HLAU KHER LOVIN FIMKHUR ILA

The Straits Times chanchinbu, Singapore atanga chhuak chuan Mizoramin Covid19 vanga thi kan la neih loh thu sawiin Mizoram, India ram kilkhawra State te tak te chu an fakawm tih thu a chhuah a. Keini tan chuan a chhiar a nuam ngei mai. A tha zawnga kan han lan ve deuh hi chuan tu tan pawh ngaihthlak a nuam thin a.

He hripui kan dona kawngah hian tun thleng chuan kan tangrual hle mai a, sorkarin theihtawp a chhuah a, chutih laiin tlawmngaia thawk chhuak ten nasa takin tha an thawh a. Hri dovin ramhnuaiah te, luipui kamah te leh khan remchang dang dangah tlawmngaih chhuah a riak an awm a. Chutianga riak chhuak te ei tur lo ngaihtuahpui em em a, a thawna thawn ta tawk tawk te awmin veng hming te leh mimal hming tein kan thawh a. Khaw chhungah mi tlawmngaiten mipui an khuahkhirhin kan thiam ang angin theihtawpin kan bei a. Khaw chengker deuh thenkhata kan tihdan thenkhat phei chu a lutuk lam mah mah em ni aw, a tih theih nain kan thiam dan leh kan hriat dan theuhva kan beih a ngai si.  

A tu a mah hi kan chiang chiah lo nain he kan hripui hian kan thisen a ngam lo ve deuh em ni ka lo ti ve deuh mai mai a. A tir lama he hripui vei, ramdang miten an tawrhdan kan han hmuh leh kan hriat theih chinah chuan a vei tawh chu an khawngaihthlakin an vei na hle mai a, an thi pup pup mai niin kan hria a. AIDS ang deuh thawin a vei tawh chu thih nghal zel mai tur emaw, ICU lamah hautak deuh maia enkawl tur emaw angin kan lo ngai lo thei lova. Dik tak chuan thawklehkhata min rawn seh hlum nghal tawp thei tur, sakei hlauh takin kan hlauva. Kan mithiam ten an hlau lehzual ni te pawhin a hriat.

Kan mithiam leh sorkarin fim­khurna tur a tih te leh hlau thiam tura min zirtirna zawng zawng kan zawm avanga vawiin thlenga nunna chân awm lova awm thei te pawh kan niin a rinawm ve bawk a. Hlau tura kan inzirtir te pawh a hlawk hlein a rinawm bawk. Kan tih tawh zawng zawng kha a thaah i ngai ang u. 

Tun hnua han thlir let hi chuan kan hri hian kan thisen a ngam chiah lo emaw, kan haw lo bik emaw, kan inenkawl dan hi a tha emaw a nih ngawt loh chuan hei a vei kan tam ta hle mai a, mahse pakhatmahin nunna kan la chân ta lo hi a tha zawng­in ngaihtuah tham fe niin a lang. Damdawi lamah kher kher chuan keini chu ramdang leh ram changkang zawkte nena tehkhin hleih theih loh khawpa hmunhma leh bungraw nei chau kan ni kan ti lo thei lova. Chuti chunga kan la thihpui ve miah lo mai hi van­neihna satliah nge chhan dang a awm?

Tunah hripuiin min rawn luhchilh hnai zel a, tam tak chu kan khur nasa tawlh tawlh ni te pawhin a lang thei a. Thingtlang khaw ril then­khat, midangin an tlawh pawh ve lem loh te pawh nasa takin an lo inkharkhip a, mihring rinhlelhawm tur deuh anga ngaihin an tlawh reng reng loh thenkhat te hlei hlei pawh mahni khaw pawn a daikawngkhar siam a, khaw chhunga luh phal lo te pawh an awm. Aizawl khawpui chhungah ngei pawh hripui an vei leh vei loh endik hnu a vei tih hriat chhuah tak, hlau em em leh thlabar taka awm te kan awm ta a. Tumah kan demawm lem lo.

Hetih lai hian engtinnge kan awm tak zel ang? A hlau bechhe zawnga kan inzirtir chuan fimkhur a ngai tawlh tawlh a, chuvangin a vei ni thei awma ngaih te atanga hla taka awm a ngaih thu kan inzirtir zel chuan tunge a vei chhun te enkawl ta ang? Chu chauh a ni lo, a vei rau rau hi kan inlungngaih hleih dawn riau tih a lang. ‘Mizoramah mi sang chuangin an vei tawh a, an thi lova, kei hi eng vangin nge ka thih bik ang?’ tih rilru te pawh kan vei tawh chuan put a ngai ta nualin a lang. Shakespearre-a khan, ‘Mi dawihzep chu an thih hmain vawi tam tak an thi nawn thin,’ a lo ti tawh a. Fimkhur loh tur tihna ni lovin, hlau em em leh khur chunga awm hi a hlawk lo ngawt mai. Hlauhna thinlung tel lo, fimkhurna bansan si lovin awm thei ila a duhawm ngawt mai. 

Kan la vei em lo a nih chuan hlau lem lo ila. Kan lo rinhlelhawm deuh a nih pawhin hlau lem lo ila. Kan lo vei ta tak tak a nih pawhin hlau lem lovin tuar tur ang ang chu chhel takin tuar ila kan vanneiin a rinawm a. Hlauh loh vanga fimkhur loh ching lo ila. Kan awmdan ang angah kan vannei chu ni ve mai awm a ni.