South Korea Constitutional Court chuan Yoonn Suk Yeol chu nimin aṭang khan an ram President a nihna aṭangin a ban ta.
Yoon Suk Yeol hi nikum December 3-a an rama sipai thuneihna sang pekna tur, martial law a puan avang leh Parliament-a sipaite a tirh avangin an ram parliament, National Assembly-ah President a nihna aṭanga paihthlak a nihna tur ngaihtuah tura pawm a ni. Parliament-a vote lak a nih hnuah Constitutional Court chuan a chungthu hi a ngaihtuah ve leh a ni. Yoon hi a chungthu ngaituahna tur pawm a nih hnu hian President a nihna aṭangin chawlh tir a ni a, acting president ruat a ni.
Constitutional Court acting chief, Moon Hyung-bae chuan member pariat awmna bench chuan Yoon paihthak rawtna hi a pawm tih sawiin, martial law a puan chu an ram constitution leh dan dangte bawhchhiatna lian tak a ni, a ti.
Court thutlukna siam chungchangah hian Yoon chuan thuchhuah a la nei lo a, mahse rorellai People Power Party chuan an pawm thu an sawi.
President a nihna aṭanga Yoon ban a nih tak avangin thla hnih chhungin inthan hi atsaih a ngai dawn a ni. Mipui ngaihdan lak hnuhnung berah chuan eptu pawl, Democratic Party hruaitu Lee Jae-Myung chu an ram president thar atana an duh ber a ni.
Yoon-a'n martial law a puan avang hian South Korea politics buaina nasa tak a thlen phah a, Yoon thlawptu leh dodaltute pawhin kawngte zawhin buaina te a chhuah phah a ni. Court thutlukna siam vang hian Yoon thlawptute hian kawngzawhte an thar thawh leh a, buaina a thlen leh hlauhthawnna pawh a lian hle.
