CONTRACTOR AWM LOHNA MIZORAM

Mizoram hian hnathawktu pawl pakhat, Contractor kan tih thin kha a nei ta lova. Tun dinhmunah chuan contractor pakhat chiah, Kamrula Chhangte deuh chauh hi mipuiin kan hre ta a, hmana contractor kan hriat veho Pu Liana te, Pi Liani te, Pu Thanga te, Pu Ruala te zawng zawng, kha chu an bo zo ta diak a, Kamrula lo hi chu Mizo mipuiten contractor hmelhriat kan nei ta mang lo. Midang zawng zawng aiawh zo tur khawpin amah hi a lar thung a. Hnathawktu dang leh chu Consulting Firms hlir an ni ta.

Contractor chu sorkara inziak lut hna thawktu, eizawnna atana sorkarin thawh tur hna a neih ang ang thawk a, mahni a chutiang thawk tura awm ve hranpa chu an ni a. Dan naranin Contractor hi keini ang mi naranin kan han hriat ve dan chuan chi thumin an inthen a. A hniam ber chu Class III an ti a, chung chuan hna tenau, engemaw chin hi an thawk ve thei a. Sorkarin hna tesep cheng nuai 50 tling lo chin vel thawh tur a neih chuan dan angin hnathawh tur awm thu darhzau takin a puang a, a puandan ber chu tunhma kha chuan chanchinbu tlangtla deuhva chhuah a ni tlangpui a, chu chu Contractor te chuan Department lamah zawt chiangin an thawh theih tur anga an ngaih chu an chhang thin. An thawh theihna rate sawiin thawk tura an tlin vena te tarlangin an chhang a, an zing atang chuan sorkar pawisa hek lohna tura a rate hniam thei bera chhang chuan a thawk thin tlangpui. A thawh dik loh emaw, a thawh chhiat luat emaw chuan sorkarin hna dang chhang thei tawh lo turin a ti (black list) a, hna thawh tur lo awm leh tikah pawh thianten an chhan sup sup laiin a chhang ve thei tawh lo. A thawh that erawh chuan a hnathawh thatdan a zir te, a thawh tam dan a zir te, a hmanraw neih a zir te leh a 'senior' dan a zir tein Class II-ah a kaisang ve thin a, chutianga kaisang tur chuan dil te pawh a ngai awm e. Class II chuan cheng nuai za hnuai lam man contract hna eng pawh sorkarin a tlangzarh reng reng chu chhangin a hniam bera a tan chuan a hmu leh a. Chutiang zel chuan Class I an lo nih chuan eng anga hna lian pawh an lo thawk ve thei ta thin a ni.

He tihdan phung hi India rama kan hriat ve phakah chuan contract kalphung leh sorkarin a tihdan tur a ni a. Kan sawi hi a kimchang hauh lovang a, mahse a tlangpuia thil awmdan chu hetiang deuh hi a ni. Mahse hemi piah lamah hian induhsakna te, inhmelhriatna te leh hnathawk tha bik te vulh dan te, hnathawh hleih theih lohna khawpa chhan hniam lutuk te, chhang hniam chung reng si a hnathawh chhung rei avanga thawhna rate leh a hna pumpui thawhna tur pawisa tihpun vak vanga fing kherek taka hlawk deuh taka thawh dan te a awm a. Sawia a lan ang puat hian contract hna hi a lo awm kher lova. Chu chauh ni lovin hna bik — hmanhmawh bik te, thiamna ngai bik te, tha chungchuang ngai bik — te a awm leh a. Chutiang thilah chuan sorkar dan pangngai anga thla khat emaw thla hnih chhung emawa a chhanna (tender) tihfel te te a, hna inpek te chu a lo buaithlakin a tha lo thei a. Chuvangin a thawk thei bik tur leh hmanhmawh taka thawk tur bik mi tlemte hnenah hnathawh tur chu tlangzarh a, thawhtir thuai an ni ta thin a. Chutiang tihdan bik chu Restricted Tender an ti. He Restricted Tender hi a tulna hmuna a that viau laiin tihdan him lo leh dik lo tak mai a ni thei a. A chhangtu an tlem chuan a chhangtute chu intiam rualin sang deuhvin an chhang ang a, sorkar tan hekna a ni thei. Chu chauh ni lovin sorkarin fin kherek chhuahin dan zawm ve ang deuhva lang siin a chhangtu nen intiam rual sain duhtawka sangin an chhang a, chhangtu dang atan midang, hmu ve thei lo tawp tur leh hmu lo tur chiang sa ruatin thil a tih theih a. Entir nan mau chi supply te ang kha chu a pe theitu Firm pathum emaw ni khan a rate inang thapin an han chhang a! He Restricted Tender hmang hian tuna kan sorkar hrawn mek hi chuan hna zawng zawng deuhthaw a thawk ta vek a. Sports Department-ah phei chuan a vaiin Restricted Tender hmanga hna thawh a ni a. Hetianga sorkarin a ti hi a titu chuan hmangchang hria a intiin remhria te pawh a inti viau ang a, mahse sorkar kalhmang hre pha chin mi pangngai tan chuan ngaihsanawm lam aiin tenawm lamah a kal. Hetianga sorkarin a tih duh tawh hi chuan 'thil fel lo,' chu a awm ngei ang tih rin nachang hriat loh chu thil mak tak a ni.

Democracy ramah chuan sorkarin thil a tih dik loh deuh chuan mipuite hian aw kan chhuah a ni ngai a. Mahse Mizorama Registered Contractor te hi chu an ngawi hle hle mai a. Kum engemawzah kal ta atang khan an thawh tur ni awm tak hi Kamrula te, NECS leh Party miten an vaihma ta vek a. Anni Contractor te chu an awm ta mai mai ni chek tur a ni. An awm mai mai chu sawi loh, an ngawi reng mai a. Tunhma zawng khan contract hnathawh kha an eizawnna ni lovin thildang atang hlirin pawisa an lo hmu em ni tih hial tlak a ni. Pawisa hmuh chungchang hrim hrim chu thudang, an eizawnna ber contract hna kha an lo zahpui hle em ni ang tih thlengin a ngaihtuah theih. Kan contractor te hi mi vengva chin, thil awmze hre phak anga ngaih an nihna laiah an ngawi hle hle thei mai hi chu thil mak tak a ni e.

Kan Registered contractor-te hi a engamah hmain an tlanchhe sa a ni thei a, tihdan phung pangngai phut chu a sawt dawn loh lutuk avangin an beidawng sa ngawih ngawih a ni thei. Engpawh ni se Mizoram sorkar hnuaia contractor pangngaite tana hna a awm ve ta miah lo hi chu thil mak tak zawng a ni e.