Manipur-ah hnam leh hnam inkara buaina chhuak avanga thla khat chuang an buai tawh hnuah, Ministry of Home Affairs chuan Manipur sorkar rawtna angin thil thlen dan chhui chiangtu tur member pathum awmna panel a din.
Panel hi Gauhati High Court Chief Justice hlui Ajai Lamba-a'n a ho dawn a, member atan IAS (retired) Himanshu Shekhar Das leh IPS Aloka Prabhakar-te ruat an ni.
Commission din thar hian May ni 3-a ATSUM-in rally an neihnaa buaina chhuah chhan an chhui dawn bakah, police-te'n buaina chhuak tireh tura hma an lak dante an enfiah dawn a ni. Commission hian thla ruk aia tlai loah report hi sorkar laipuiah an thehlut ang.
May ni 3 aṭanga Manipur-a tualchhung buaina chhuak avang hian mi 100 dawnin nunna an chan tawh a, mi sang chuang raltlan an awm tawh bawk. State chhung hmun hrang hrangah in leh lo tihchhiat a ni a, sakhaw hmun pawimawh tam tak hal a ni bawk. Mi tam tak chu an in leh lo tihchhiat a nih avangin shelter camp-ah an la khawsa mek a ni. Internet service pawh tihtawp chhunzawm zel a la ni bawk. Buaina chhuah hnuah hian sipaite lakluh ni tawh mah se, state chhung a la ralmuang lo hle a, hmun tam takah buaina chhuak thar a la awm reng a ni.
Tualchhung buaina a chhuah hnuah hian union Home Minister Amit Shah chuan ni thum chamin Manipur hi a lo tlawh tawh a. Meitei leh Kuki pawl aiawhte bakah, pawl hrang hrang aiawhte pawh a kawm a ni.
Kuki pawlte'n kawngpui dan an titawp lailawk
Kuki group chuan tualchhung buaina a thlen hnua Manipur khawpui, Imphal leh Dimapur, Nagaland inkalpawhna, National Highway-2 an dan chu an titawp lailawk.
Union Home Minister Amit Shah-a'n Manipur mipuite hnenah kawngpui dan titawp tura a ngen hnuah, Kuki group-te chuan tihtawp lailawk a nih thu hi an puang a ni. Minister chuan state mipute mamawh, ei tur, damdawi, petrol/diesel leh thil dangte thawn luh a nih theihna turin kawngpui an dan hi titawp turin a ngen a ni.
Kawngpui hi ni khatah darkar li, zing dar 10 aṭanga chawhnu dar 2 thleng hawn a ni dawn a, mipui mamawh phurtu motor-te chu central force-te'n escort zel turin an phut bawk.
