Assam-ah ruah sur nasa in a thlen, tuilian leh leimin chuan mi nuai 2 chuang nunphung a nghawng a, state chhunga district 19 chuan khuarel chhiatna vang hian harsatna an tawk mek a ni. Leimin vang hian Karimganj district-ah mi panga in nunna an chan a, hmasawnna ruhrel tam tak a chhe bawk.
Assam State Disaster Management Authority (ASDMA) in an tarlan danin, khuarel chhiatna vang hian Nilaini thleng khan mi 2,96,384 nunphung a khaihlak a ni. District 19-a khaw 979 in a nghawng hi an tuar a, heng zingah hian Karimganj district chu a tuar na ber niin, tuilian hian mi nuai 2 chuang a nghawng bakah leimin vangin mi panga an thi tawh bawk. District dang zinga tuar na zualte- Tamulpur (11,526), Bajali (5,671), Hojai (5,272) leh Nagaon (5,247) te an ni.
Tuilian vang hian mi 26 an thi tawh nia tarlan a ni a; Barpeta, Biswanath, Bongaigaon, Darrang, Nalbari, South Salmara leh Udalguri district-ah kawngpui 29 a chhe bawk. Barpeta district-ah hian lei (bridge) a chhia a, Kopili lui chuan hlauhawm chin a pel bawk. Khaw chhung tuilian vangin district pangaa khaw 21 chuan buaina an tawk mek bawk a ni. Cachar leh Kamrup district-a harsatna tawk, an chenna in chhuahsantute tan North Guwahati, Kamrup district-ah chhawmdawlna in siam niin mi 235 an awm mek a ni.
District pathum- Dima Hasao, Cachar leh Karimganj-ah leimin chuan ram hectare 1.13 tichhiain mi 46 in an tuar bawk. Karimganj-a leimin in mi panga a hnawlte chuan nunna an chan a, nunna chante hi chhungkaw khata mi niin an zingah hian naupang pathum an tel a ni. Chhiatna thleng avang hian mi tam takin in leh lo an chhuahsan tawh a, tun dinhmunah chhawmdawlna in lamah mi 12,166 awmin, Karimganj leh Nagaon-a Relief Distribution Center-ah mi 10,287 an awm mek bawk.
