Congress Working Committee meeting, nimin Nilainia Patna, Bihar-a neihah Congress president Mallikarjun Kharge chuan kumina Bihar Assembly inthlan lo awm tur chu prime minister Narendra Modi kaihhruai sorkar hlemhletna leh dik lo tak, tawpna tur a nih thu a sawi. Kharge chuan NDA kaihhruaia chhunglam buaina chu a lang chhuak ṭan a ni, a ti.

Kharge chuan Bihar chief minister Nitish Kumar chu BJP hian an chhawr theih an inring a, mahse, Bihar mipuite chuan BJP ruahmannate chu an hnawl tawh zawk thu leh sakhuana thlirna chauh chu a tawk zo tawh lo a, hmasawnna dik tak thlen ngei chu an duh zawk a ni, a ti. Ram pum chuan Modi kaihhruai inrelbawlna hlawhchhamna an hmu thiam tawh niin a sawi lang bawk.

PM Modi kaihhruai sorkar chuan khawvel huapah pawh India chu nasa takin a tawrh tir mek a, PM-in ṭhian anga a chhal ramte chuan India chu dinhmun khirkhan takah min dah phah mek, tiin Kharge chuan a sawi. Ramchhung ngei pawh vote tihchingpenna hmangin an lo bum tawh a, hei vang hian CWC meeting pawh Bihar-ah hian neih a nih thu a tarlang.

Kharge chuan Bihar-a 'Vote Adhikar Yatra' neih chuan state mipuite hnenah harhna a thlen thu leh Rahul Gandhi thlawpna nasa taka an lantir tawh thu sawiin, vote tihchingpen hmang hian hnathawh tur tlem, vantlang mipui thlirna mit tihdelna leh ram danpui kalphung tihchak lohnate chu Modi kaihhruai sorkar hian a thlen a ni, a ti.