Manipur-a thla thum chuang tualchhung buaina a chhuah hnuah, National Democratic Alliance (NDA) hnuaia BJP thawhpui, Kuki People’s Alliance (KPA) chuan chief minister N Biren Singh kaihhruai sorkar an thlawpna an titawp.
MLA pahnih nei, Kuki People’s Alliance party chuan Governor Anusuiya Uikey hnenah lehkha thehlutin, "State dinhmun dik tak uluk tak ngaihtuah a nih hnuah, Manipur-a sorkarna vawng chelh mektu chief minister N.Biren Singh kaihhruai sorkar chu thlawp reng chi ah kan ngai tawh lo. Hei vang hian, KPA chuan Manipur sorkar a thlawpna a hnukkir ta a ni," a ti.
KPA hian MLA pahnih chauh an neih avangin BJP sorkar ding mek hi a nghawng pha dawn lo a, mahse BJP party-a Kuki MLA pasarih leh independent MLA pakhat la awmte chuan boruak an rawn neih ve mai rin a ni.
Manipur-ah hian BJP hian majority nei mah se, party dang thawhpuiin ṭangrual sorkar a siam a ni. BJP-a Kuki MLA pasarihte chu an bang a nih pawhin, MLA pasarih nei National People’s Party (NPP) chu thawhpuiah an sawm leh rin a bawk.
Manipur police 5 suspend an ni tawh
Manipur-a May 4-a Meitei miten Kuki hmeichhe pahnih saruaka kawng an zawhpui chungchangah, he thil thlenna biala police officer panga chu suspend an ni tawh. An zingah hian Thoubal district-a Nongpok Sekmai police station in-charge pawh a tel.
Official-te chuan hmeichhe pahnih chunga rawng taka chetna thleng video, July 19-a darh hnuah khan police panga hi suspend an ni tih an sawi. Hnam ṭhenkhatin heng police-te hi an hnaah dah leh nghal tura phutin nawrh huaihawt fo ni mah se, tun thlengin hrem an nihna hi sût a la ni lo tih an sawi bawk.
