Tripura chief minister Manik Saha chuan Thawhṭanni khan New Delhi-ah civil aviation minister Jyotiraditya M Scindia hmuin, Agartala-a MBB Airport chu international airport-a puang turin a ngen.

Chief Minister chuan Agartala aṭanga Mumbai leh Hyderabad-ah direct flight bakah, night flight service tir turin Union Minister hi a ngen nghal bawk.

MBB Airport-ah hian CISF duty indaih lohna avangin zan dar 7:40 hnu lamah flight service a awm tawh lo a, transport minister Sushant Chowdhury pawhin sorkar laipui hnenah ngenna thlenin, zan lama flight service neih a nih theihna atan CISF sipai tam zawk dah turin a lo ngen tawh bawk a ni.

Transport department official chuan international flight service atan, Spicejet chu Agartala leh Chittagong (Bangladesh) inkara service turin contract pek a nih thu a sawi. April 5 khan ministry of home affairs (MHA) team chuan immigration clearance ti turin MBB airport hi an tlawh tawh a, international flight service tir a nih theina atan immigration permission pawh an pek thuai an beisei thu an sawi.