North Korea tlawha zin, Russia president Vladimir Putin chuan NKorea ram hotu, Kim Jong-un tan Russia siam, luxury limousine Aurus Senat a pe. Hei hi a official presidential car a ni bawk. Meeting an neih zawhah test drive pawh an nei nghal a ni.

Putin hian kumin February thla khan Kim hi Aurust limousine hi a lo pe tawh bawk a, tihian Kim hian pahnih a nei ta a ni. Aurus hi version pathum - Standard Senat, Senat Long leh Senat Limousine te a awm. Aurus-ah hian ADAS, emergency braking system, emergency call support, 8 modes back LED lighting, wireless phone charger leh Wifi te an awm vek a ni. Kim a pek hi eng version tak nge tih erawh sawi chian a ni lo thung.

NKorea khawpui, Pyongyang-a meeting an neihah Putin leh Kim hian ram pahnihten economic leh military lama an thawhdunna huang zauhna tur inremna an ziak leh a ni. Hei bakah hian nuclear energy, space exploration, food and energy security lama thawhdunna tur pawh an ziak bawk.

Putin hian NKorea a tlawh hnuah, ni hnih cham turin Nilaini khan Vietnam a pan leh a, hei hi US chuan a ngaimawh hle. Hanoi-a US embassy chuan President Putin-a Vietnam tlawh hi sawisel nghalin, 'Eng ram mahin Putin hi indona a kalpui mek a chawilarna tur remchang leh, rawng taka a chetna chungchanga a insawithiam theihna tur remchang an pe tur a ni lo," a ti.

Hetih lai hian Vietnam president thar To Lam leh Communist Party general secretary Nguyen Phu Trong chuan President Putin hi lawm takin an lo dawngsawng a ni. Putin chuan President Lam hnenah Vietnam nena inlaichinna ṭha leh chak tak siam chu an ngaih pawimawh ber zingah a tel tih a hrilh.