Congress party chuan nimin, Thawhṭanni khan sorkar laipui chu Scheduled Tribe, Scheduled Caste, leh OBC te tan ramchhunga zirna in hrang hrang, mimal leh sorkar enkawlah quota an neih theihna tur dan siam turin a ngen.
Party general secretary, communication Jairam Ramesh chuan parliamentary standing committee Education, Women, Children, Youth, leh Sport chuan Article 15(5) hmanna tur dan thar siam a rawt a ni, a ti. Article 15(5) hian state tin te chu hnam hnuaihnung zawk leh zirna lama hnufual zawk heng SC, leh ST bakah OBC-te tan sorkar leh private sector hnuaia zirna inah quota siamsakna tur dan siam a phalsak a ni.
Ramesh chuan Lok Sabha inthlanpui neih zawh tak puala campaign neihah khan Congress chuan hnehna an chang a nih chuan Article 15 (5) hi private institution-ah hman a nihna tur dan siam pawh a tum thu an aupui tih a sawi.
Constitution (Ninety-third Amendment) Act, 2005 chu January 20, 2006 khan ṭan niin a siamṭhatnaah hian Article 15(5) hi rawn tarlan tel a ni. Central-a zirna inah te Article 15(5) hman a nih theihna tur hian Parliament chuan Educational Institution (Reservations in Admission) Act, 2006 chu a lo pass tawh bawk niin Ramesh hian a tarlang. Heng dan siamte hi central education institution-ah te January 3, 2007 khan hman tura pawm a lo ni tawh bawk.
Hetih mek laiin Lok Sabha Leader of Opposition leh Congress hruaitu ni bawk Rahul Gandhi chuan prime minister Narendra Modi chu Kerala, Gujarat, leh Andaman and Nicobar thliarkara tuipui kam hnaiha leilung hausakna lakchhuahna kal pui an tumnaa (offshore mining) tender an chhuah chu ti tawp turin a ngen.
Lehkha thawnah hian heng offshore mining-te vanga heng lui leh tuipuia cheng nungcha ten an tawrh phah theih thu te a ziak tel. Heng hna thawhna tur atana hmalakna kalpui an tum mihringte tana ṭha tur zawk a nih vangin tender chhuah tawhte ti tawp leh turin a phut a ni.
