Mystical Mizoram Ṭhazual Lengzem chart-ah R. Lalruatkima 'Min tuahrem thuai se' chu pakhatna a ni a, Hard Ray 'Ka hmangaih che' chu pahnihna niin Siampuii Ralte 'Thawnthu tawp thei lo tur' chu pathumna a ni bawk.
Pakhatna 'Min tuahrem thuai se'
Fam ta Lalṭanpuia Tochhawng hla phuah Lallianmawia Pachuau pawhin thiam taka a lo sak tawh ṭhin rawn thar thawh lehtu R. Lalruatkima chuan Ṭhazual Lengzem chart-ah pakhatna a nihpui.
He hla mawizia hi chu Zofate chuan kan hriat tawh kha. Lalṭanpuia Tochhawng khan a tleirawl ngaihzawng tana a phuah a ni a, Lallianmawia Pachuau khan thiam takin he hla hmang hian Zofate min lo awi tawh ṭhin.
R. Lalruatkima hian a rawn thar thawh leh fuhin Zofate'n he hla hi kan lo la ngaithla kham lo hle tih a hriat a, audio quality ṭha zawk nen a rawn thar thawh leh meuh chuan YouTube lamah pawh dah chhuah a nih aṭanga thla nga a tlin hmain thlirtu nuai ruk dawn an awm der tawh.
Chart hmasa lamah khan he hla hi pahnihna a nihpui tawh a, a sa thiamin a hla a mawi bawk nen, pakhatna a rawn nihpui pawh hi a phu viau mai.
Hard Ray leh Siampuii Ralte
March thla chawhnu lama Hard Ray-in an tihchhuah 'Ka hmangaih che' chu palina aṭangin pahnihnaah a rawn invawrh a, an dinhmun a ṭha sawt hle a ni.
Tunlai lengzem artist hmeichhe zinga huhang ngah ber pawl Siampuii Ralte pawhin a hla 'Thawnthu tawp thei lo tur' chu top 3-ah a rawn inhlankaipui ve leh bawk a, ani hi chart-ah a hla tihchhuah apiang a chet ṭhatpui ṭhin a, tunah pawh a dinhmun a ṭha sawt leh tawh hle.
Chart-a lang dangte chu
Jojo Jongte 'Suangtuahna' chu palina a ni a, Zaii Hauchhum 'Nghilh har di hmasa' chu top 5 khartu a ni. Lilzo, Apuii Chhangte, Jenny Jathang, Mathlenga leh DJ Lalvenhimi te pawh chart top 10-ah an lang.
