American-based multinational corporation leh technology company, Google-in kum 2024 kumtawpah topic hrang hranga khawvel huapa search hlawh zualte a ti chhuak leh a, news topic-ah chuan US inthlan chu Google-ah an zawn nasat ber niin, mi malah US president atana thlan tlin tak, Donald Trump chu an search nasat ber a ni bawk.
Kum 2024-a news topic bikah inthlan leh environment kaihhnawihte chu search hlawh zual an ni. US inthlan chu news lamah search nasat ber niin, khawvel pumin American politics an ngaihven zia a ti lang hle. Hei bakah hian khawlum lutuk chungchang chu search tam ber dawttu a ni bawk. Paris-a Olympic Games neih chu Google-a an zawn tam pathumna niin, hei hi opening ceremony sawisel hlawh tak vang kha a ni tel.
Mi malah chuan kum 2024 chhunga Google-a search nasat ber chu Donald Trump a ni. A thubuai neihte leh, a hnua US President thlannaah a hlawhtlin chhohna te chuan search bar-ah a chung ber dinhmunah a awm tir a, a chungchang sawizuina pawh a tam hle. Princess of Wales, Kate Middleton chu mimal search nasat ber dawttu a ni. Cancer a vei thu a puan leh, a hnuah a inenkawlna avanga vantlang hmuhah hun rei tak a inlan loh avangin ngaihven a hlawh a, a hriselna dinhmun chungchangah pawh rinthu lo sawi pawh an tam hle. US vice president leh President thlana Democrats candidate, Kamala Harris chu pathumnaah a lang. Algerian boxer, Imane Khelif chu search tam palina niin, Olympics-ah khan women walterweight boxing-ah gold medal a la a, mahse mipa nge hmeichhia a nih tia inhnialna a tamin, Google lamah ngaihven a hlawh phah ta a ni.
Movie category-ah Disney leh Pixax animated sequel, 'Inside Out 2' chu khawvela search nasat ber niin, 'Deadpool and Wolverine' leh 'Saltburn' ten an dawt. Top 5-ah 'Beetlejuice Beetlejuice' leh 'Dune 2' an lang bawk.
Song category-ah Kendrick Lamar hla, 'Not Like Us' chu kum 2024-a Google-a hla zawn nasat ber a ni a, nikum May thlaa a tih chhuah kha a ni. Rose leh Bruno Mars hit, 'APT' leh Creepy Nuts 'Bling-Bang-Bnag-Born' te chu hla zawn nasat zualah an tel bawk. Kum 2024-ah Google-a hla search tam zingah hnam leh culture hrang a inchawhpawlh hle. No 4-ah Japanese singer Kocchi no Kento hla, 'Hai Yorokonde' a lang a, No 10-ah Tamil singer Sai Abyankkar hla, 'Katchi Sera' a lang bawk a ni.
