ngawih chuh a awl khawp mai. Kan awm dan hi chutiang deuh chu kan ni. Lee Hsien Loong-a te chuan an ngaihdan leh thil nih dan dik chu huai takin an sawi mai a. Chutianga an tih ngam ṭhin vanga Singapore chu Singapore a lo ni a. Vawiina kan Mizoram dinhmun nen hi chuan lei leh van ang tluk dawnin kan lo inthlau ta a ni.