Assam-a National Register of Citizens (NRC) kalpui mekah, nimin khan hming 1,02,462 awmna additional draft exclusion list chu an tichhuak.
Schedule of The Citizenship (Registration of Citizens and Issue of National Identity Cards) Rules, 2003-a a inziah angin additional draft exclusion list hi nimin khan tihchhuah a ni. Heta hming awm zawng zawngte hi nikum July 30-a NRC draft list tihchhuahah khan an hming a tel vek thung a, mahse enfiah an nih hnuah NRC list-a telh theih an ni lo tih an hmuhchhuah leh avangin an paih leh a ni.
Additional draft exclusion list-a hming langte hi ramdang mia puante emaw, 'doubtful voters (D-voters) leh Foreigners’ Tribunal-in an case a tihkhawtlaite an ni hlawm. List tihchhuah thara tel ṭhenkhatte hi chu claims and objection chungchanga hearing neihnaa thuhretua an ṭan aṭanga an paih lehte an ni bawk. Mi ṭhenkhat chu NRC draft list tihchhuah a nih hnua Local Registrars of Citizens Registration (LRCR) enfiahnaah list-a telh theih an ni lo tih hriatchhuah lehte pawh an ni hlawm.
Nimina list tihchhuahah hian claims and objections siamte dilna result erawh tihchhuah tel a ni lo a, nimin khan claims and objections siamte aṭang hian hearing an la nei. NRC final list hi July 31 hian tihchhuah a ni tawh dawn a, hetah hian claims and objections siamte dinhmun pawh hriat tura ngaih a ni. List aṭanga paih lehte hming hi a enna bik tarlan ni tho mah se NRC coordinator Prateek Hajela chuan mimal pawhin lehkha pek an ni vek dawn tih a sawi. Mahse heng mite hi claims and objection siamna hun pek an ni ve leh dawn nia sawi a ni bawk. July 5 aṭangin hearing neih ṭan a ni leh ang.
Draft list ṭum hnih tihchhuah a ni tawh
1) Kum 2017, December 31 zanlaiah khan NRC draft list hmasa ber hi tihchhuah a lo ni tawh a, he tah hian mi vaibelchhe 1.9-te hming tarlan a ni.
2) Nikum July 31-ah khan draft list pahnihna tihchhuah ni tawh bawkin, mi vaibelchhe 3.29-in an apply a, heng zingah hian mi 2,89,677 chu list-ah hian an tel a ni. Draft list-a tel lo mi nuai 40 chuang an awm.
3) NRC-ah hian March 25, 1971 hma lama hmarchhaka awm tawh te chu telh tur an ni a, dan loa ram chhunga lo lutte hriatchhuahna tur atana tih a ni. Hetichung hian sawiselna a nasa hle a, mi ṭhenkhat chuan chi inthliarna hmanruaah an puh hial.
4) West Bengal chief minister Mamata Banerjee pawh sawiseltu langsar a ni a, Assam aṭanga Bengal mite hnawhchhuahna hmanruaah puhin, Assamese ni lote hnawhchhuahna tur a nih thu a lo sawi fo tawh a ni.
